– ఎన్నికల ప్రచారం నుంచి లోక్‌సభలో ప్రమాణం వరకూ బుల్లి రాజ్యాంగం
– ఈ పుస్తకం ప్రింటింగ్‌ వెనుక!
న్యూఢిల్లీ: మన రాజ్యాంగం గురించి వినే ఉంటాం. అంబేద్కర్‌ రచించినదని చెప్పుకుంటుంటాం. అయితే లోక్‌సభ ఎన్నికల్లో రాహుల్‌ గాంధీ… చేతిలో బుల్లి రాజ్యాంగంతో ప్రత్యక్షమయ్యారు. ఇటీవల జరిగిన లోక్‌సభ ఎన్నికల ప్రచారం నుంచి లోక్‌సభలో ప్రమాణ స్వీకారం చేసే వరకూ ఆ రెడ్‌బుక్‌ ఆయన చేతిలోనే ఉంది. దేశప్రజలంతా ఆ పుస్తకాన్ని చూడడం ఇదే మొదటిసారి. ఈ రాజ్యాంగ పుస్తకాలను రాహుల్‌ గాంధీ పలువురికి అందజేశారు కూడా. మోడీ ప్రభుత్వం మళ్లీ అధికారంలోకి వస్తే రాజ్యాంగాన్ని మార్చేయడం ఖాయమంటూ తన చేతిలో ఉన్న పుస్తకాన్ని చూపుతూ ప్రచారం చేశారు. ప్రతిపక్షాలన్నీ కూడా దీన్ని ఎన్నికల ప్రచారాస్త్రంగా మార్చుకున్నాయి. అయితే ఈ బుల్లి రాజ్యాంగానికి లక్నోతో ప్రత్యక్ష సంబంధం ఉంది. లక్నోకు చెందిన ఈస్టర్న్‌ బుక్‌ కంపెనీ (ఈబీసీ) ప్రచురించిన ఈ లెదర్‌తో కప్పబడిన ఈ ఎరుపు పుస్తకం పాకెట్‌ ఎడిషన్‌ మేధో సంపత్తి హక్కులను పొందింది. అంటే పుస్తకం పరిమాణం, శైలి, రంగు, ఫాంట్‌ కాపీ చేయబడదు. ఇది ప్రపంచంలోని అనేక లైబ్రరీలలో కూడా ఉంది. రాజ్యాంగం యొక్క 624 పేజీల పాకెట్‌ ఎడిషన్‌ ‘బైబిల్‌ పేపర్‌’పై ముద్రించబడింది. ఈ పాకెట్‌ పరిమాణం పొడవు 20 సెం.మీ కాగా వెడల్పు 9 సెం.మీ.
బైబిల్‌ పేపర్‌పై ముద్రణ
అంతర్జాతీయ నాణ్యత, ప్రమాణాల విషయంలో ఎక్కడా రాజీపడకుండా జేబులో పట్టే సైజులో 624 పేజీల ఈ పుస్తకాన్ని ముద్రించడం తమకు సవాల్‌గా మారినట్టు ఈస్టర్న్‌ బుక్‌ కంపెనీ సేల్స్‌ ఆఫీసర్‌ సుధీర్‌ కుమార్‌ చెప్పారు. ఇందుకోసం ఆ సంస్థ పరిశోధనల అనంతరం బైబిల్‌ పేపర్‌పై ముద్రించింది. చాలా చక్కని పేజీలు ఉన్నప్పటికీ, ఇది బలంగా ఉంది. అలాగే, ద్విపార్శ్వ ముద్రణలో ముద్రించిన పదాలు ఇతర వైపు నుండి చూడవు. ఎనిమిది లక్షలకు పైగా పదాలతో కూడిన ఈ పుస్తకాన్ని అందరికీ అందుబాటులో ఉండేలా బైబిల్‌ వంటి మందపాటి కాగితంపై ముద్రించారు. ఈస్టర్న్‌ బుక్‌ కంపెనీ సేల్స్‌ ఆఫీసర్‌ సుధీర్‌ కుమార్‌ మాట్లాడుతూ… ”రాజ్యాంగం యొక్క ఈ పాకెట్‌ ఎడిషన్‌కు ఈబీసీ మాత్రమే ప్రచురణకర్త. గత మూడు నెలల్లో దాదాపు 5000 కాపీలు అమ్ముడయ్యాయి. దీని మొదటి ఎడిషన్‌ 2009 సంవత్సరంలో ప్రచురించ బడింది. అప్పటి నుంచి 16 సంచికలు ప్రచురించబడ్డాయి. దీని ముందుమాటను మాజీ అటార్నీ జనరల్‌ కేకే వేణుగోపాల్‌ రాశారు. అందమైన, ప్రామాణికమైన ఈ రాజ్యాంగ పుస్తకం ప్రతి భారతీయుడి జేబులో ఉండాలి” అని అన్నారు.
