మారేడుపల్లి బూటకపు ఎన్‌కౌంటర్లపై సదస్సు
హిడ్మా ఎన్‌కౌంటర్‌ పై సమగ్ర విచారణ జరపాలి : సీపీఐ(ఎం) రాష్ట్ర కార్యదర్శి జాన్‌వెస్లీ
నవతెలంగాణ – ముషీరాబాద్‌
కేంద్రంలోని బీజేపీ ప్రభుత్వం హత్యాకాండలను ప్రోత్సహిస్తోందని, హిడ్మా ఎన్‌కౌంటర్‌పై సమగ్ర విచారణ జరపాలని సీపీఐ(ఎం) రాష్ట్ర కార్యదర్శి జాన్‌వెస్లీ డిమాండ్‌ చేశారు. అత్యంత దారుణంగా మావోయిస్టులను చంపడం బాధాకరమన్నారు. గ్రామస్తులు, ఆదివాసీలు చెప్పినదాని ప్రకారం.. కాళ్లు, చేతులు విరిగిపోయి శరీరంలోని భాగాల్లో గాయాలు ఉన్నాయని చెప్పారని, ఎన్‌ కౌంటర్‌ అయితే ఇన్ని గాయాలు ఎలా ఉంటాయని ప్రశ్నించారు. చిత్రహింసలు పెట్టి చంపడం అన్యాయం అన్నారు. పూర్వ విప్లవ విద్యార్థుల వేదిక ఆధ్వర్యంలో మారేడుపల్లి బూటకపు ఎన్‌కౌంటర్లకు నిరసనగా శనివారం హైదరాబాద్‌ బాగ్‌లింగంపల్లిలోని సుందరయ్య విజ్ఞాన కేంద్రంలో సదస్సు నిర్వహించారు. ఈ సందర్భంగా ఆయన మాట్లాడుతూ.. ఇటీవల ఎక్కువగా ఏకపక్షంగా నిరాయుధుల్ని చేసి చంపేస్తున్నారన్నారు. కేంద్ర మంత్రులు కూడా మావోయిస్టులను ఎరివేస్తామని ప్రకటిస్తున్నారని, నేరం చేస్తే చట్ట పరంగా శిక్షించాలే తప్ప చంపే హక్కు మీకు ఎవరిచ్చారని ప్రశ్నించారు.
ఖనిజ సంపదలను, భూములను కార్పొరేట్‌ సంస్థలకు అప్పగించడానికి కేంద్ర ప్రభుత్వం కుట్ర చేస్తోందని, ఈ నేపథ్యంలోని ఎన్‌కౌంటర్లు జరిగాయని అర్థమవుతోందని అన్నారు. ప్రొఫెసర్‌ కోదండరామ్‌ మాట్లాడుతూ.. ఆదివాసీలకు స్వయం పాలన అధికారం దక్కాల్సిన అవసరం ఉందన్నారు. విస్తృతమైన ప్రజాస్వామ్య విలువల గురించి చర్చించాలన్నారు. ఎన్‌కౌంటర్ల పేరుతో ప్రభుత్వం హింసను ప్రేరేపించడం సరికాదన్నారు. న్యూడెమోక్రసీ రాష్ట్ర నాయకులు జేవీ చలపతి రావు మాట్లాడుతూ.. అభివృద్ధి పేరుతో అణచివేత, విధ్వంసానికి గురిచేస్తున్నారని అన్నారు. దేశ వ్యాప్తంగా హిడ్మా హత్య పట్ల చర్చ జరుగుతోందన్నారు. పోరాట వీరుల త్యాగాలు వృథా కావన్నారు. అరుణోదయ సమాఖ్య గౌరవ అధ్యక్షులు విమలక్క మాట్లాడుతూ.. ఎన్‌కౌంటర్‌ పేరుతో అమానుషంగా చంపేశారన్నారు. పూర్వ విప్లవ విద్యార్థుల వేదిక నాయకులు విష్ణువర్ధన్‌ అధ్యక్షతన జరిగిన ఈ కార్యక్రమంలో మాజీ ఎమ్మెల్యే క్రాంతి కిరణ్‌, రమణాల లక్ష్మయ్య తదితరులు పాల్గొన్నారు.
