నవతెలంగాణ – మల్హర్ రావు
మహముత్తారం మండలంలోని మొనాజీపేట, బొర్లగూడెం ధాన్యం కొనుగోలు కేంద్రాలను శుక్రవారం అదనపు కలెక్టర్ అశోక్ కుమార్ ఆకస్మికంగా సందర్శించి, ధాన్యం కొనుగోలు ప్రక్రియను సమగ్రంగా పరిశీలించారు. ఈ సందర్శన సందర్భంగా అదనపు కలెక్టర్ పీపీసీ ఇన్‌చార్జ్‌లను ఉద్దేశిస్తూ, రైతుల నుండి ప్యాడీ కొనుగోలు సమయంలో ఎఫ్ ఏ క్యూ ప్రమాణాలను ఖచ్చితంగా పాటించాల్సిన అవసరం ఉందని స్పష్టం చేశారు. ప్రతి రైతు నుండి కొనుగోలు చేసిన ధాన్యం క్రమ సంఖ్యల నమోదు చేసి, పారదర్శకంగా నిర్వహించాలని ఆదేశించారు.
ధాన్యం కొనుగోలుపై నిర్వహించిన శిక్షణా కార్యక్రమాల్లో ఇచ్చిన సూచనల ప్రకారం, ప్రతి పర్చేసింగ్ సెంటర్‌లో ప్యాడీ ప్రొక్యూర్మెంట్ సెంటర్ వివరాలు, కొనుగోలు మరియు ఇతర సంబంధిత సమాచారాన్ని స్పష్టంగా ప్రదర్శించే నోటీస్ బోర్డులను తప్పని సరిగా ఏర్పాటు చేయాలని సూచించారు. ఇది రైతులకు అవసరమైన సమాచారాన్ని చేరవేయడంలో ఎంతో ముఖ్యం అని పేర్కొన్నారు.రోజువారీ ప్రక్రియలో భాగంగా, తేమశాతం పరిశీలన తప్పనిసరి అని, దీనికి సంబంధించిన రికార్డులను ప్రత్యేక రిజిస్టర్‌లో ప్రతిరోజూ నమోదు చేయాలని ఆదేశించారు. రైతుల ధాన్య నాణ్యతపై నిర్ణయాలు పూర్తిగా ఈ రికార్డుల ఆధారంగా ఉండాలని సూచించారు.అదనంగా, రైతుల వ్యక్తిగత వివరాలు, కొనుగోలు చేసిన ధాన్యం పరిమాణం, రకం, మొదలైన వాటిని రిజిస్టర్‌లలో సంపూర్ణంగా, తప్పులేకుండా నమోదు చేయాలని పీపీసీ సిబ్బందిని ఆదేశించారు. శిక్షణలో వివరించిన విధానాలను కచ్చితంగా అమలు చేయడం ద్వారా వ్యవస్థలో పారదర్శకత మరియు బాధ్యతాయుతమైన నిర్వహణ సాధ్యమవుతుందని పేర్కొన్నారు.
ప్రభుత్వం విడుదల చేసిన ప్యాడీ కొనుగోలు మార్గదర్శకాలను కచ్చితంగా అనుసరించాలని, ఏ విధమైన నిర్లక్ష్యం జగితే కఠిన చర్యలు తీసుకోవడం జరుగుతుందని హెచ్చరించారు. అలాగే, రైతులకు ఎటువంటి ఇబ్బందులు కలగకుండా కొనుగోలు ప్రక్రియను వేగవంతం చేయాలి, ఇప్పటికే కొనుగోలు చేసిన ధాన్యాన్ని నిర్దేశిత రైస్ మిల్లులకు వెంటనే తరలించడంతో పాటు రవాణా వివరాలను సమయానికి నమోదు చేయాలని సిబ్బందికి స్పష్టమైన ఆదేశాలు జారీ చేశారు.ఈ కార్యక్రమంలో పౌర సరఫరాల అధికారి కిరణ్ కుమార్, డిసీఓ వాలియా నాయక్, తహసీల్దార్లు పాల్గొన్నారు.
