గురువులను సన్మానించి పాత జ్ఞాపకాలను నెమరువేసుకున్న విద్యార్థులు
నవతెలంగాణ – చిల్పూర్
చిల్పూర్ మండలంలోని పల్లగుట్ట గ్రామ జడ్పీహెచ్ఎస్ పాఠశాలలో 2006–07 విద్యా సంవత్సరంలో పదో తరగతి పూర్తి చేసిన పూర్వ విద్యార్థులు ఆదివారం ఘనంగా ఆత్మీయ సమ్మేళన కార్యక్రమాన్ని నిర్వహించారు. దాదాపు రెండు దశాబ్దాల తర్వాత ఒకేచోట కలుసుకున్న పూర్వ విద్యార్థులు తమ చిన్ననాటి మధుర జ్ఞాపకాలను గుర్తుచేసుకుంటూ ఆనందాన్ని పంచుకున్నారు. ఈ కార్యక్రమంలో వారికి విద్యాబుద్ధులు నేర్పించిన ఉపాధ్యాయులు పాల్గొనగా, పూర్వ విద్యార్థులు గురువులకు పాదాభివందనం చేసి శాలువాలు, స్మారక చిహ్నాలతో ఘనంగా సన్మానించారు. తమ జీవితాల్లో ఉన్నత స్థానాలకు చేరుకోవడానికి ఉపాధ్యాయుల ప్రోత్సాహం, మార్గదర్శకత్వమే కారణమని వారు కృతజ్ఞతాభావంతో పేర్కొన్నారు.పూర్వ విద్యార్థులు మాట్లాడుతూ పాఠశాల రోజులు జీవితంలో మరచిపోలేని మధురస్మృతులని, విద్యతో పాటు క్రమశిక్షణ, విలువలను నేర్పిన గురువులను ఎప్పటికీ మరువలేమని అన్నారు.
ప్రస్తుతం వివిధ రంగాల్లో స్థిరపడిన తమ సహచరులను ఒకే వేదికపై కలుసుకోవడం ఎంతో ఆనందంగా ఉందని తెలిపారు. ఉపాధ్యాయులు మాట్లాడుతూ తమ శిష్యులు వివిధ రంగాల్లో ఉన్నత స్థాయికి చేరుకోవడం ఎంతో గర్వకారణమని, వారి విజయాలు తమకు గొప్ప సంతృప్తిని కలిగిస్తున్నాయని అన్నారు. విద్యార్థుల ప్రేమాభిమానాలకు కృతజ్ఞతలు తెలియజేస్తూ, సమాజానికి ఉపయోగపడే విధంగా మరింత ముందుకు సాగాలని ఆకాంక్షించారు. అనంతరం సాంస్కృతిక కార్యక్రమాలు, జ్ఞాపకాల పంచుకోలు, పరస్పర అభినందనలతో కార్యక్రమం ఉత్సాహభరితంగా సాగింది. ఈ ఆత్మీయ సమ్మేళనం పూర్వ విద్యార్థుల మధ్య స్నేహబంధాలను మరింత బలోపేతం చేసింది. కార్యక్రమంలో ఉపాధ్యాయులు సత్యప్రకాశ్, రమేష్, రంజిత్, వెంకట్రెడ్డి, జేవీఆర్ ఫ్రాన్సిస్, విజయరాణి తదితరులు పాల్గొన్నారు. పూర్వ విద్యార్థులు మాచర్ల రాజు, దార రమేష్, సతీష్, మధు, రంజిత్ తదితరులు పాల్గొన్నారు.
