వరంగల్‌, నల్లగొండలో ఇంక్యూబేషన్‌ కేంద్రాలు

‘టీ-హబ్‌’ తరహాలో ఏర్పాటు, కొత్త ఆలోచనలకు ప్రోత్సాహం : మంత్రులు శ్రీధర్‌బాబు, కోమటి రెడ్డి వెంకటరెడ్డి
నవతెలంగాణ బ్యూరో – హైదరాబాద్‌
వరంగల్‌, నల్లగొండలోనూ టీ-హబ్‌ తరహాలో ఇంక్యూబేషన్‌ కేంద్రాలను ఏర్పాటు చేయబోతున్నట్టు రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌ బాబు, రోడ్లు భవనాల శాఖ మంత్రి కోమటిరెడ్డి వెంకటరెడ్డి వెల్లడించారు. ఇందుకు సంబంధించి త్వరలోనే కాకతీయ, మహాత్మాగాంధీ విశ్వ విద్యాలయాలతో ఎంవోయూ కుదుర్చుకోనున్నట్టు వివరించారు. హైదరాబాద్‌లోని నాంపల్లి ఎగ్జిబిషన్‌ గ్రౌండ్‌లో రెండ్రోజుల పాటు నిర్వహించనున్న ‘కాకతీయ యూనివర్సిటీ ఫార్మా అలుమ్ని’ గోల్డెన్‌ జూబ్లీ వేడుకలను శనివారం ప్రారంభించారు. ఈ సందర్భంగాగా ఆయన మాట్లాడుతూ సైన్స్‌కు మానవత్వాన్ని జోడిస్తే ప్రతి ఆవిష్కరణ సమాజహితానికి బాటలు వేస్తుందని అభిప్రాయపడ్డారు. తెలంగాణను గ్లోబల్‌ ఫార్మా, లైఫ్‌ సైన్సెస్‌ హబ్‌ గా మాత్రమే కాకుండా ‘ఫార్మసీ ఆఫ్‌ పర్పస్‌’గానూ మార్చాలన్నదే తమ ప్రభుత్వ సంకల్పమన్నారు.

రీసెర్చ్‌ను మార్కెట్‌కు, పాలసీని రోగికి అనుసంధానించే సమగ్రమైన 360 డిగ్రీల ఎకో సిస్టమ్‌ను అభివృద్ధి చేస్తున్నామన్నారు. 18 నెలల్లోనే లైఫ్‌ సైన్సెస్‌ రంగంలో కొత్తగా రూ.54వేల కోట్ల పెట్టుబడులను రాష్ట్రానికి తీసుకొచ్చామన్నారు. ఎలీ లిల్లీ లాంటి అంతర్జాతీయ ఫార్మా దిగ్గజ కంపెనీలను తెలంగాణకు తీసుకొచ్చి, ఇక్కడి యువతకు ఉద్యోగాలు కల్పించేందుకు తమ ప్రభుత్వం చిత్తశుద్ధితో కృషి చేస్తుందన్నారు.డాక్టర్ల కంటే వేగంగా రోగాలను నిర్థారించినా, అనుభూతి చెందే మనసును మాత్రం ఏ యంత్రం భర్తీ చేయలేదన్నారు. దేశంలో తమ అనుభవాన్ని ‘నాలెడ్జ్‌ ఇన్వెస్ట్‌ మెంట్‌’గా పెట్టేందుకు ముందుకు రావాలని ప్రవాసీ భారతీయ నిపుణులకు విజ్ఞప్తి చేశారు. పేటెంట్లను కాకుండా మీ ఆవిష్కరణ వల్ల ఎంత మందికి మేలు జరిగిందన్నదే చరిత్ర గుర్తుంచుకుంటుందని యువ ఇన్నోవేటర్స్‌ కు దిశా నిర్దేశం చేశారు. ఈ కార్యక్రమంలో కాకతీయ యూనివర్సిటీ వీసీ ప్రొఫెసర్‌ కె.ప్రతాప్‌ రెడ్డి, డా.బి.ప్రభా శంకర్‌, రాంప్రసాద్‌ రెడ్డి, ప్రద్యుమ్న, డా.తామర విజయ్ కుమార్‌, ప్రొఫెసర్‌ భాస్కర్‌ ఆర్‌.జాస్తి, రాజేశ్వర్‌ తోట, ప్రొఫెసర్‌ జె. కృష్ణవేణి తదితరులు పాల్గొన్నారు.