ఫిల్మ్‌నగర్‌ కల్చరల్‌ సెంటర్‌లో నూతన సంవత్సరం వేడుకలు ఘనంగా నిర్వహించారు. డిసెంబర్‌ 31 రాత్రి ఏర్పాటు చేసిన ఈ వేడుకలో ఇన్‌ఫ్యూజన్‌ బ్యాండ్‌ ఏర్పాటు చేసిన సంగీత విభావరి, బెల్లీ డాన్స్‌, 30 మంది ముంబై యువకులు చేసిన ఎరోబిక్స్‌ డాన్స్‌, జోడీ డాన్స్‌ ఆహుతులను విశేషంగా అలరించాయి. ఈ కార్యక్రమంలో సినీ, రాజకీయ నాయకులు పాల్గొని 2023 సంవత్సరానికి వీడ్కోలు పలుకుతూ, నూతన సంవత్సరానికి ఆహ్వానం పలికారు. ఈ సందర్భంగా ఎఫ్‌ఎన్‌సీసీ సెక్రటరీ, నిర్మాత మోహన్‌ ముళ్ళపూడి మాట్లాడుతూ, ”గతంలో ఉన్న కమిటీ ఫిలిం నగర్‌ కల్చరల్‌ సెంటర్ను ఎంతో అభివద్ధి చేసింది. మేము కూడా అదే దిశగా ముందుకు తీసుకెళతాం. దక్షిణాదిలో నంబర్‌ వన్‌ కల్చరల్‌ సెంటర్‌గా తీర్చిదిద్దుతాం’ అని చెప్పారు. ఈ వేడుకలో ఎఫ్‌ ఎన్‌ సీ సీ ప్రెసిడెంట్‌ జి. ఆదిశేషగిరిరావు, వైస్‌ ప్రెసిడెంట్‌ తుమ్మల రంగారావు, జాయింట్‌ సెక్రటరీ పెద్దిరాజు, ట్రెజరర్‌ బి రాజశేఖరరెడ్డి, కమిటీ సభ్యులు కాజా సూర్యనారాయణ, కె మురళీమోహన్‌ , శైలజా జుజల, బాలరాజు, గోపాలరావు, ఏడిద రాజా, మోహన్‌ వడ్లపట్ల, ఇంద్రపాల్‌రెడ్డి, వరప్రసాదరావు తదితరులు పాల్గొన్నారు.
