మంత్రి వివేక్‌కు కేంద్ర కార్మిక సంఘాల వినతి
నవతెలంగాణ బ్యూరో-హైదరాబాద్‌
కేంద్ర ప్రభుత్వం తీసుకొచ్చిన నాలుగు లేబర్‌ కోడ్‌లను రాష్ట్రంలో అమలు చేయబోమంటూ శాసన సభలో తీర్మానం చేయాలని కేంద్ర కార్మిక సంఘాలు రాష్ట్ర ప్రభుత్వానికి విజ్ఞప్తి చేశాయి. ఈ మేరకు శనివారం కార్మిక శాఖ మంత్రి జి వివేక్‌ వెంకటస్వామికి హైదరాబాద్‌లో వినతి పత్రాన్ని అందజేశాయి. ఆ కోడ్‌లను రద్దు చేయాలని కోరుతూ దేశవ్యాప్తంగా కార్మికవర్గం 2023 ఫిబ్రవరి 16న సెక్టోరల్‌ సమ్మె చేసిందని ఆయా సంఘాల నేతలు గుర్తు చేశారు. 2025 జులై 9న దేశవ్యాప్త సార్వత్రిక సమ్మెలో 30 కోట్ల మందికిపైగా కార్మికులు పాల్గొని తమ ఆగ్రహన్ని వ్యక్తం చేశారని తెలిపారు. పార్లమెంట్‌లో నాలుగు లేబర్‌ కోడ్‌లను రద్దు చేయాలని కాంగ్రెస్‌ ఫ్లోర్‌ లీడర్‌ రాహుల్‌ గాంధీ , వామపక్ష పార్టీల జాతీయ నాయకులు, బీజేపీయేతర పార్టీల నాయకులు డిమాండ్‌ చేశారని గుర్తు చేశారు. అయినా కేంద్ర ప్రభుత్వం విదేశీ బహుళ జాతి సంస్థల ప్రయోజనాలు కాపాడేందుకు అప్రజాస్వామికంగా లేబర్‌కోడ్‌ల అమలుకు నవంబర్‌ 21న నోటిఫికేషన్లను జారీ చేసిందని తెలిపారు.
ఆ కోడ్‌లను వ్యతిరేకిస్తూ ఇప్పటికే పశ్చిమ బెంగాల్‌, తమిళనాడు, కేరళ రాష్ట్ర ప్రభుత్వాలు అసెంబ్లీలో తీర్మానాలు చేశాయని పేర్కొన్నారు. కేంద్ర ప్రభుత్వం ఈజ్‌ ఆఫ్‌ డూయింగ్‌ బిజినెస్‌ పేరుతో విదేశీ, స్వదేశీ బహుళ జాతి సంస్థలకు గరిష్ట లాభాలు కట్టబెట్టేందుకు లేబర్‌ కోడ్‌ల ద్వారా కార్మిక హక్కులను హరిస్తున్నదని ఆందోళన వ్యక్తం చేశారు. కార్మిక సంఘాల రిజిస్ట్రేషన్లను కఠినతరం చేస్తున్నదనీ, ఎనిమిది గంటల పని దినాన్ని 12 గంటలకు పెంచడం ద్వారా శ్రమదోపిడీకి స్వేచ్ఛనిస్తున్నదని తెలిపారు. కార్మికుల సంక్షేమం, ఆరోగ్య సంరక్షణకు ప్రభుత్వాలకు బాధ్యత లేదంటున్నదనీ, అదనపు పనికి అదనపు వేతనం చెల్లించడానికి నిరాకరిస్తున్నదని పేర్కొన్నారు. జీతాల పెంపుదలకు కార్మికులు, కార్మిక సంఘాలకు బాధ్యత లేకుండా యాజమానులకు, సంబంధిత ప్రభుత్వాలకే పూర్తి అధికారాలను కట్టబెడుతున్నదని తెలిపారు.
కార్మిక శాఖ అధికారాలను బలహీనం చేస్తున్నదనీ, ఇంతటి ప్రమాదకరమైన లేబర్‌ కోడ్‌లను రాష్ట్రంలో అమలు చేయకుండా కార్మిక వర్గ హక్కులను కాపాడేందుకు రాష్ట్ర ప్రభుత్వం చొరవ చూపాలని విజ్ఞప్తి చేశారు. ఈ అంశాన్ని సీఎం దృష్టికి తీసుకెళతామని మంత్రి కార్మిక సంఘాలకు హామీ ఇచ్చారు. ఈ కార్యక్రమంలో ఐఎన్‌టీయూసీ జాతీయ ఉపాధ్యక్షులు నాగన్న గౌడ్‌, ఏఐటీయూసీ రాష్ట్ర అధ్యక్షులు ఎండీ యూసఫ్‌, హెచ్‌ఎంఎస్‌ రాష్ట్ర ప్రధాన కార్యదర్శి రెబ్బ రామారాలు, సీఐటీయూ రాష్ట్ర ప్రధాన కార్యదర్శి పాలడుగు భాస్కర్‌, కార్యదర్శి జె వెంకటేశ్‌, టీయూసీఐ రాష్ట్ర అధ్యక్షులు కె సూర్యం, ఐఎఫ్‌టీయూ రాష్ట్ర ఉపాధ్యక్షులు జి అనురాధ, బీఆర్‌టీయూ నాయకులు జి రాంబాబు యాదవ్‌, ఏఐయూటీయూసీ రాష్ట్ర ఇన్‌చార్జి భరత్‌తో పాటు ఐఎఫ్‌టీయూ, టీఎన్‌టీయూసీ నేతలు పాల్గొన్నారు.
