– సుల్తాన్‌ జొహోర్‌ కప్‌
కౌలాలంపూర్‌: 11వ సుల్తాన్‌ జొహోర్‌ కప్‌లో భారత పురుషుల హాకీజట్టును పాకిస్తాన్‌ జట్టు నిలువరించింది. గ్రూప్‌-బిలో భాగంగా శుక్రవారం జరిగిన భారత్‌-పాకిస్తాన్‌ జట్ల మధ్య జరిగిన లీగ్‌మ్యాచ్‌ నిర్ణీత సమయం ముగిసే సరికి 3-3గోల్స్‌తో డ్రా అయ్యింది. తొలి క్వార్టర్‌లో ఇరుజట్లు గోల్స్‌ చేయడంలో విఫలం కాగా.. రెండోక్వార్టర్‌లో భారత్‌ పెనాల్టీ కార్నర్‌ను గోల్‌గా మలిచింది. దీంతో భారత్‌ 1-0 ఆధిక్యతలో నిలిచింది. మూడో క్వార్టర్‌లో పాకిస్తాన్‌ ఒక గోల్‌ చేయగా.. నాల్గో క్వార్టర్‌లో ఇరుజట్లు రెండేసి గోల్స్‌తో రాణించాయి. ఇందులో ఒక్కో ఫీల్డ్‌ గోల్‌, మరోటి పెనాల్టీ కార్నర్‌లను గోల్స్‌గా మలిచాయి. ఈ టోర్నీలో భారత హాకీ జూనియర్‌ జట్టు ప్రాతినిధ్యం వహిస్తోంది. టోర్నీలో మొత్తం 8జట్లు ప్రాతినిధ్యం వహిస్తున్నాయి. గత ఏడాది 6జట్ల మధ్య ఈ టోర్నీ జరగ్గా ఈసారి మరో రెండుజట్లు అదనంగా వచ్చి చేరాయి. మరో పోటీలో న్యూజిలాండ్‌ జట్టు 3-2గోల్స్‌ తేడాతో ఆతిథ్య మలేషియాను చిత్తుచేసింది. ఇక గ్రూప్‌-ఎలో ఆస్ట్రేలియా 3-0తో గ్రేట్‌ బ్రిటన్‌ను ఓడించింది.
