నవతెలంగాణ-సత్తుపల్లి
సత్తుపల్లిలోని 100 పడకల ప్రభుత్వ ఏరియా ఆసుపత్రిలో అవసరం మేరకు తక్షణమే పర్మినెంట్ వైద్యులు, స్టాఫ్ నర్సులు, పారిశుద్ధ్య సిబ్బందిని నియమించాలని సీపీఐ(ఎం) జిల్లా నాయకులు మోరంపూడి పాండురంగారావు, జాజిరి శ్రీనివాస్ ప్రభుత్వాన్ని డిమాండ్ చేశారు. ఆసుపత్రిలో సిబ్బంది కొరత, వైద్య సేవల స్థితిగతులపై సీపీఐ(ఎం) బృందం క్షేత్రస్థాయిలో సర్వే నిర్వహించింది. రూ. 35 కోట్లతో నిర్మించిన ఈ అత్యాధునిక ఆసుపత్రిలో తగినంత మంది డాక్టర్లు, నర్సులు, పారిశుద్ధ్య సిబ్బంది లేకపోవడం వల్ల గ్రామీణ ప్రాంతాల రోగులు తీవ్ర ఇబ్బందులు పడుతున్నారని వారు ఆవేదన వ్యక్తం చేశారు. అన్ని సౌకర్యాలతో అత్యవసర వైద్య సేవలను ప్రజలకు అందుబాటులోకి తీసుకురావాలని ఈ సందర్భంగా వారు ప్రభుత్వాన్ని కోరారు.
ఆసుపత్రిలో తీవ్రంగా ఉన్న సిబ్బంది కొరత: సర్వేలో వెల్లడి
సీపీఐ(ఎం) బృందం నిర్వహించిన సర్వేలో ఆసుపత్రిలోని ఖాళీల వివరాలను స్పష్టంగా తెలుసుకున్నారు. ఈ 100 పడకల ఆసుపత్రిలో 59 మంది డాక్టర్లు ఉండాల్సి ఉండగా ప్రస్తుతం కేవలం 12 మంది మాత్రమే విధులు నిర్వహిస్తున్నారు. వీరిలో రెగ్యులర్ డాక్టర్లు ఏడుగురు మాత్రమే కావడం గమనార్హం. స్టాఫ్ నర్సులు మొత్తం 30 పోస్టులకు గాను ప్రస్తుతం 10 మంది మాత్రమే సేవలు అందిస్తున్నారు. పారిశుద్ధ్య సిబ్బంది (స్వీపర్లు) 25 మంది ఉండాల్సిన ఉండగా కేవలం 10 మందితోనే ఆసుపత్రిని నెట్టుకొస్తున్నారు. ఇంత భారీ స్థాయిలో ఖాళీలు ఉండటం వల్లే ప్రజలకు మెరుగైన, నాణ్యమైన వైద్య సేవలు అందించడం సాధ్యం కావడం లేదని సీపీఐ(ఎం) నాయకులు స్పష్టం చేశారు.
సత్తుపల్లి ప్రాంతంతో పాటు పక్క రాష్ట్ర సమీప గ్రామాల రోగులకు ఈ ఆసుపత్రే దిక్కు
సత్తుపల్లి ఏరియా ఆసుపత్రిపై కేవలం స్థానికులే కాకుండా చుట్టుపక్కల ఉన్న అశ్వారావుపేట, దమ్మపేట, ములకలపల్లి, పెనుబల్లి, అన్నపురెడ్డిపల్లి, వేంసూరు మండలాల ప్రజలు ఈ ఆసుపత్రి వైద్య సేవలను ఉపయోగించుకుంటున్నారని నాయకులు తెలిపారు. వీరే కాకుండా పక్క రాష్ట్రమైన ఆంధ్రప్రదేశ్లోని కృష్ణా, ఏలూరు జిల్లాల సరిహద్దు గ్రామాల నుండి కూడా రోగులు వైద్యం కోసం సత్తుపల్లికి వస్తుంటారని పేర్కొన్నారు. ఇంతటి ప్రాధాన్యత ఉన్న ఆసుపత్రిని నిర్లక్ష్యం చేయడం తగదని, ప్రభుత్వం తక్షణమే స్పందించి పూర్తిస్థాయి సిబ్బందిని నియమించాలని డిమాండ్ చేశారు. ఈ కార్యక్రమంలో సీపీఐ(ఎం) పట్టణ కార్యదర్శి కొలికపోగు సర్వేశ్వరరావు, పార్టీ డివిజన్ కమిటీ సభ్యులు రావుల రాజబాబు, సప్పిడి భాస్కర్, చావా రమేష్ తదితరులు పాల్గొన్నారు.
సత్తుపల్లి ఏరియా ఆసుపత్రిపై కేవలం స్థానికులే కాకుండా చుట్టుపక్కల ఉన్న అశ్వారావుపేట, దమ్మపేట, ములకలపల్లి, పెనుబల్లి, అన్నపురెడ్డిపల్లి, వేంసూరు మండలాల ప్రజలు ఈ ఆసుపత్రి వైద్య సేవలను ఉపయోగించుకుంటున్నారని నాయకులు తెలిపారు. వీరే కాకుండా పక్క రాష్ట్రమైన ఆంధ్రప్రదేశ్లోని కృష్ణా, ఏలూరు జిల్లాల సరిహద్దు గ్రామాల నుండి కూడా రోగులు వైద్యం కోసం సత్తుపల్లికి వస్తుంటారని పేర్కొన్నారు. ఇంతటి ప్రాధాన్యత ఉన్న ఆసుపత్రిని నిర్లక్ష్యం చేయడం తగదని, ప్రభుత్వం తక్షణమే స్పందించి పూర్తిస్థాయి సిబ్బందిని నియమించాలని డిమాండ్ చేశారు. ఈ కార్యక్రమంలో సీపీఐ(ఎం) పట్టణ కార్యదర్శి కొలికపోగు సర్వేశ్వరరావు, పార్టీ డివిజన్ కమిటీ సభ్యులు రావుల రాజబాబు, సప్పిడి భాస్కర్, చావా రమేష్ తదితరులు పాల్గొన్నారు.
