సరికొత్త ‘శివ’ని చూస్తారు

నాగార్జున నటించిన ఆల్‌ టైం కల్ట్‌ క్లాసిక్‌ ‘శివ’. బాక్సాఫీసు రికార్డులను తిరగరాస్తూ భారతీయ సినిమాను ‘బిఫోర్‌ శివ’, ‘ఆఫ్టర్‌ శివ’గా రీడిఫైన్‌ చేసింది. రామ్‌ గోపాల్‌ వర్మ దర్శకత్వంలో1989లో విడుదలైన ఈ చిత్రాన్ని అన్నపూర్ణ స్టూడియోస్‌ బ్యానర్‌లో నిర్మాతలు అక్కినేని వెంకట్‌, సురేంద్ర యార్లగడ్డ నిర్మించారు.
అన్నపూర్ణ స్టూడియోస్‌ని స్థాపించి 50 సంవత్సరాలు అయిన సందర్భంగా ఈ చిత్రాన్ని 4కె డాల్బీ ఆట్మాస్‌లో ఈనెల 14న థియేటర్లలో గ్రాండ్‌గా రిలీజ్‌ చేస్తున్నారు. ఈ సందర్భంగా ఫ్యాన్స్‌ సమక్షంలో శివ రీ-రిలీజ్‌ ట్రైలర్‌ని లాంచ్‌ చేశారు.
నాగార్జున మాట్లాడుతూ,’ఈ సినిమాని మీ నాన్న, అమ్మ థియేటర్స్‌లో చూసుంటారు. వాళ్ళందరికీ థ్యాంక్స్‌. ఇప్పుడు అదే ప్రేమతో మీరూ వచ్చారు. మీకు థ్యాంక్స్‌. అందరికంటే నా మిత్రుడు రామ్‌ గోపాల్‌ వర్మకి థ్యాంక్స్‌. 36 ఏళ్ల క్రితం నాతో ‘శివ’ సినిమా తీసి నన్ను పెద్ద స్టార్‌ని చేశారు. పొద్దున్నే 4కె వర్షెన్‌లో సినిమా చూశాను. స్టన్నింగ్‌గా అనిపించింది. రాము దాదాపు 6 నెలలు చాలా ప్రేమతో ఇష్టపడి ప్రతి సౌండ్‌ ట్రాక్‌ని మళ్లీ ఒరిజినల్‌ సినిమా చేసినట్టుగా, ఒక మైల్‌ స్టోన్‌గా నిలబెట్టాలని చాలా అద్భుతంగా డిజైన్‌ చేశాడు. సినిమా చాలా అవుట్‌ స్టాండింగ్‌గా వచ్చింది. శివ డాల్బీ ఆట్మాస్‌లో రియల్లీ మైండ్‌ బ్లోయింగ్‌ ఉంటుంది. ‘శివ’ ఈజ్‌ ఫరెవర్‌. మరో 36 ఏళ్ల తర్వాత ఇదే స్టేజ్‌ మీద, సినిమాని మళ్లీ మీ ముందుకు తీసుకురావాలని కోరుకుంటున్నాను. ఈనెల 14న మీరందరూ కూడా ‘శివ’ని కొత్తగా ఎక్స్‌పీరియన్స్‌ చేయబోతున్నారు. దర్శకుడు రాజమౌళికి అన్నట్టు ఆఫ్టర్‌ శివ, బిఫోర్‌ శివ. ‘శివ’ ఎప్పటికీ నిలిచిపోతుంది’ అని అన్నారు.
’36 ఏళ్ల క్రితం తీసిన ఈ సినిమా.. 36 ఏళ్ల తర్వాత మేం ఇద్దరం కూడా ఒకే స్టేజ్‌ పై ఇలా మీ ముందు రీ-రిలీజ్‌ ట్రైలర్‌ లాంచ్‌ చేస్తూ మాట్లాడతామని నేను ఎప్పుడూ కూడా ఊహించలేదు. ఇది వెరీ గ్రేట్‌ ఫీలింగ్‌. అప్పట్లో నాగర్జున విజువల్‌గా, సౌండ్‌ పరంగా చాలా క్రియేటివ్‌ ఫ్రీడమ్‌ ఇచ్చారు. ఈ రోజు కూడా అంతే ఫ్రీడమ్‌ ఇచ్చారు. రీ- రిలీజ్‌ కోసం సౌండ్‌ని చాలా బెటర్‌గా డిజైన్‌ చేశాం. కొత్త టెక్నాలజీని ఉపయోగించాం. చిరంజీవి చెప్పినట్టు సినిమా ఉన్నంతవరకు ‘శివ’ చిరంజీవిలా చిరస్మరణీయం’ అని డైరెక్టర్‌ రామ్‌గోపాల్‌ వర్మ చెప్పారు.