ఇలా స్టోర్ చేద్దాం…

పచ్చిమిరపకాయలను తాజాగా ఉంచడం చాలా మందికి పెద్ద సమస్యగా మారు తుంది. అధిక ఉష్ణోగ్రతలు, లేదా ఎక్కువ తేమ వల్ల మిరపకాయలు త్వరగా మెత్తబడటం, బూజు పట్టడం లేదా కుళ్లిపోవడం జరుగుతుంది. అయితే కొన్ని సులభమైన చిట్కాలను పాటిస్తే పచ్చిమిరపకాయలను నెలల తరబడి తాజాగా నిల్వ చేసుకోవచ్చు.
భారతీయ వంటకాల్లో పచ్చిమిరపకాయలకు ప్రత్యేక స్థానం ఉంది. కూరలు, పప్పులు, చట్నీలు, ఊరగాయలు ఇలా దాదాపు ప్రతి వంటకంలో వాటిని ఉపయోగిస్తారు. అందుకే అవి ఎప్పుడూ తాజాగా ఉండటం అవసరం. సరైన పద్ధతిలో నిల్వ చేస్తే మిరపకాయల కారం, రంగు, రుచి కూడా అలాగే ఉంటాయి.
నిల్వ చేసే పద్ధతి..
మిరపకాయలను ఎక్కువకాలం నిల్వ చేయాలంటే ముందుగా వాటి కాడలను తొలగించాలి. కాడల వద్ద తేమ, బ్యాక్టీరియా త్వరగా చేరుతాయి. దీంతో మిరపకాయలు వేగంగా పాడవుతాయి. కాబట్టి కాడలను తొలగించడం మొదటి ముఖ్యమైన దశ.
ఆ తర్వాత ఒక గిన్నె నీటిలో కొద్దిగా పసుపు కలిపి, అందులో మిరపకాయలను రెండు నుంచి మూడు నిమిషాల పాటు కడగాలి. పసుపులో ఉండే సహజ యాంటీబ్యాక్టీరియల్ గుణాలు వీటిపై ఉండే సూక్ష్మక్రిములను తగ్గించి, వాటి నిల్వ కాలాన్ని పెంచుతాయి.
కడిగిన తర్వాత మిరపకాయలను పూర్తిగా ఆరబెట్టడం చాలా ముఖ్యం. ఒక శుభ్రమైన గుడ్డ లేదా టిష్యూపై పరచి తేమ పూర్తిగా పోయే వరకు ఉంచాలి. కొద్దిపాటి తేమ కూడా మిగిలి ఉంటే మిరపకాయలు త్వరగా బూజు పట్టే ప్రమాదం ఉంటుంది. ఆరిన మిరపకాయలను గాలి చొరబడని బ్యాగ్ లేదా వాక్యూమ్ బ్యాగ్‌లో నిల్వ చేయాలి.
వాటితో పాటు ఒకటి లేదా రెండు వెల్లుల్లి రెబ్బలను కూడా వేయడం మంచిది. వెల్లుల్లిలోని సహజ గుణాలు బ్యాక్టీరియా పెరుగుదలను తగ్గించడంలో సహాయపడతాయి. తర్వాత ఆ బ్యాగ్‌ను ఫ్రిజ్‌లో లేదా ఎక్కువకాలం నిల్వ చేయాలనుకుంటే ఫ్రీజర్‌లో ఉంచాలి.
ఇలా చేస్తే మిరపకాయలు చాలా కాలం తాజాగా ఉంటాయి. వాటికి దుర్వాసన రాదు, మెత్తబడవు. ముఖ్యంగా వాటి సహజ కారం, రుచి, రంగు అలాగే ఉంటాయి. అవసరమైనప్పుడు ఫ్రీజర్ నుంచి తీసి నేరుగా వంటల్లో ఉపయోగించుకోవచ్చు.