తమిళనాడులో ఘోర రోడ్డు ప్రమాదం

– రెండు బస్సులు ఢీ.. 11 మంది మృతి
– 40 మందికి గాయాలు
– మరికొందరి పరిస్థితి విషమం
– మృతుల సంఖ్య పెరిగే అవకాశం
చెన్నై: తమిళనాడులో ఘోర రోడ్డు ప్రమాదం చోటుచేసుకున్నది. ఎదురెదురుగా వస్తున్న రెండు బస్సులు ఢీకొన్న ఘటనలో 11 మంది ప్రయాణికులు మరణించారు. మరో 40 మంది గాయపడ్డారు. పలువురి పరిస్థితి విషమంగా ఉన్నది. దీంతో మృతుల సంఖ్య పెరిగే అవకాశాలు కనిపిస్తున్నాయి. క్షతగాత్రులను దగ్గరలోని ప్రభుత్వ ఆస్పత్రికి తరలించారు. వైద్యులు వారికి చికిత్స అందిస్తున్నారు. వివరాళ్లోకెళ్తే… తమిళనాడులోని తిరుపత్తూరు జిల్లాలో ఈ సంఘటన జరిగింది. ఆదివారం సాయంత్రం 5.30 గంటల సమయంలో కరైకుడి వైపు వెళ్తున్న ప్రభుత్వ బస్సు, మదురై వైపు వెళ్తున్న మరో ప్రభుత్వ బస్సు తిరుపత్తూరు సమీపంలోని రహదారిపై ఎదురెదురుగా ఢీకొన్నాయి. ఈ ప్రమాదంలో రెండు బస్సుల్లోని ప్రయాణికులూ చిక్కుకున్నారు. ప్రమాద ఘటనకు సంబంధించిన సమాచారం అందిన వెంటనే.. పోలీసులు అక్కడికి చేరుకున్నారు. స్థానికుల సహాయంతో సహాయక చర్యలు చేపట్టారు. ప్రమాదస్థలి వద్ద మృతులు, క్షతగాత్రుల కుటుంబీకులు, బంధువుల రోదనలు మిన్నంటాయి.ఈ ప్రమాదంలో 11 మంది ప్రయాణికులు మరణించారు. గాయపడిన 40 మందిని శివగంగై ప్రభుత్వ ఆస్పత్రికి తరలించారు. కొంతమంది ప్రయాణికుల పరిస్థితి విషమంగా ఉండటంతో మతుల సంఖ్య పెరిగే అవకాశం ఉందని పోలీస్‌ అధికారి తెలిపారు. ఈ ప్రమాదంపై దర్యాప్తు చేస్తున్నట్టు వెల్లడించారు.