సభ సజావుగా సాగేందుకు సహకరించాలి : అఖిలపక్షంతో కేంద్రం
ఓపికగా విన్నారు… కానీ ఏమీ చెప్పలేదు : గౌరవ్‌గోగోయ్
వివిధ అంశాలపై ప్రభుత్వాన్ని నిలదీయనున్న ప్రతిపక్షాలు
నవతెలంగాణ-న్యూఢిల్లీ బ్యూరో
పార్లమెంట్‌ శీతాకాల సమావేశాలు నేటి (సోమవారం) నుంచి ప్రారంభంకానున్నాయి. డిసెంబర్‌ 1 నుంచి 19 వరకు ఈ సమావేశాలు జరుగనున్నాయి. ఢిల్లీలో బాంబు పేలుడు, బీహార్‌ ఎన్నికల ఫలితాల తరువాత మొదటిసారిగా ఉభయసభలు సమావేశం కానున్నాయి. అలాగే రాజ్యసభ సభ చైర్మెన్‌గా తొలిసారి సీపీ రాధాకృష్ణన్‌ సభాధ్యక్షత వహించనున్నారు. కాగా మొత్తం 15 రోజులపాటు జరిగే ఈ సమావేశాలు వాడీవేడిగా కొనసాగే అవకాశాలున్నాయి. పార్లమెంట్‌ ఉభయ సభల్లో కొత్తగా మొత్తం 10 బిల్లులతో సహా నాలుగు ఆర్ధిక సవరణ బిల్లులు, కాలం చెల్లిన మొత్తం 120 చట్టాలను రద్దు చేసే బిల్లు, హౌం, అణుశక్తి, విద్య, రహదారులకు చెందిన మరో ఐదు కీలక బిల్లులను ప్రవేశపెట్టడానికి కేంద్ర ప్రభుత్వం సిద్ధమైంది.
అణుశక్తిని సమర్థవంతంగా వినియోగించుకునేలా చట్టం చేసేందుకు బిల్లును సభ ముందుకు తీసుకురానుంది. అలాగే దేశంలో నేషనల్‌ హైవేలు (జాతీయ రహదారులు) వేగవంతంగా పూర్తయ్యేలా పారదర్శకతో కూడిన భూసేకరణ కోసం కీలకమైన చట్ట సవరణ బిల్లుపై ఆలోచన చేస్తోంది. శాస్త్ర, సాంకేతిక విద్యాసంస్థలు, పరిశోధన రంగం, ఉన్నత విద్యలో అత్యున్నత ప్రమాణాలు నెలకొల్పే లక్ష్యంగా, సమన్వయంతో పనిచేసేందుకు భారత ఉన్నత విద్యా కమిషన్‌ను ఏర్పాటు చేసే దిశలో కీలక బిల్లును తీసుకురానుంది. వీటితో పాటు గత పార్లమెంటు వర్షాకాల సమావేశాల్లో ప్రవేశపెట్టి పార్లమెంట్‌ సెలెక్ట్‌ కమిటీల పరిశీలనకు పంపిన మరో రెండు బిల్లులను కూడా ఈ సమావేశాల్లో ఆమోదించనున్నట్టు తెలిసింది.
సభ సజావుగా సాగేందుకు సహకరించండి
సోమవారం నుంచి పార్లమెంట్‌ శీతాకాల సమావేశాలు జరుగనున్న నేపథ్యంలో కేంద్ర ప్రభుత్వం ఆదివారం పార్లమెంట్‌ హౌస్‌లో అఖిలపక్ష సమావేశం నిర్వహించింది. ఈ సమావేశానికి కేంద్ర ప్రభుత్వం తరపున సీనియర్‌ మంత్రులు రాజ్‌నాథ్‌ సింగ్‌, కిరణ్‌ రిజిజు, జేపీ నడ్డా, పార్లమెంటరీ వ్యవహారాల సహాయ మంత్రి అర్జున్‌ రామ్‌ మేఘ్వాల్‌, కేంద్ర మంత్రి అనూప్రియా పటేల్‌ పాల్గొన్నారు. ప్రతిపక్షం తరపున కాంగ్రెస్‌ నేతలు జైరామ్‌ రమేష్‌, గౌరవ్‌ గొగోరు, ప్రమోద్‌ తివారీ, ఎస్‌పీ ఎంపీ రామ్‌ గోపాల్‌ యాదవ్‌, ఆర్‌జేడీకి చెందిన మనోజ్‌ ఝా, డీఎంకే ఎంపీ తిరుచ్చి శివ, టీఆర్‌ బాలు, టీఎంసీకి చెందిన డెరెక్‌ ఓ’బ్రియన్‌, కళ్యాణ్‌ బెనర్జీ, సీపీఐ(ఎం) ఎంపీ జాన్‌ బ్రిట్టాస్‌, సీపీఐ ఎంపీ సంతోష్‌ కుమార్‌, ఎన్‌సీపీ ఎంపీ ఫౌజియా ఖాన్‌, ఐయుఎంఎల్‌ ఎంపీ ఈటి మొహమ్మద్‌ బషీర్‌, టీడీపీ ఎంపీ లావు శ్రీకృష్ణదేవరాయలు, జనసేన ఎంపీ బాల శౌరి, వైసీపీ ఎంపీ మిథున్‌ రెడ్డి, బీఆర్‌ఎస్‌ ఎంపీ కెేఆర్‌ సురేశ్‌ రెడ్డి, కమల్‌హాసన్‌తో పాటు మొత్తం 36 పార్టీల నుంచి 50 మంది నేతలు పాల్గొన్నారు. దాదాపు రెండున్నర గంటల పాటు సాగిన ఈ భేటీలో పార్లమెంట్‌ ఉభయ సభలు సజావుగా సాగేందుకు సహకరించాలని ప్రతిపక్షాలను కేంద్ర ప్రభుత్వం కోరింది.
సర్‌పై చర్చకు ప్రతిపక్షం పట్టు
ఈ సమావేశంలో ప్రతిపక్షాలు మాత్రం దేశంలోని తాజా పరిస్థితులు, సమస్యలను లేవనెత్తాయి. 12 రాష్ట్రాలు, కేంద్ర పాలిత ప్రాంతాల్లో జరుగుతోన్న స్పెషల్‌ ఇంటెన్సివ్‌ రివిజన్‌( సర్‌)పై చర్చకు పట్టుబట్టాయి. అలాగే జాతీయ భద్రతకు సంబంధించి ఢిల్లీలోని ఎర్ర కోట వద్ద జరిగిన బాంబు పేలుడు ఘటనపై చర్చించాలని డిమాండ్‌ చేశాయి. ప్రభుత్వం ప్రజాస్వామ్యాన్ని అంతం చేయాలని, పార్లమెంటరీ సంప్రదాయాలను సమాధి చేయాలని చూస్తోందని ఈ సందర్భంగా ప్రతిపక్షాలు విమర్శించాయి. అలాగే… పలు పార్టీలు ఆయా రాష్ట్రాలకు సంబంధించిన అంశాలపై సమావేశంలో లేవనెత్తాయి. అయితే… రాజకీయ పార్టీల మధ్య భిన్నాభిప్రాయాలు ఉంటాయని సమావేశం అనంతరం కిరణ్‌ రిజిజు అన్నారు. ”ప్రతిపక్షాలు చర్చల్లో పాల్గొనాలి. సభను ఆటంకపరచవద్దు. ప్రతిపక్షాలు అనేక అంశాలు లేవనెత్తాయి. అందులో సర్‌ ఒకటి. వందేమాతరం 150 ఏండ్ల సందర్భంగా పార్లమెంట్‌లో చర్చపై బీఏసీలో నిర్ణయం తీసుకుంటాం. అఖిల పక్ష సమావేశంలో తమ అభిప్రాయాలు వెల్లడించిన ప్రతిపక్షాలకు ధన్యవాదాలు” ఆయ అని అన్నారు.
ఈ సమావేశం లాంఛనప్రాయమే : జైరాం రమేశ్‌
అఖిల పక్ష సమావేశం కేవలం లాంఛనప్రాయమేనని కాంగ్రెస్‌ ప్రధాన కార్యదర్శి జైరాం రమేశ్‌ అన్నారు. ప్రతిపక్షాలతో ఎలాంటి సంప్రదింపులు జరపకుండానే స్వల్పకాలిక చర్చకు ఒక అంశాన్ని జాబితా చేయడంతో మోడీ ప్రభుత్వం తన ఉద్దేశాలను స్పష్టం చేసిందని పేర్కొన్నారు. ”15 రోజుల ఈ సమావేశాలు పార్లమెంటరీ చరిత్రలో అతి తక్కువ సమయం జరుగుతున్నాయి. మోడీ ప్రభుత్వం 13 బిల్లులను ఆమోదం కోసం జాబితా చేసింది. వీటిలో ఒకటి ఆర్డినెన్స్‌ స్థానంలో వస్తుంది. రెండు లోక్‌సభ కమిటీ నుంచి వస్తాయి. కాబట్టి పది బిల్లులను సంబంధిత స్టాండింగ్‌ కమిటీ పరిశీలనకు అవకాశం లేదు” అని పేర్కొన్నారు. ప్రస్తుతం జాబితా చేయని బిల్లు స్వల్పకాలిక సమావేశాల చివరి భాగంలో అకస్మాత్తుగా ప్రవేశపెట్టబడే అవకాశం ఉందని అన్నారు.
కాంగ్రెస్‌ పార్టీ లోక్‌సభ ఉప నాయకుడు గౌరవ్‌ గొగోయి స్పందిస్తూ రెండు గంటలపాటు ప్రతిపక్షాల డిమాండ్లు విన్నారు కానీ స్పందించలేదని అన్నారు. ప్రధానమంత్రి నరేంద్ర మోడీ నాయకత్వంలోని అధికార పార్టీ ప్రజాస్వామ్యాన్ని అంతం చేయాలని, పార్లమెంట్‌ను పట్టాలు తప్పించి పార్లమెంటరీ సంప్రదాయాలను సమాధి చేయాలని చూస్తోందని విమర్శించారు. ‘ఢిల్లీ పేలుడుపై హౌం వ్యవహారాల శాఖల వైఫల్యాలకు నిదర్శనం” అని అన్నారు. ప్రతిపక్షం కూడా ”ప్రజాస్వామ్య భద్రత”పై చర్చ జరగాలని కోరుకుంటున్నట్టు చెప్పారు. ”ఓటరు జాబితాల భద్రత, ఎన్నికల భద్రతపై చర్చ జరగాలి. ఢిల్లీ వాయు కాలుష్యం, ఆరోగ్య భద్రత తమకు ముఖ్యం” అని అన్నారు.
శీతాకాల సమావేశాల్లో సర్‌పై చర్చ జరగకపోతే పార్లమెంట్‌ను పని చేయనివ్వబోమని ఎస్‌పి ఎంపీ రామ్‌ గోపాల్‌ యాదవ్‌ అన్నారు. టీఎంసీ ఎంపీ కళ్యాణ్‌ బెనర్జీ మాట్లాడుతూ సర్‌, ఉపాధి హామీ వంటి అంశాలను లేవనెత్తామని, కానీ వీటిని చర్చించడానికి ప్రభుత్వం అంగీకరించలేదని అన్నారు. పార్లమెంట్‌ ప్రభుత్వం అనుమతితో మాత్రమే పని చేస్తే, ప్రతిపక్షానికి ఏం విలువ ఉంటుంది?అని అన్నారు. డీఎంకే ఎంపీ తిరుచ్చి శివ మాట్లాడుతూ ప్రభుత్వం 14 బిల్లులను జాబితా చేసిందని, ప్రతిపక్షాలకు ఉమ్మడి సమస్య సర్‌ అని అన్నారు. సీపీఐ ఎంపీ పి.సంతోష్‌ కుమార్‌ మాట్లాడుతూ ఢిల్లీ పేలుడు, జాతీయ భద్రతకు సంబంధించిన అంశాలను లేవనెత్తినట్టు చెప్పారు. సర్‌లో అక్రమాలు, వాయు కాలుష్యం వంటి అంశాలపై చర్చ జరగాలని డిమాండ్‌ చేశారు. కాగా ఏపీ, తెలంగాణ మధ్య నది జలాలు, ఖరీఫ్‌ సీజన్‌కు గాను రాష్ట్ర రైతుల్ని ఆదుకోవాలని డిమాండ్‌ చేసినట్టు బీఆర్‌ఎస్‌ ఎంపీ కెఆర్‌ సురేశ్‌ రెడ్డి వెల్లడించారు.
లేబర్‌ కోడ్లను వెనక్కి తీసుకోవాలి : జాన్‌ బ్రిట్టాస్‌ డిమాండ్‌
లేబర్‌ కోడ్లను వెనక్కి తీసుకోవాలని సీపీఐ(ఎం) నాయకులు జాన్‌ బ్రిట్టాస్‌ డిమాండ్‌ చేశారు. దశాబ్దాల పోరాటంతో దేశంలోని కార్మికవర్గం సాధించుకున్న కార్మిక హక్కులను కేంద్రం హరించిందని విమర్శించారు. దేశవ్యాప్తంగా కార్మికులు, రైతులు నిరసనలు తెలిపారన్నారు. వారు ఐక్యంగా మరిన్ని నిరసనలకు సిద్ధమవుతున్నారని తెలిపారు. ఈ ముఖ్యమైన అంశం పై అత్యవసర చర్చకు ప్రభుత్వం సిద్ధంకావాలని సూచించారు. ఎన్నికల కమిషన్‌ ఏకపక్షంగా సర్‌ ప్రక్రి యను కొనసాగిస్తోందన్నారు. ప్రతిపక్షాలు సమిష్టిగా వ్యతిరేకించిన తరువాత కూడా కమిషన్‌ లొంగడం లేదని, కమిషన్‌ పని పక్షపాతంతో ఉందని పేర్కొ న్నారు.
ప్రజల పౌరసత్వాన్ని ధృవీకరించే అధికారం కమిషన్‌కు లేదని, కమిషన్‌కు పారదర్శకత లేకపోవ డంపై భారీ నిరసన వ్యక్తమవుతోందని అన్నారు. ఈ అంశంపై ప్రత్యేక చర్చ అవసరమని తెలిపారు. పహల్గామ్‌లో ఉగ్రదాడి తరువాత ఢిల్లీ కారుబాంబు పేలుడుకు తీవ్రమైన భద్రతాలోపం దారితీసిందన్నారు. భద్రతను నిర్ధారించడంలో హౌంమంత్రిత్వశాఖ పూర్తిగా విఫలమైందని విమర్శించారు. భద్రతా లోపానికి బాధ్యత వహించి, అది ఎలా జరిగిందో వివరించాలని డిమాండ్‌ చేశారు. అమెరికా అధ్యక్షుడు డొనాల్డ్‌ ట్రంప్‌ భారతదేశాన్ని అవమానించే ప్రకటనలు చేస్తూనే ఉన్నారని, ఆపరేషన్‌ సిందూర్‌ విషయంలో ఏమిజరిగిందో ప్రభుత్వం స్పష్టం చేయాలని డిమాండ్‌ చేశారు. నిరుద్యోగం, మైనారిటీలపై దాడులు వంటి ఇతర ముఖ్యమైన అంశాలపై కూడా చర్చ జరగాలని బ్రిట్టాస్‌ డిమాండ్‌ చేశారు.
