నవతెలంగాణ – బెంగుళూరు: కర్నాటకలో భారీ సెక్స్ రాకెట్ గుట్టు రట్టు చేశారు. బెంగుళూరులో హానీ ట్రాప్ చేస్తున్న ఓ మహిళ ముఠాను అరెస్టు చేశారు. వారి వద్ద నుంచి భారీ మొత్తంలో సొమ్మును స్వాధీనం చేసుకున్నారు. ఆ గ్యాంగ్లో ఉన్న ముగ్గుర్ని అరెస్టు చేశారు. అయితే హనీ ట్రాప్ చేసిన ప్రధాన నిందితురాలు ప్రస్తుతం పరారీలో ఉన్నది. ఆ నిందితురాలి పేరు నేహా అలియాస్ మేహర్. మరో ముగ్గురుతో కలిసి ఆమె సెక్స్ రాకెట్ నడిపింది. టెలిగ్రామ్ యాప్ ద్వారా మగవాళ్లకు వలవేసి, ఆ తర్వాత శృంగారం కోసం వాళ్లను తన ఇంటికి ఆహ్వానించేది. శృంగారం చేస్తున్న సమయంలో మరో ముగ్గురు నిందితులు వీడియోలు తీసేవారు. ఆ తర్వాత ఆ వీడియోలతో బ్లాక్మెయిల్ చేసేవారని పోలీసులు వెల్లడించారు. మెహర్ను పెళ్లి చేసుకోవాలని, లేదంటే ఇస్లాం మతంలోకి మారాలని, లేదంటే డబ్బులు ఇవ్వాలని బాధితులను వేధించేవారు. బెదిరంపుల ద్వారా ఆ గ్యాంగ్ సుమారు 35 లక్షలకు పైగా వసూల్ చేసింది. గత ఏడాదిన్నర కాలం నుంచి ఈ దందా నడుస్తున్నట్లు పోలీసులు తెలిపారు. నిందితురాలు మెహర్ ప్రస్తుతం ముంబైలో ఉన్నట్లు తెలిసింది. ఐపీసీలోని సెక్షన్ 348, 420 ప్రకారం పుట్టెనహల్లి పోలీసు స్టేషన్లో కేసు రిజిస్టర్ చేశారు.