చైనా, అమెరికా మధ్య సంఘర్షణ, ఘర్షణలు వద్దు

వ్యూహాత్మక స్థిరత్వం కోసం కలిసి పనిచేద్దాం : చైనా అధ్యక్షుడు షీ జిన్‌పింగ్ పిలుపు
​వాషింగ్టన్ : ‘చైనా-అమెరికా సంబంధాలనే మహానౌకను స్థిరమైన మార్గంలో నడిపించాలి’ అని చైనా అధ్యక్షుడు షీ జిన్‌‌పింగ్‌ వాషింగ్టన్, బీజింగ్‌లకు పిలుపు‌నిచ్చారు. గురువారం వైట్ హౌస్‌లో ఆయన విస్తృత ప్రసంగం చేశారు. అమెరికా అధ్యక్షుడు డోనాల్డ్ ట్రంప్‌తో కలిసి ఆర్టిఫిషియల్ ఇంటెలిజెన్స్‌ను సంయుక్తంగా నిర్వహించాలని, ఇందుకు ఆరోగ్యకరమైన పోటీ, పరస్పర విశ్వాసం అవసరమని కోరారు. సాంకేతిక నియంత్రణలు, వాణిజ్య సుంకాలు, ప్రాంతీయ భద్రత వంటి సంక్లిష్టమైన భౌగోళిక రాజకీయ ఉద్రిక్తతల నేపథ్యంలో ఈ ద్వైపాక్షిక భాగస్వామ్యాన్ని కేవలం జాతీయ ప్రయోజనాలకు సంబంధించిన విషయంగా మాత్రమే కాకుండా, అంతర్జాతీయ స్థిరత్వానికి ఒక అనివార్యమైన స్తంభంగా షీ జిన్‌‌పింగ్‌ అభివర్ణించారు. మరోపక్క వాషింగ్టన్ , బీజింగ్ తమ ద్వైపాక్షిక వాణిజ్య సంధిని మరో రెండు నెలల పాటు పొడిగించడానికి అంగీకరించాయి. దీంతో తుది గడువు నవంబర్ 10, 2026 నుంచి జనవరి 10, 2027కి మారింది. అమెరికా స్వాతంత్ర్య 250వ వార్షికోత్సవం సందర్భంగా చైనా తరపున శుభాకాంక్షలు తెలుపుతూ షీ జిన్‌‌పింగ్‌ తన ప్రసంగాన్ని ప్రారంభించారు. ‘‘వాషింగ్టన్, బీజింగ్‌లు తీసుకున్న చారిత్రక నిర్ణయాలు రాబోయే దశాబ్దాల పాటు ప్రపంచ అభివృద్ధిని తీర్చిదిద్దుతాయి’’ అని పౌరులను ఉద్దేశించి అన్నారు. ‘‘చైనా, అమెరికా రెండూ గొప్ప దేశాలు.

ఇక్కడి ప్రజలూ గొప్ప వారే. మన స్నేహాన్ని కొనసాగించడానికి, సహకారాన్ని విస్తరించడానికి, మన రెండు దేశాల ప్రజల శ్రేయస్సును ప్రోత్సహించడానికి అధ్యక్షుడు ట్రంప్ ఆహ్వానం మేరకు నేను అమెరికా సందర్శిస్తున్నాను’’ అని అన్నారు. ‘‘మనం సంభాషణలను బలోపేతం చేసుకోవాలి. చైనా, అమెరికా దేశాల పరిస్థితులు భిన్నంగా ఉన్నప్పటికీ, నిష్కపటమైన, లోతైన, నిరంతర సంభాషణల ద్వారా ఒకరినొకరు బాగా అర్థం చేసుకోగలవు. విభేదాలను పక్కనపెట్టి ఉమ్మడి అంశాలను వెతుక్కోగలవు, పరస్పర విశ్వాసాన్ని పెంపొందించుకోగలవు. అధ్యక్షుడు ట్రంప్‌నకు, నాకు ఒకరిపై ఒకరికి గౌరవం ఉంది. మేము వ్యక్తిగత సత్సంబంధాలను పెంచుకుని, సంప్రదింపులు కొనసాగిస్తున్నాం. సంబంధాలను బలోపేతం చేసుకునేందుకు మా ప్రభుత్వ విభాగాలు కూడా ముందుకు రావాలని ప్రోత్సహిస్తున్నాము. మార్పిడులను పెంచడంలో మేము మా శాసనసభలకు మద్దతు ఇస్తాము’’ అని అన్నారు. వాణిజ్యం, సాంకేతికత , ప్రాంతీయ భద్రత వంటి రంగాలలో నెలకొన్న సంక్లిష్టమైన భౌగోళిక రాజకీయ ఉద్రిక్తతలను ప్రస్తావిస్తూ… జీరో-సమ్ పోటీని నివారించాల్సిన చారిత్రక బాధ్యత వాషింగ్టన్ , బీజింగ్‌లపై ఉందని షీ జిన్‌‌పింగ్‌ వాదించారు.

ఈ ఏడాది ప్రారంభంలో అధ్యక్షుడు ట్రంప్ బీజింగ్ పర్యటన సందర్భంగా నెలకొన్న నిర్మాణాత్మక పురోగతిని ఆయన ప్రస్తావించారు. ఒక స్థిరపడిన శక్తికి, ఎదుగుతున్న శక్తికి మధ్య అనివార్యంగా సంఘర్షణ తప్పదనే భావనను షీ తిరస్కరించారు. దీర్ఘకాలిక శాంతిని నిర్ధారించడానికి, ఆరోగ్యకరమైన, పరిమితమైన పోటీకి, బలమైన సైనిక సంక్షోభ నివారణ యంత్రాంగాలకు, బహిరంగ దౌత్య మార్గాలకు ఆయన పిలుపునిచ్చారు. ‘‘నేను చాలాసార్లు చెప్పినట్లుగా, చైనా , యునైటెడ్ స్టేట్స్, రెండు ప్రధాన దేశాలుగా, సహకారం వల్ల లాభపడతాయి, ఘర్షణలో రెండూ నష్టపోతాయి. మనం పోటీ గురించి ప్రస్తావించకుండా ఉండాల్సిన అవసరం లేదు, కానీ మన పోటీ ఆరోగ్యకరమైనదిగా ఉండాలి . పరిమితుల్లోనే ఉండాలి. అది ఒకరిని ఒకరు అందుకోవడానికి చేసే పరుగు పందెంలా ఉండాలి, అంతేగానీ ఒకరు గెలుస్తారో ఓడిపోతారో తేల్చే కుస్తీలా ఉండకూడదు’’ అని షీ పేర్కొన్నారు. ‘‘చైనా , యునైటెడ్ స్టేట్స్ మన మధ్య ఎలాంటి సంఘర్షణ, ఘర్షణ ఉండకూడదనే గీతను తప్పక పాటించాలి. మన రెండు దేశాల సైన్యాలు క్రమం తప్పకుండా సంప్రదింపులు జరుపుకోవాలి. సంక్షోభ సమాచార ప్రసారం, నివారణ కోసం యంత్రాంగాలను మెరుగుపరచుకోవాలి’’ అని ఆయన అన్నారు.