భగత్‌ సింగ్‌ వ్యక్తిత్వానికి ప్రతీక ఈ పుస్తకం

భగత్‌ సింగ్‌ అంటే చాలామందికి ముందుగా గుర్తొచ్చేది ఆయన అసమాన్య సాహసకత్యాలు. ఆనాటి పార్లమెంటు అయిన సెంట్రల్‌ అసెంబ్లీలో ఒక చేతిలో పిస్తోలు, మరో చేతిలో బాంబు పట్టుకొని విసిరేసిన సంఘటనే స్ఫురిస్తుంది. ‘చెవిటివానికి సైతం వినపడేందుకు’ అంటూ కేవలం శబ్దం మాత్రమే చేసే బాంబునే వారు ఉపయోగించారు. ‘ఇంక్విలాల్‌ జిందాబాద్‌’, ‘సామ్రాజ్యవాదం నశించాలి’ అని గట్టిగా నినదిస్తూ బాంబు విసిరిన భగత్‌ సింగ్‌, ఆయన సహచరుడు దత్తు అక్కడి నుండి పారిపోలేదు. స్వచ్ఛందంగా పోలీసులకు లొంగిపోయారు. అంతేకాదు చేతిలో ఉన్న పిస్తోలును వారు వాడలేదు. దాన్ని చూసి దగ్గరకు వచ్చేందుకు పోలీసులు తటపటాయిస్తుంటే, భగత్‌ సింగ్‌ దాన్ని పక్కనే ఉన్న టేబుల్‌ పైన ఉంచాడు. అప్పుడు పోలీసులు వారిని అదుపులోకి తీసుకున్నారు. ఇది నిజంగా ఎవ్వరి మదిలోనైనా కలకాలం నిలిచిపోయే దృశ్యమే. పిస్తోలు చేతిలో ఉన్న భగత్‌ సింగ్‌నే ‘రంగ్‌ దే బసంతి’ సిన్మాలో కూడా చూపించారు.
కాని భగత్‌ సింగ్‌ వ్యక్తిత్వానికి సంబంధించి ఇది పాక్షిక చిత్రణ మాత్రమే. ఆయన దార్శనికత, సామాజిక, రాజకీయ ఆలోచనలు అంతకు మించినవి. భగత్‌సింగ్‌, ఆయన సహచరులు కేవలం బ్రిటిష్‌ వారిని దేశం నుండి పారదోలడానికి మాత్రమే పోరాటం చేయలేదు. పెట్టుబడిదారీ, భూస్వామ్య, వలసవాద వ్యవస్థను అంతం చేసి దాని స్థానంలో సోషలిస్టు సమాజ స్థాపన వైపుకు సాగిపోవాలన్నదే వారి ఆశయం. అందుచేతనే తొలుత హిందూస్థాన్‌ రిపబ్లికన్‌ అసోసియేషన్‌గా ఉన్న వారి విప్లవ సంస్థ పేరును హిందూస్థాన్‌ సోషలిస్టు రిపబ్లికన్‌ అసోసియేషన్‌గా మార్చుకున్నారు. అది కేవలం పేరు మార్పు మాత్రమే కాదు. భగత్‌సింగ్‌ అపారమైన అధ్యయనాన్ని అర్ధం చేసుకుంటే ఆయన మేధాశక్తి అవగతమవుతుంది.
అందుచేత, భగత్‌సింగ్‌ సాహసాన్ని, అధ్యయనాన్ని, దార్శనికతను కలిపి అర్థం చేసుకున్నపుడు మాత్రమే ఆయన సమగ్ర వ్యక్తిత్వం బోధపడుతుంది. అలాంటి అవగాహనను ప్రొఫెసర్‌ చమన్‌లాల్‌ రచించిన ఈ పుస్తకం మనకు అందజేస్తుంది. ఆయన జెఎన్సీ భారతీయ భాషల విభాగానికి ఛైర్మన్‌ గా కూడా పనిచేశారు. భగత్‌సింగ్‌ గురించి పూర్తి సాధికారత కలిగిన అతి కొద్దిమందిలో ఈయన ఒకరు. భగత్‌సింగ్‌ని అన్ని కోణాల నుండి అధ్యయనం చేసిన ఈ గ్రంథం ప్రధానంగా ఆయన వివిధ సందర్భాలలో రాసిన వ్యాసాల సంకలనం.
– గుడిపూడి విజయారావు