దేశభక్తి అనేది కేవలం జాతీయ పండుగల రోజుల్లో నినదించే నినాదం కాదు.. మనసులో గౌరవం, సమాజం పట్ల బాధ్యత, ఇతరులకు ఉపయోగపడా లనే తపనగా ఆచరణలో కనిపించాలి. అలాంటి దేశభక్తి, సేవాభావం, కళాత్మకత కలగలిసిన వ్యక్తిత్వా నికి ప్రతిరూపంగా నిలుస్తున్నారు బొబ్బిలి సరోజినీ రామారావు. ఉపాధ్యాయురాలిగా తన జీవితంలో ఎంతోమంది విద్యార్థులకు విద్యాబుద్ధులు నేర్పిన ఆమె, ఉద్యోగ విరమణ అనంతరం కూడా సమాజ సేవకే తన జీవితాన్ని అంకితం చేశారు. యోగా, ఆర్ట్స్ అండ్ క్రాఫ్ట్స్, దేశభక్తి కార్యక్రమాలు, సామాజిక వేడుకలు.. ఇలా తనకు చేతనైన ప్రతి రంగంలోనూ సేవ చేయడం ఆమెకు అలవాటుగా మారింది. మరో రెండు రోజుల్లో స్వాతంత్ర్య దినోత్సం జరుపుకోబోతున్న సందర్భంగా ఆమె పరిచయం నేటి మానవిలో…
సరోజినీ ప్రత్యేకతల్లో ముఖ్యమైనది భారతమాత వేషధారణ. ఇప్పటివరకు సుమారు ఇరవై సార్లకు పైగా భారతమాతగా వేషధారణ వేశారు. వివిధ కార్యక్రమాల్లో పాల్గొని ప్రజల్లో, ముఖ్యంగా పిల్లల్లో దేశభక్తి భావాలను పెంపొందించేందుకు తనవంతు కృషి చేశారు. స్వాతంత్ర్య దినోత్సవం, గణతంత్ర దినోత్సవం వంటి జాతీయ పర్వదినాల్లో భారతమాతగా అలంకరించుకుని కార్యక్రమాల్లో పాల్గొంటూ ఉంటారు. ఆమె భారతమాత వేషధారణ కేవలం ఒక కళారూపంగా కాకుండా, దేశ చరిత్ర, సంస్కృతి, త్యాగాలు, జాతీయతను గుర్తు చేసే సందేశంగా నిలుస్తోంది. భారతమాత వేషధారణకు అవసరమైన అలంకరణపై కూడా ఆమె ప్రత్యేక శ్రద్ధ చూపుతారు. కార్యక్రమానికి తగిన విధంగా తనను తాను తీర్చిదిద్దుకోవడంలో ఆమె చూపే ఆసక్తి పలువురిని ఆకట్టుకుంటోంది.
అవార్డులు, రివార్డులతో గుర్తింపు
దేశభక్తి కార్యక్రమాల్లో పాల్గొనడంతో పాటు వివిధ సామాజిక, సాంస్కృతిక, కళా కార్యక్రమాల్లో చేసిన సేవలకు సరోజినీ అనేక అవార్డులు, రివార్డులు, ప్రశంసలు అందుకున్నారు. అయితే ఆమెకు అవార్డుల కంటే సేవ చేయడమే ముఖ్యమని చెబుతారు. తన ప్రతిభను తనకోసం మాత్రమే కాకుండా ఇతరులకు ఉపయోగపడేలా వినియోగించడమే తన లక్ష్యమని ఆమె భావిస్తారు.
ఉచిత యోగా బోధన
ఉదయం వేళల్లో హైదరాబాద్ ఇందిరా పార్క్లో కనిపించే సరోజినీలో మరో ప్రత్యేకత యోగా బోధన. భారతీయ యోగా సంస్థాన్ ఆధ్వర్యంలో ఇందిరా పార్క్లో ప్రజలకు ఉచితంగా యోగా నేర్పిస్తూ, ఆరోగ్యం, మానసిక ప్రశాంతతపై అవగాహన కల్పిస్తున్నారు. యోగా కేవలం శరీరానికి వ్యాయామం మాత్రమే కాదని, మనస్సును ప్రశాంతంగా ఉంచేందుకు, జీవనశైలిని ఆరోగ్యకరంగా మార్చేందుకు ఎంతో ఉపయోగపడుతుందని ఆమె చెబుతుంటారు. వయసుతో సంబంధం లేకుండా ప్రతి ఒక్కరూ తమ ఆరోగ్యం కోసం యోగాను జీవితంలో భాగం చేసుకోవాలని ఆమె ప్రోత్సహిస్తున్నారు. ఉచితంగా యోగా నేర్పడం ద్వారా ఆరోగ్యం అందరికీ అందుబాటులో ఉండాలనే భావనను ఆమె ఆచరణలో చూపిస్తున్నారు.
సేవకు మాత్రం రిటైర్మెంట్ లేదు
ప్రభుత్వ ఉపాధ్యాయురాలిగా పనిచేసి ఉద్యోగ విరమణ పొందినప్పటికీ, సరోజినీ జీవితంలో మాత్రం ‘రిటైర్మెంట్’ అనే పదానికి చోటు లేదు. టీచర్గా పనిచేసిన సమయంలో విద్యార్థులకు పాఠాలు బోధించిన ఆమె, ఇప్పుడు సమాజానికి తన అనుభవాన్ని, ప్రతిభను పంచుతున్నారు. ప్రత్యేకంగా ఆర్ట్స్ అండ్ క్రాఫ్ట్స్ పట్ల ఆమెకు ఎంతో ఆసక్తి. వివిధ రకాల కళలు, చేతిపనులను స్వయంగా చేస్తూ, వాటిని ఇతరులకు కూడా ఉచితంగా నేర్పిస్తూ తనలోని సృజనాత్మకతను సమాజంతో పంచుకుంటున్నారు. పిల్లలు, మహిళలు, ఆసక్తి ఉన్నవారికి కళలపై అవగాహన కల్పించడం ద్వారా సృజనాత్మకతను ప్రోత్సహిస్తున్నారు. ఖాళీ సమయాన్ని వృథా చేయకుండా ఒక కళను నేర్చుకోవడం ద్వారా మనలోని ప్రతిభను వెలికితీయవచ్చని ఆమె సూచిస్తున్నారు.
సరోజినీ సర్ప్రైజ్ ప్రత్యేకమే
సరోజినీ సేవా భావం కేవలం యోగా, కళలు, జాతీయ పండుగలకే పరిమితం కాలేదు. తన పరిచయస్తులు, స్నేహితులు, యోగా సభ్యులు, ఆత్మీయుల పుట్టినరోజు లేదా పెళ్లిరోజు వచ్చినా ప్రత్యేకంగా గుర్తుంచుకుని వారికి సర్ప్రైజ్ ఇవ్వడం ఆమెకు ఇష్టం. తన చేతులతో తయారు చేసిన కళాకృతులు, ప్రత్యేక అలంకరణలు లేదా సందర్భానికి తగిన చిన్నచిన్న బహుమతులతో వారిని ఆనందపరుస్తుంటారు. మనకు తెలిసిన వాళ్లను వారి ప్రత్యేక రోజున గుర్తు చేసుకోవడం కూడా ఒక రకమైన ప్రేమ, సేవే అనే భావనతో ఆమె ఈ కార్యక్రమాలను చేస్తుంటారు. ఆమె ఇచ్చే సర్ప్రైజ్ కేవలం ఒక బహుమతి కాదు.. ఎదుటి వ్యక్తి గురించి మనం ఆలోచించామని తెలియజేసే ఆత్మీయతకు గుర్తుగా నిలుస్తుంది.
కుటుంబం నుంచి పూర్తి సహకారం
సరోజినీ చేస్తున్న సేవా కార్యక్రమాల వెనుక ఆమె కుటుంబం కూడా అండగా నిలుస్తోంది. ఆమె భర్త బొబ్బిలి రామారావు. ఈ దంపతులకు ఇద్దరు కొడుకులు. బొబ్బిలి శ్రీకర్, బొబ్బిలి శ్రీనాథ్. కుటుంబ బాధ్యతలను నిర్వర్తిస్తూనే సమాజానికి తనవంతు సేవ చేయడం ఆమె జీవితంలో ఒక భాగంగా మారింది.
యువతకు స్ఫూర్తిగా
సాధారణంగా ఉద్యోగ విరమణ తర్వాత విశ్రాంతి తీసుకోవాలని చాలామంది భావిస్తారు. కానీ సరోజినీ మాత్రం తన జీవితంలోని రెండో దశను మరింత చురుకుగా మార్చుకున్నారు. ‘వయసు పెరగడం సహజం.. కానీ ఉత్సాహం తగ్గిపోవడం మన చేతుల్లోనే ఉంది అన్నట్టుగా ఆమె జీవన విధానం సాగుతోంది. యోగా నేర్పడం ద్వారా ఆరోగ్యాన్ని పంచుతున్నారు. ఆర్ట్స్ అండ్ క్రాఫ్ట్స్ ద్వారా సృజనాత్మకతను పంచుతున్నారు. భరతమాత వేషధారణ ద్వారా దేశభక్తిని చాటుతున్నారు. పుట్టినరోజులు, పెళ్లిరోజులను గుర్తు చేస్తూ ఆత్మీయతను పంచుతున్నారు. ఇలా తనకు వచ్చిన ప్రతిభను తనలోనే దాచుకోకుండా సమాజానికి అందించడం ఆమె ప్రత్యేకత.
సంకల్పమే ముఖ్యం
సరోజినీ జీవితం ఒక ముఖ్యమైన సందేశాన్ని ఇస్తోంది. ఉద్యోగం నుంచి రిటైర్ కావచ్చు కానీ సేవ నుంచి రిటైర్ కావాల్సిన అవసరం లేదు. మనలో ఉన్న ప్రతిభను, సమయాన్ని, అనుభవాన్ని సమాజానికి ఉపయోగపడేలా చేస్తే ప్రతి మనిషి తనదైన ముద్ర వేయగలడు. వయసు అనేది కేవలం సంఖ్య మాత్రమేనని తన సేవా ప్రయాణంతో నిరూపిస్తున్నారు. దేశభక్తి, ఆరోగ్యం, కళ, ఆత్మీయత.. ఈ నాలుగింటినీ తన జీవితంలో కలిపి ముందుకు సాగుతున్న సరోజినీ నిజంగా సమాజానికి స్ఫూర్తిదాయకమైన సేవామూర్తి.
