97 నదుల ప్రవాహం…

భారతదేశంలో నదులకు కొదువ లేదు. ఒక జిల్లాలో రెండు లేదా మూడు నదులు ప్రవహించడం సాధారణంగా చూస్తుంటాం. అయితే మన దేశంలో ఏకంగా 97 నదులు జీవం పోసుకుంటూ ప్రవహించే ఒకే ఒక్క జిల్లా ఉందనే విషయం మీకు తెలుసా?
మన దేశ సంస్కృతిలో నదులకు ఎంతో ప్రాముఖ్యత ఉన్నది. నదీ తీరాల్లోనే గొప్ప నాగరికతలు వికసించాయి. అయితే భౌగోళికంగా ఎన్నో ప్రత్యేకతలు కలిగిన భారతదేశంలో ఒకే ఒక్క జిల్లా పరిధిలో ఏకంగా 97 చిన్న, పెద్ద నదులు ప్రవహిస్తుండటం ఎవరినైనా ఆశ్చర్యానికి గురిచేస్తుంది. కొండకోనలు, దట్టమైన అడవులు, ప్రకృతి అందాల మధ్య నిరంతరం గలగలపారే సెలయేళ్లు ఆ ప్రాంతాన్ని ఒక సజీవ జల నిధిగా మార్చేశాయి. టూరిస్టులను కట్టిపడేసే ఆ ప్రాంతం మరేదో కాదు.. కేరళ రాష్ట్రంలోని ప్రసిద్ధ వయనాడ్‌ జిల్లా.
పచ్చని కొండలు, టీ తోటలకు పేరుగాంచిన వయనాడ్‌ మనకు ప్రకృతి ఇచ్చిన గొప్ప వరంగా నిలిచింది. పశ్చిమ కనుమల మధ్య విస్తరించి ఉన్న ఈ జిల్లాలో విస్తారమైన వర్షపాతం నమోదవుతుంది. ఇక్కడి ఎత్తైన పర్వత శ్రేణుల నుంచి చిన్న చిన్న జలపాతాలు, వాగులు ప్రారంభమై నదులుగా రూపాంతరం చెందుతాయి. చిన్నవి, పెద్దవి కలిపి మొత్తం 97 నదులు ఈ ఒక్క జిల్లా గుండానే ప్రయాణించడం ప్రపంచ స్థాయి రికార్డుగా నిలుస్తోంది. ఇక్కడి పర్యావరణ వ్యవస్థను నిలబెట్టడంలో ఈ నదీ జలాలు కీలక పాత్ర పోషిస్తున్నాయి.
వయనాడ్‌లో ప్రవహించే డజన్ల కొద్దీ నదులలో ‘కబిని’ నది అత్యంత ప్రధానమైనదిగా చెప్పవచ్చు. వయనాడ్‌ కొండల్లో జన్మించే కబిని నది కిందకు ప్రవహించి కర్ణాటకలో ప్రసిద్ధ కావేరి నదిలో కలుస్తుంది. తూర్పు వైపు ప్రవహించే ఈ నదితో పాటు పనామరం, మానంతవాడి వంటి ఉపనదులు కలిసి వయనాడ్‌ నియోజకవర్గాన్ని జల సమద్ధిగా మారుస్తాయి. వర్షాకాలంలో ఈ నదులన్నీ ఉగ్రరూపం దాల్చి కనువిందు చేసే జలపాతాలుగా మారి పర్యాటకులకు అపూర్వ అనుభూతిని అందిస్తాయి.
ఒకే ప్రాంతంలో ఇన్ని నదులు ప్రవహించడం వల్ల వయనాడ్‌ భూగర్భ జల మట్టం ఎప్పుడూ సమద్ధిగా ఉంటుంది. పక్షులు, వన్యప్రాణులు, విభిన్న రకాల వృక్షసంపద మనుగడ సాగించడానికి ఈ నదీ వ్యవస్థే ఆధారంగా నిలుస్తోంది. వ్యవసాయం, తాగునీరు మాత్రమే కాకుండా పర్యాటకరంగానికి ఈ నదులు పెద్ద ఎత్తున ఊతాన్నిస్తున్నాయి. ప్రకృతి ప్రేమికులు, సాహసికులు ఈ నదుల సౌందర్యాన్ని తిలకించడానికి దేశ విదేశాల నుంచి భారీగా తరలివస్తుంటారు.