క్యాప్ ఫెర్రట్ ద్వీపకల్పంలో
భారీగా ఎగిసిపడిన మంటలు
పడవల్లో స్థానికుల తరలింపు
పారిస్ : ఫ్రాన్స్, స్పెయిన్ లలో కార్చిచ్చు తీవ్ర విధ్వంసం సృష్టిస్తోంది. క్యాప్ ఫెర్రట్ ద్వీపకల్పంలో భారీగా మంటలు ఎగిసిపడుతున్నాయి. దీంతో అధికారులు అక్కడి ప్రజలను బోట్లలో సురక్షిత ప్రాంతాలకు తరలిస్తున్నారు. బోర్డియాక్స్ కు పశ్చిమంగా ఉన్న టూరిస్ట్ స్పాట్ నుంచి ఇప్పటికే వేలాది మందిని తరలించారు. గిరోండే ప్రాంతంలో అటవీ మంటలను ఆర్పేందుకు అగ్నిమాపక సిబ్బంది ప్రయత్నిస్తోంది.
స్పెయిన్ లో జాతీయ ఎమర్జెన్సీ …!
సౌమోస్ ప్రాంతంలో కార్చిచ్చు వల్ల సుమారు 21 వేల ఎకరాల అటవీ భూమి దగ్ధమైంది. క్యాప్ ఫెర్రట్ ద్వీపకల్పం నుంచి ఇప్పటికే 4 వేల మందిని తరలించినట్లు ఫ్రెంచ్ మంత్రి లారెంట్ నూనెజ్ తెలిపారు. సుమారు 80 ఇండ్లు దగ్ధం అయ్యాయి. 50 ఇండ్లు ధ్వంసమయ్యాయి. మరో వైపు స్పెయిన్లో జాతీయ ఎమర్జెన్సీని ప్రకటించారు. దేశ రాజధాని మాడ్రిడ్కు సమీపం వరకు మంటలు కనిపిస్తున్నాయి.
అగ్నిమాపక సిబ్బందికి సవాలుగా మంటలు
బోర్డో సమీపంలో దాదాపు 60,000 మందిని ఖాళీ చేయించాలని ఫ్రెంచ్ అధి కారులు ఆదేశించడంతో …. ఫ్రాన్స్, స్పెయిన్లలో కార్చిచ్చుల కారణంగా సురక్షిత ప్రాంతాలకు తరలివెళ్లాలని చెప్పిన వారి మొత్తం సంఖ్య 2,20,000 దాటింది. నైరుతి ఫ్రాన్స్లోని గిరాండ్, లాండెస్ ప్రాంతాల నుంచి సుమారు 2 లక్షల మందిని సురక్షిత ప్రాంతాలకు తరలించారు. సహాయక చర్యల కోసం ఫ్రాన్స్ అధ్యక్షుడు ఇమ్మాన్యుయేల్ మాక్రాన్ సైన్యాన్ని రంగంలోకి దించారు. ఇదిలా ఉండగా రాజధానికి పశ్చిమాన మూడు చోట్ల చెలరేగిన మంటలు కలిసి ఒకే మంటగా మారడంతో, మాడ్రిడ్ సమీపంలోని మంటలను అదుపు చేయడం అగ్నిమాపక సిబ్బంది సామర్థ్యానికి మించి ఉందని స్పానిష్ అధికారులు హెచ్చరించారు.
చరిత్రలోనే ఘోర అగ్నిప్రమాదం :
మాడ్రిడ్ ప్రాంతీయ అధ్యక్షురాలు ఇసాబెల్ డియాజ్ అయూసో
‘‘అధిక ఉష్ణోగ్రతలు, ఎడతెరిపి లేని వేడిగాలులు, విలీనమవుతున్న అగ్నిప్రమాదాల వంటి ‘సంఘటనల పరంపర’ను ఆ ప్రాంతం ఎదుర్కొంటోంది. దీనిని ‘ఆ ప్రాంత చరిత్రలోనే అత్యంత ఘోరమైన అగ్నిప్రమాదం’గా మాడ్రిడ్ ప్రాంతీయ అధ్యక్షురాలు ఇసాబెల్ డియాజ్ అయూసో అభివర్ణించారు. స్పెయిన్లో, రాజధానికి సుమారు 50 కిలోమీటర్ల (31 మైళ్ల) దూరంలో ఉన్న రోబ్లెడో డి చావెలా, ఫ్రెస్నెడిల్లాస్ డి లా ఒలివియా మున్సిపాలిటీల వైపు కార్చిచ్చులు వ్యాపిస్తున్నాయని స్థానిక అత్యవసర సేవల సిబ్బంది తెలిపారు. “కార్చిచ్చు ఉధృతంగా ఉంది. దానిని అదుపు చేయడం ప్రస్తుతం అగ్నిమాపక సిబ్బంది సామర్థ్యానికి మించి ఉంది” అని మాడ్రిడ్ ప్రాంతీయ ప్రభుత్వ అత్యవసర నిర్వహణ అధిపతి కార్లోస్ నోవిల్లో విలేకరులతో అన్నారు. ‘ఆ ప్రాంతంలోని మంటలను ఆర్పడం సాధ్యం కాదు, అందుకే రక్షణ చర్యలు తీసుకుంటున్నాము’ అని చెప్పారు.
ఖాళీగా పట్టణాలు
మాడ్రిడ్ ప్రాంతంలో కనీసం 6,000 హెక్టార్ల భూమి అగ్నికి ఆహుతైందని అధికారులు తెలిపారు. అలాగే, ఆవిలా అగ్నిప్రమాదంలో దాదాపు 9,000 హెక్టార్లు ధ్వంసమయ్యాయని పేర్కొన్నారు. చాపినేరియా, నవాస్ డెల్ రే, కోల్మెనార్ డెల్ అరోయో, ఫ్రెస్నెడిల్లాస్ డి లా ఒలివా, రోబ్లెడో డి చావెలా, ఆల్డియా డెల్ ఫ్రెస్నో, నవలగమెల్లా, జర్జాలెజోతో సహా ఎనిమిది మున్సిపాలిటీలు ఖాళీ అయ్యాయి. శాన్ మార్టిన్ డి వాల్డిగ్లేసియాస్, పెలాయోస్ డి లా ప్రెసా, విల్లా డెల్ ప్రాడోతో సహా అనేక ఇతర పట్టణాలు లాక్డౌన్లో ఉన్నాయి. శనివారం తెల్లవారుజామున, ముందుజాగ్రత్త చర్యగా బోర్డో సమీపంలోని నాలుగు పట్టణాలను అధికారులు ఖాళీ చేయించారు.
డబల్ ఎక్సెల్ ఫైర్
స్థానిక ప్రిఫెక్ట్ సోఫీ బ్రోకాస్ “XXL ఫైర్”గా అభివర్ణించిన గిరాండే అగ్నిప్రమాదం … 19,000 హెక్టార్లకు పైగా (46,000 ఎకరాల) అటవీ ప్రాంతాన్ని దహించివేసి, సుమారు 80 ఇండ్లను నాశనం చేసింది. ప్రముఖ పర్యాటక ప్రాంతమైన నైరుతి తీరంలోని క్యాప్ ఫెర్రెట్ ద్వీపకల్పాన్ని మంటలు చుట్టుముట్టడంతో, అధికారులు ఆ ద్వీపకల్పాన్ని పూర్తిగా ఖాళీ చేయించారు. ఈ ప్రాంతంలో ఏడాది పొడవునా దాదాపు 8,000 మంది జనాభా ఉంటారు,.కానీ వేసవి సెలవుల కాలంలో ఈ సంఖ్య 10 రెట్లు పెరగవచ్చు. 2022లో ఈ ప్రాంతాన్ని తాకిన వినాశకరమైన అగ్నిప్రమాదాల కంటే ఇప్పుడు పరిస్థితులు మరింత తీవ్రంగా ఉన్నాయని, కరువు వేడిగాలులు కారణంగా రాత్రంతా మంటలు వ్యాపించడం కొనసాగిందని అగ్నిమాపక, రెస్క్యూ చీఫ్ మార్క్ వెర్ములెన్ అన్నారు.
గాయపడిన అగ్నిమాపక సిబ్బంది..
“ఇంతటి తీవ్రమైన సంవహన అగ్నిప్రమాదాన్ని మేము ఎన్నడూ చూడలేదు,” అని ఫ్రాన్స్ అంతర్గత వ్యవహారాల మంత్రి లారెంట్ నునెజ్ ఫ్రెంచ్ బ్రాడ్కాస్టర్ TF1తో అన్నారు. ఈ ఘటనలో సుమారు 50 మంది అగ్నిమాపక సిబ్బంది గాయపడ్డారని కూడా ఆయన తెలిపారు. వందలాది మందిని పడవల ద్వారా క్యాప్ ఫెర్రెట్ ద్వీపకల్పం నుండి తరలించగా, మరికొందరు రోడ్డు మార్గంలో బయలుదేరారు. మరింత దక్షిణంగా, లాండెస్ ప్రాంతంలోని బిస్కరోస్సే సమీపంలో చెలరేగిన మరో కార్చిచ్చు కారణంగా 23,000 మందికి పైగా ప్రజలు తమ ఇండ్లు, క్యాంప్సైట్లు, ఒక నర్సింగ్ హోమ్, ఒక వేసవి శిబిరాన్ని ఖాళీ చేయాల్సి వచ్చింది.
