చీకటి బావి

​ఆ ఉప్పు నీటి చీకటి బావి
ఎన్ని కండేల లోతో అంతుతెల్వదు!
​లోతులోంచి పైకి లాగుతానని
ఏదో అవకాశాల తాడును విసురుతుంది
ఒక మాయా చేయి!
​చీకట్లో
కంటిని ఊరించే వెలుగులా
వెండితెర మీద జిగేల్ మనే జిందగీలా…
ఆశల పూలగుత్తిలా
ఆ తాడు మెత్తగా చేతికి అందుతుంది !
రంగు రంగుల కలలు కండ్లలో మెరిసే క్షణాలవి!
​ఆశలన్నీ గాలిలో వదిలిన బుడగల్లా,
పిసరంత నిజాన్ని తాకకముందే పేలిపోతాయనీ
ఎగరేసిన చేతులకేం తెలుసు!
గగుర్పాటు కొండచిలువ ఒకటి
ఒళ్ళంతా చుట్టుకునేదాకా…
ఏది తాడో, ఏది పామో నమ్మిన
అమాయక ఆశలకేం తెలుసు!?
​మనసు
ఎడారిలో ఒంటరి ఒంటే అయినప్పుడు…
వర్చువల్ ఒయాసిస్ ఒకటి,
స్వచ్ఛ కొలనులో స్వేచ్ఛ నీళ్లు తాగిస్తానని నమ్మిస్తుంది!
​దగ్గరకెళ్ళినంక మెత్తని ఇసుకే మింగేస్తదని,
ఊబిలోకి లాక్కుంటుందని ఏం తెలుసు!
​ఆశల రైలెక్కించి
కొత్త బంగారు లోకమంటూ నరకకూపంలోకి
అక్రమ రవాణా చేసి,
ఒక్కొక్క అంగంతో ఒక్కో వ్యాపారం చేసే
అమానుష చీకటి మార్కెట్ అది!
​సొంత పేర్లను చెరిపేసి
బతుకును అనామిక కథగా మార్చే మాఫియా!
​కలలన్నీ కరిగిపోయిన కళ్లు…
నలిగిపోయిన పువ్వులు,
చిరునవ్వులు చీలిపోయిన పెదాల మీద
రక్తపు లిప్‌స్టిక్ పూతలు!
శరీరాలు గాయాల పంటచేన్లు…
మనసు మూలమూలలా
తిరిగి వెళ్ళలేని తలుపుల్ని బాదుతున్న కేకలు!
​మనిషి – అక్కడ కేవలం ఒక ఆటబొమ్మ!
చేతులు మారుతున్న కరెన్సీ నోటు!
గుండె గోడును మింగేసే గోడలమీద
బ్రహ్మజెముడు ముళ్ల వికృత సంచారం!
​జీవితం ఒక వస్తువులాగా
తూకం వేయబడుతూ
ఎప్పటికో…
దిక్కులేని చీము నెత్తురుల నదిలా
చీకటి సముద్రంలో కలిసిపోతుంది!
​ఏ మారుమూలలోనో…
పేదరికం బావిలా మళ్లీ తెరుచుకుంటది
దాని లోతు మరొకరి బలిని సిద్ధం చేస్తూ ఉంటది…
అవకాశాల తాడు మళ్లీ విసరబడుతుంది
మరొక ఆశల చేయి కోసం!
రహీమొద్దీన్, 9010851085