స్త్రీల పట్ల చులకన భావం తగదు

ఐద్వా చర్చాగోష్టిలో వక్తలు

నవతెలంగాణ బ్యూరో-హైదరాబాద్‌
సాహిత్యరంగంలో మహిళలను కించపరిచే పదాలు పెరుగుతున్నాయని పలువురు వక్తలు ఆవేదన వ్యక్తం చేశారు. శనివారం హైదరాబాద్‌లోని ఐద్వా రాష్ట్ర కార్యాలయంలో ఆ సంఘం 14వ జాతీయ మహాసభల సందర్భంగా ‘మహిళలు నేటి సవాళ్లు’ అనే అంశంపై చర్చాగోష్టిని నిర్వహించారు. ఈ సందర్భంగా ప్రముఖ రచయిత్రి విజయలక్ష్మి మాట్లాడుతూ సాహితీ రంగంలో మూఢ విశ్వాసాలు పెరిగిపోతున్నాయని తెలిపారు. ఇది భావి తరాలకు మంచిది కాదని చెప్పారు. వాస్తవ పరిస్థితులకు అద్దం పట్టేలా రచనలు ఉండాలన్నారు. సమాజంలో స్రీలు ఎన్నో రకాల సమస్యలను ఎదుర్కొంటున్నారనీ, వాటిని పోరాటాల ద్వారానే పరిష్కరించుకోవాలని సూచించారు. ఐద్వా సీనియర్‌ నాయకురాలు టి జ్యోతి మాట్లాడుతూ వచ్చే ఏడాది జనవరి 25 నుంచి 28 వరకు హైదరాబాద్‌లో జరగనున్న ఐద్వా జాతీయ మహాసభల్లో దేశంలో రాష్ట్రంలో స్త్రీలపై హింస, వివక్ష, పనిప్రదేశాల్లో దాడులు తదితర అంశాలపై చర్చించనున్నట్టు తెలిపారు. పోరాడి సాధించుకున్న హక్కులకు భంగం కలిగే విధంగా కేంద్ర ప్రభుత్వం విధానాలను రూపొందిస్తున్నదనీ, వాటి ఫలితంగా మహిళలకు అందరికంటే ఎక్కువ ఇబ్బందులు ఎదురవుతాయని ఆందోళన వ్యక్తం చేశారు.

మహిళలపై కొత్త రూపాల్లో దాడులు జరుగుతున్నాయని వాపోయారు. రాష్ట్ర అధ్యక్షురాలు అరుణజ్యోతి మాట్లాడుతూ మహిళలు తమ ప్రతిభను చాటుకుంటూ ప్రతి అంశంలో ముందుండాలని చెప్పారు. 80ఏండ్ల స్వాతంత్య్రంలో స్త్రీలు నేటికి అనేక సవాళ్లను ఎదుర్కొంటున్నారని చెప్పారు. రచయితలు కమల, బండారు విజయ, కస్తూరి అలివేని, లలితాచండీ, ఉదయలక్ష్మి, సలీమ, పి. ఎన్‌ మూర్తి మాట్లాడుతూ. సమాజంలో ఆడపిల్ల పట్ల చులకన భావం ఉన్నదని చెప్పారు. అందుకే కడుపులో పెరిగే బిడ్డ అడపిల్ల అని తెలియగానే అబార్షన్లు చేయిస్తున్నారని తెలిపారు. సాంస్కృతిక కాలుష్యం వల్ల ఏడాది పిల్ల నుంచి 70 ఏండ్ల ముసలమ్మ వరకు సమాజంలో రక్షణ లేకుండా పోయిందని వివరించారు. చర్చా గోష్టిలో ఐద్వా రాష్ట్ర సహాయకార్యదర్శి కెఎన్‌. ఆశాలత, సీనియర్‌ జర్నలిస్టు రాజకుమారి, ఐద్వా నాయకులు ఎస్‌. విజయ, రత్న శ్రీ, గాయత్రి, విజయలక్ష్మి, వి. కవిత తదితరులు పాల్గొన్నారు.