సరికొత్త అనుభూతినిచ్చే ‘హనీ’

నవీన్‌ చంద్ర, దివ్య పిళ్లై ప్రధాన పాత్రల్లో కరుణ కుమార్‌ రచన, దర్శకత్వం వహించిన సైకలాజికల్‌ హర్రర్‌ మూవీ ‘హనీ’. ఓవీఎ ఎంటర్‌టైన్‌మెంట్స్‌ బ్యానర్‌పై రవి పీట్ల, ప్రవీణ్‌ కుమార్‌ రెడ్డి నిర్మించిన ఈ చిత్రాన్ని శేఖర్‌ స్టూడియోస్‌ సమర్పిస్తోంది. ఈనెల 6న ఈ సినిమా థియేటర్లలో రిలీజ్‌ కానుంది. ఈ నేపథ్యంలో మేకర్స్‌ ట్రైలర్‌ని లాంచ్‌ చేశారు. హీరో నవీన్‌ చంద్ర మాట్లాడుతూ, ‘ట్రైలర్‌కి చాలా అద్భుతమైన రెస్పాన్స్‌ రావడం చాలా ఆనందంగా ఉంది. ఇది మౌత్‌ టాక్‌తో నిలబడే సినిమా. మాకు ఉన్న బడ్జెట్లో థియేటర్స్‌కి తీసుకొచ్చి ఆడియన్స్‌కి ఒక డిఫరెంట్‌ ఎక్స్పీరియన్స్‌ ఇవ్వాలని ఈ సినిమా చేశాం. చూసిన తరువాత ఈ సినిమా మిమ్మల్ని వెంటాడుతూనే ఉంటుంది. ఇది ఆలోచన రేకెత్తించే సినిమా. కరుణ కుమార్‌ ఈ కథకు నన్ను ఎంచుకోవడం చాలా ఆనందంగా ఉంది.

ఈ సమాజంలో ఆశ కోసం ప్రజలు ఏవేవో చేస్తున్నారు. ఇందులో ఒక డార్క్‌ సొసైటీని చూపించాం. ఈ కథ విన్న తర్వాత నేను చాలా జాగ్రత్తగా ఉన్నాను. మానసికంగా బలహీనంగా ఉన్నప్పుడే ఇలాంటి వాటికి మనం విక్టిమ్‌ అవుతాం’ అని అన్నారు. ‘ఈ సినిమాలో పిల్లి మాయ అనే ఒక వస్తువుని శోధించి, సాధించే ఒక వ్యక్తి జీవితం చూపించాం. మెదడు అంతా చీకటి ఉన్నా మనసుల మధ్య జరిగిన ఒక కథ. నిజ జీవిత సంఘటన నుంచి స్ఫూర్తిగా తీసుకుని సినిమా చేశాను. మనిషి మెదడు కంటే పెద్ద దెయ్యం లేదనేది ఈ సినిమా సారాంశం. ఇదొక ఫ్యామిలీ స్టోరీ. ఇందులో ఎప్పుడు చూడని నవీన్‌ చంద్రని చూడబోతున్నారు. అలాగే రాజా రవీందర్‌ పాత్ర కూడా చాలా కొత్తగా ఉంటుంది’ అని తెలిపారు.