నవతెలంగాణ హైదరాబాద్: హైదరాబాద్ బుక్ ఫెయిర్ లో తెలంగాణ సాహితి లిటరరీ ఫెస్ట్ -2026 పోస్టర్ ను ప్రముఖ సినీ గేయ రచయిత సుద్దాల అశోక్ తేజ, ప్రకృతి కవి జయరాజ్ ఆవిష్కరించారు. ఈ సందర్భంగా తెలంగాణ సాహితి రాష్ట్ర ప్రధాన కార్యదర్శి కె.ఆనందాచారి మాట్లాడుతూ 2026 ఫిబ్రవరి 7,8 తేదీల్లో ఏవి కాలేజీ, హైదరాబాద్ లో తెలంగాణ సాహితి దశాబ్ది సాహిత్యోత్సవాలు జరుగుతున్నట్టు తెలిపారు. అనంతరం సుద్దాల అశోక్ తేజ, జయరాజ్ లు మాట్లాడుతూ ఈ దశాబ్దంలో తెలంగాణ రాష్ట్రంలో వచ్చిన సాహిత్యాన్ని గ్రంథస్థం చేస్థూ తెలంగాణ సాహితి ఒక ప్రత్యేక సంచిక తీసుకురావడం చాలా గొప్ప పని అని అన్నారు. తెలంగాణ సాహిత్య అకాడమీ కార్యదర్శి నామోజు బాలాచారి మాట్లాడుతూ తెలంగాణ సాహితి యువతకు అధిక ప్రాధాన్యత ఇస్తూ కార్యక్రమాలు నిర్వహించడం అభినందనీయమన్నారు. తెలంగాణ సాహితి లిటరరీ ఫెస్ట్ ను విజయవంతం చేయాలని వారు పిలుపునిచ్చారు.
ఈ కార్యక్రమంలో బుక్ ఫెయిర్ అధ్యక్షులు కవి యాకూబ్, కార్యదర్శి ఆర్. వాసు, కేంద్ర సాహిత్య అకాడెమీ యువ పురస్కార గ్రహీతలు మోర్సీమార్గరెట్, తగుళ్ల గోపాల్, తెలంగాణ సాహితి నాయకులు అనంతోజు మోహన్ కృష్ణ, ఏబూషీ నర్సింహ, శరత్ సుదర్శి, యువ కవులు, రచయితలు తండ హరీష్ గౌడ్, బండారు రాజ్ కుమార్, శ్రీనివాస్ గౌడ్, పేర్ల రాము, రూప్ కుమార్ డబ్బీకర్ తదితరులు పాల్గొన్నారు.
