విశ్వగురు

పుష్పకుమార్‌ పొద్దున్నే కాలకత్యాలు తీర్చుకుని, ఫోను పట్టుకుని సోఫాలో కూర్చున్నాడు! అట్లా కూర్చోగానే ఇట్లా ఛాయి తీసుకుని శ్రీమతి వచ్చేది! కాని అరగంటైనా శ్రీమతి రాలేదు!
”ఏమోరు! ఈ రోజు ఛాయి వస్తదా? లేదా?” విసుగ్గా అడిగాడు పుష్పకుమార్‌.
”పాలు లేవు! వెళ్లి పాలు తీసుకురండి!” అంతే విసుగ్గా వచ్చింది జవాబు! వంటగది నుండి.
చేసేది లేక పాల కేంద్రానికి వెళ్లి లీటర్‌ పాలు తీసుకుని రూ.76 గూగుల్‌ పే చేశాడు పుష్పకుమార్‌.
”సార్‌ ఇంకా నాలుగు రూపాయలు వేయండి!” అన్నాడు పాలవాడు
”ఎందుకు! లీటర్‌ 76 రూ.కదా! ” అన్నాడు. చిరాగ్గా పుష్పకుమార్‌,
”అది నిన్నటిదాకా! ఇరాన్‌ యుద్ధం కదా, ధర పెరిగింది సార్‌!’ నవ్వుతూ అన్నాడు పాలవాడు.
వాడి నవ్వు చూసి కోపం వచ్చినా, నాలుగు రూ|| వేయక తప్పలేదు పుష్పకుమార్‌కి.
ఇంటికి రాగానే కొడుకు రెడీగా ఉన్నాడు. ఒంటిపూట బడి ప్రారంభమైంది. వాడిని బండి మీద స్కూల్లో దించి రావాలి మరి! చిరాకు పడుతూనే కొడుకునే స్కూల్లో దించి ఇంటికి మళ్లాడు.

దారిలోనే ఉన్నట్టుండి బండి ఆగిపోయింది! అటూ ఇటూ చూస్తే బండిలో పెట్రోల్‌ అయిపోయిందని తెలిసింది! తప్పనిసరై బైకుని నెట్టుకుంటూ దగ్గర్లోని పెట్రోలు బంక్‌ వైపు వెళ్లాడు. కాని కిలోమీటర్‌కి ముందే ఆగిపోవాల్సి వచ్చింది. పుష్పకుమార్‌ కన్నా సీనియర్లు బండ్లు పెట్టుకుని నిలబడ్డ క్యూలైన్‌ పుష్పకుమార్‌ వంతు ముప్పావు గంటకి వచ్చింది! పంపు వద్ద పెట్రోలు కోట్టేవాడు ముస్లిం! తన సిద్ధాంతం ప్రకారం హిందువు దగ్గరే పెట్రోల్‌ కొట్టించుకోవాలంటే పక్క పంపు వద్దకు వెళ్లాలి! వెళితే మరో కిలో మీటర్‌ క్యూలో నిలబడాలి! అంత ఓపిక లేక సిద్ధాంతంతో రాజీపడ్డాడు పుష్పకుమార్‌.
”బండిలో పెట్రోల్‌ కొడుతుంటే మీరంతా ఇంతే, పెట్రోల్‌ సప్లై ఉన్నా సరే, కావాలని ఇట్లా చేస్తున్నారు!” అన్నాడు పుష్పకుమార్‌ .
”మాదేముంది సాబ్‌ ! ఇరాన్‌ యుద్ధం కదా!” అన్నాడు డెలివరి బారు.
”అవును ఈ యుద్ధంలో మా ట్రంప్‌ మిమ్మల్ని ఓడించిన తర్వాత తెలుస్తుంది!” అన్నాడు పుష్పకుమార్‌.
”చాల్లే వయ్యా! మీ ట్రంప్‌ వల్లే మనకీ గతి పట్టింది! ముందు పక్కకి జరుగు!” కరుమన్నాడు వెనకుండి ఓనర్‌.
మొత్తానికి ఇంటికి చేరుకున్నాడు పుష్పకుమార్‌.
”యుద్ధం పేరు చెప్పి అందరూ ధరలు పెంచారు! ఎవరికి వారు లాభం చూసు కుంటున్నారు! ఇంకా నయం! మన విశ్వగురు అధికారంలో ఉన్నాడు కాబట్టి సరిపోయింది! లేకపోతే భారతదేశం ఆగమై పోయేది!” అన్నాడు పుష్పకుమార్‌.
”ఇప్పుడు ఆగం కాలేదనుకుంటున్నారా! మీ విశ్వగురు నిర్వాకం వల్లే పాలధరలు పెరిగాయి. పెట్రోల్‌ దొరకటం లేదు!” అన్నది శ్రీమతి.
”నీకేం తెలుసు మా విశ్వగురు గొప్పతనం! ఆయన ఉన్నాడు కాబట్టే, మనకు ఇరాన్‌ చమురు సప్లై చేస్తోంది! కొన్ని దేశాలకు పూర్తిగా బంద్‌ చేసింది! అంతే కాదు! ఇంత యుద్ధంలో కూడా రష్యా వద్ద నెల రోజుల పాటు చమురు కొనుక్కోమని మన విశ్వగురుకి ట్రంప్‌ చెప్పాడు! మనవిశ్వగురు అంటే ట్రంప్‌కి ఎంత అభిమానమో తెలుసుకో!” అన్నాడు గొప్పగా పుష్పకుమార్‌.
కిలకిలా నవ్వింది! శ్రీమతి.

”రష్యా, ఇరాన్‌లతో మన దేశానికి చాలకాలం నుంచి స్నేహం ఉన్నది! కాశ్మీర్‌ మనదే అని చెప్పింది ఈ రెండు దేశాలే! అమెరికా ఇప్పటివరకూ కాశ్మీర్‌ మనదేనని చెప్పలేదు! అయినా ట్రంప్‌ మీకు ఆరాధ్యుడు! రష్యా, ఇరాన్‌ దేశాలు మన రూపాయలకే చమురు సరఫరా చేస్తుంటే ట్రంపే అడ్డంపడి, వారి వద్ద చమురు కొనకుండా చేశాడు! అయినా మన విశ్వగురు కిమ్మనలేదు! మన దేశ ప్రయోజనాల రీత్యా అమెరికాను ఎదురించి, చమురు కొనుగోలు చేసి ఉండాల్సింది! ఇప్పుడు నెలరోజులు కొనుక్కోండి అనగానే ఘన విజయమంటూ గంతులు వేస్తున్నారు!” అన్నది శ్రీమతి.
”అమెరికా ఎంత బలమైన దేశమో నీకు తెలియదు!” అన్నాడు పుష్పకుమార్‌.
”మన దేశానికి నష్టం చేసేవాడు ఎంత బలవంతుడైనా సరే ఎదురించాలి! అది విశ్వగురు లక్షణం! ఆనాడు ఇందిరాగాంధీ అమెరికా ఎదురించింది! నిన్న శ్రీలంక కూడా అమెరికాకు సహకరించం అని తెగేసి చెప్పింది! మనతో పోల్చుకుంటే శ్రీలంక శక్తి ఎంత? మన ఆహ్వానంపై విశాఖ పట్టణానికి వచ్చి నౌకా విన్యాసాలలో పాల్గొని తిరిగి వెళుతున్న ఇరాన్‌ నౌకను అమెరికా పేల్చివేస్తే కనీసం ఖండించలేకపోయారు! అతిథి పట్ల కనీస మర్యాద కూడా మీ విశ్వగురు పాటించలేదు! దీనికి మీరైనా సిగ్గుపడండి!” అన్నది శ్రీమతి.
”ఉక్రెయిన్‌- రష్యా యుద్దాన్ని జస్ట్‌ ఒక్క ఫోన్‌కాల్‌తో ఆపించి, మన భారతీయులను విమానం ఇంటికి చేర్చిన యోధ మన విశ్వగురు అది తెలుసుకో!” అన్నాడు పుష్పకుమార్‌

మరోసారి నవ్వింది శ్రీమతి.
”ఆపండి, మీ జానపద కళలు! మీరు చెప్పింది నిజమే అయితే గల్ఫ్‌లో మన భారతీయులు దాదాపు కోటిమంది ఉన్నారు! వారి క్షేమం కోసం యుద్ధం ఆపించమనండి! ట్రంప్‌ జిగ్నీ దోస్తు కదా!” అన్నది శ్రీమతి.
”నువ్వు ఇలాగే అంటూ ఉండు! ఎప్పటికైనా ఈ యుద్ధాన్ని ఆపేది మన విశ్వగురు మాత్రమే!” అన్నాడు నమ్మకంగా పుష్పకుమార్‌.
ఈసారి పగలబడి నవ్వింది శ్రీమతి.
”అయ్యో! పాపం, మీరు వాట్సప్‌ మాత్రమే చూస్తారు! అప్పుడప్పుడు టీవీ కూడా చూడండి!” అంటూ టీవీ ఆన్‌ చేసింది!
”అమెరికా ఇరాక్‌ మధ్య చర్చలకు పాకిస్తాన్‌ రాజధాని ఇస్లామాబాద్‌ వేదిక” అంటూ టీవీలో బ్రేకింగ్‌ న్యూస్‌ వస్తోంది.
అది చూసి పుష్పకుమార్‌ గుండె పట్టుకున్నాడు!
”విశ్వగురు అంటూ మీ డప్పు మీరు కొట్టుకుంటున్నారు గాని, ప్రపంచదేశాలు దేకటం లేదు! అంతేకాదు! మీరు యజ్ఞయాగాదులు చేసి గెలిపించిన ట్రంప్‌ కూడా విశ్వగురులా కాదు కదా! ఒక దేశాధినేతలా చూడటం లేదని గుర్తించండి! మనదేశం ఆండ అంటే ఆయనకు చులకన. తాను చెప్పినట్లు ఆటాడే ఒక ఆటబొమ్మ! ట్రంప్‌ ‘కీ’ ఇస్తుంటే మనం పల్టీలు కొట్టాలన్నమాట! ఇరాన్‌ నుండి చమురు, గ్యాస్‌ వస్తుంటే మీరు గొప్పలు చెప్పకుంటున్నారు ! గాని మనదేశ ప్రజలు తమ దేశానికి స్నేహితులు అన్ని ఇండియాకు ఓడలను పంపిస్తు న్నామని ఇరాక్‌ చెప్పింది! అంటే ఇర్విగురు వల్ల ఓడలు రాలేదన్న మాట!” అన్నది శ్రీమతి
పుష్పకుమార్‌కు గొంతు ఎండి పోయింది! ఛారు కావాలని సైగ చేశాడు!
”అన్నట్లు చెప్పడం మర్చిపోయాను. సిలిండర్‌ ఖాళీ అయ్యింది! మొన్ననే బుక్‌ చేశాను! ఇంకో పది రోజులకి గ్యాస్‌ సిలిండర్‌ వస్తుందట! కట్టెల మండికి వెళ్లి ఎండిన కట్టెలు తీసుకురండి!” అన్నది శ్రీమతి.
పుష్పకుమార్‌ స్పృహ తప్పి పడిపోయాడు.
– ఉషాకిరణ్‌