‘దండోరా కొట్టుకుందురో..’

వైవిధ్యమైన చిత్రం ‘కలర్‌ ఫొటో’, బ్లాక్‌బస్టర్‌ మూవీ ‘బెదురులంక 2012’ చిత్రాలను నిర్మించి అందరి దృష్టిని ఆకర్షించిన లౌక్య ఎంటర్‌టైన్‌మెంట్స్‌ అధినేత రవీంద్ర బెనర్జీ ముప్పానేని రూపొందిస్తున్న తాజా చిత్రం ‘దండోరా’. శివాజీ, నవదీప్‌, నందు, రవికృష్ణ, మనికా చిక్కాల, మౌనికా రెడ్డి, బిందు మాధవి, రాధ్య, అదితి భావరాజు తదితరులు పాత్రధారులు. మురళీకాంత్‌ దర్శకత్వం వహిస్తున్న ఈ చిత్రం ఈనెల 25న ప్రేక్షకుల ముందుకు రానుంది. రీసెంట్‌గా విడుదలైన టీజర్‌కు అమేజింగ్‌ రెస్పాన్స్‌ ఇప్పటికే డిఫరెంట్‌ ప్రమోషనల్‌ కంటెంట్‌తో ఆడియెన్స్‌ను అలరించిన ఈ సినిమా నుంచి లేటెస్ట్‌గా ‘పిల్లా…’ అనే లిరికల్‌ వీడియో సాంగ్‌ రిలీజైంది. ”దండోరా కొట్టుకుందురో.. గుండెల్లో కొత్తగుందిరో, నింగి నేల ఇలా..దారి కుదిరిందెలా, కళ్లారా చూడబోతినో.. కల్లోలం లాగ ఉంటదే..’ అంటూ సాగే ఈ పాట మనసుల్ని హత్తుకుంటోంది. మార్క్‌ కె రాబిన్‌ సంగీత సారథ్యం వహిస్తోన్న సినిమాలోని ఈ పాటను అదితి భావరాజు, అనురాగ్‌ కులకర్ణి పాడగా, పూర్ణా చారి రాశారు. ప్రేమికుల మనసుల్లో దాగిన భావాలను అందంగా ఆవిష్కరించిన పాట ఇది.

ఈ సినిమా సామాజిక స్పృహను కలిగించే అంశంతో తెరకెక్కుతోంది. అగ్ర వర్ణాలకు చెందిన అమ్మాయిల ప్రేమించి పెళ్లి చేసుకున్నా, అగ్ర వర్ణాలకు ఎదురు తిరిగినా ఎలాంటి దౌర్జన్యకాండ జరుగుతున్నాయనే అంశాన్ని ఆధారంగా చేసుకుని దండోరా సినిమాను తెరకెక్కిస్తున్నారు. తెలంగాణ గ్రామీణ నేపథ్యంలో మన పురాతన ఆచారాలు, సాంప్రదాయాలను ఆవిష్కరిస్తూనే వ్యంగ్యం, చక్కటి హాస్యం, హృదయాన్ని హత్తుకునే భావోద్వేగాల కలయికగా ఈ సినిమాను రూపొందిస్తున్నారు. టీజర్‌తో దర్శకుడు బలమైన అంశాన్ని చెప్పాలనకుంటున్నాడనే విషయం అర్థమవ్వడంతో సినిమాపై అంచనాలు మరింతగా పెరిగాయి. ఈ సినిమాలోని పాటలు టి సిరీస్‌ ద్వారా రిలీజ్‌ అవుతున్నాయి. అథర్వణ భద్రకాళి పిక్చర్స్‌ సినిమాను ఓవర్‌సీస్‌ రిలీజ్‌ చేస్తోంది.