డిస్కౌంట్‌ కావాలా..?జీఎస్టీ తగ్గించాలా..?

మెడికల్‌ మాఫియా మైండ్‌గేమ్‌
పాత ధరలకే మందుల అమ్మకాలు
తగ్గించని వైనం
తప్పని పరిస్థితుల్లో కొనుగోలు చేస్తున్న ప్రజలు
మెడికల్‌ షాపుల్లో తనిఖీలు చేయని అధికారులు

నారాయణగూడకు చెందిన అన్వేష్‌ దగ్గరలో ఉన్న ఓ మెడికల్‌ షాపునకు వెళ్లి మందులు కొన్నాడు. ఇందుకు అతనికి రూ.1,200 బిల్లు అయింది. డిస్కౌంట్‌ పోను రూ.1,080 ఇవ్వాలని షాపు అతను సూచించాడు. ‘ఇప్పుడు మందులపై కూడా 7 శాతం జీఎస్టీ తగ్గింది కదా.. తగ్గించరా..?’ అని దుకాణదారున్ని అన్వేష్‌ ప్రశ్నించారు. ‘మీకు ఇప్పటికే 10 శాతం డిస్కౌంట్‌ ఇచ్చాం కదా.. జీఎస్టీ కావాలంటే ఆ డిస్కౌంట్‌ ఉండదు’ అని చెప్పాడు. దీంతో డిస్కౌంట్‌తోనే సరిపెట్టుకుని అన్వేష్‌ వెళ్లిపోయాడు.

ఎల్బీనగర్‌కు చెందిన నర్సింహ్మ స్థానికంగా ఉన్న ఓ మెడికల్‌ షాపులో మందులు కొన్నాడు. ఈ మేరకు రూ.3,600 బిల్లు అయింది. డిస్కౌంట్‌ పోను రూ.3,140 చెల్లించాలని షాపు అతను సూచించాడు. బిల్లు కావాలని అడిగితే బిల్లు కావాల్సి వస్తే జీఎస్టీ 7శాతం మాత్రమే తగ్గింపు ఉంటుందని చెప్పాడు. 3 శాతం నష్టపోవాల్సి వస్తుందని భావించిన నర్సింహ్మ బిల్లు లేకుండానే మందులు తీసుకెళ్లిపోయాడు.

ఇలాంటి ఘటనలు నిత్యం జరుగుతూనే ఉన్నాయి. సెప్టెంబర్‌ 22వ తేదీ నుంచి పలు వస్తువులపై జీఎస్టీ తగ్గిస్తున్నట్టు కేంద్ర ప్రభుత్వం ప్రకటించింది. అందులో మెడికల్‌ మందులు కూడా ఉన్నాయి. కానీ కొన్ని రకాల వస్తువుల ధరలు మాత్రం తగ్గడం లేదు. తమ వద్ద పాత స్టాక్‌ ఉందని, జీఎస్టీ తగ్గించి ఇచ్చి మేం నష్టపోవాలా..? అని వ్యాపారులు ప్రశ్నిస్తున్నారు.

నవతెలంగాణ- సిటీబ్యూరో
రాష్ట్రంలో దాదాపు 40 వేల వరకు రిటైల్‌, హౌల్‌సేల్‌ మెడికల్‌ షాపులు ఉన్నాయి. వీటిలో ప్రతిరోజూ రూ.కోట్ల వ్యాపారం సాగుతోంది. ఆయితే ఈ దుకాణాల్లో ఆధిక శాతం ప్రజలకు జీఎస్టీ 2.0 సంస్కరణల ఫలాలు అందడం లేదు. గతంలో ఔషధాలు, శస్త్రచికిత్సల పరికరాలపై 12 శాతం, కొన్నింటిపై మాత్రమే 5 శాతం జీఎస్టీ ఉండేది. కేంద్ర ప్రభుత్వం జీఎస్టీ సంస్కరణల్లో భాగంగా సెప్టెంబర్‌ 22వ తేదీ నుంచి మందులపై ఉన్న 12 శాతం జీఎస్టీని 5 నుంచి 7 శాతానికి, క్యాన్సర్‌ సహా అరుదైన వ్యాధులకు వాడే 33 రకాల మందులపై జీఎస్టీని పూర్తిగా తొలగించింది. ఈ నూతన ధరల ప్రయోజనాలను సెప్టెంబర్‌ 22వ తేదీ నుంచే ప్రజలకు అందించాలని జాతీయ ఔషధ ధరల ప్రాధికార సంస్థ పేర్కొంది. కానీ మెజార్టీ దుకాణాల్లో ఈ తగ్గింపు ధరలు లభించడం లేదు. జీఎస్టీపై అధిక శాతం ప్రజలకు అవగాహన ఉన్న గ్రేటర్‌ హైదరాబాద్‌ నగరంలోనే నూతన సంస్కరణల ఫలాలు అందడం లేదు. ఇక రాష్ట్రంలోని జిల్లా కేంద్రాలు, ముఖ్య పట్టణాల్లో తెలియడం తక్కువ.. తెలిసి అడిగినా జీఎస్టీ తగ్గించే నాధుడే కరువయ్యారు.

జీఎస్టీ తగ్గింపు కావాలంటే డిస్కౌంట్‌ అడగొద్దు
చాలా దుకాణాల్లో నూతన జీఎస్టీ సంస్కరణల ఫలాలు అందడం లేదు. ఎవరైనా అవగాహన ఉండి జీఎస్టీ తగ్గింది కదా ధరలు తగ్గాలి కదా అని అడిగితే నీకు జీఎస్టీ తగ్గించాలంటే డిస్కౌంట్‌ అడగొద్దు అని చెబుతున్నారు. జీఎస్టీ 12 శాతం నుంచి 5-7 శాతానికి తగ్గింది. అంటే ఎమ్మార్పీపై 7 శాతం తగ్గుతుంది. అదే డిస్కౌంట్‌ అయితే ఎమ్మార్పీపై 10 శాతం వస్తుంది. మనం జీఎస్టీ తగ్గించాలని అడిగితే డిస్కౌంట్‌ కోల్పోతాం. ఫలితంగా 3శాతం మనకే నష్టమని భావించి అధిక శాతం వినియోగదారులు దుకాణదారులు ఇచ్చిన బిల్లుకు మందులు తీసుకుంటు న్నారు. బిల్లు కావాలని అడిగిన వారికీ ఇదే పరిస్థితి నెలకొంది. బిల్లు కావాలంటే డిస్కౌంట్‌ అడగొద్దని ఖరాకండిగా చెప్పేస్తున్నారు. బిల్లు ఇస్తే ఎమ్మార్పీ 7 శాతం జీఎస్టీ తగ్గించి ఇవ్వాలి. బిల్లు లేకుండా అయితే 10 శాతం డిస్కౌంట్‌ ఇవ్వొచ్చు. దీన్ని దృష్టిలో ఉంచుకుని ప్రజలతో వ్యాపారులు మైండ్‌ గేమ్‌ ఆడుతున్నారు.

అధికారులకు తగ్గించామని చెబుతూనే..!
జీఎస్టీ తగ్గినందున ఆ మేరకు మందుల ధరలు తగ్గించి విక్రయించాలని కేంద్ర ప్రభుత్వం అందించిన ఫలాలు ప్రజలకు చేరువ కావాలని అధికారులు చెబుతున్నారు. కానీ ఎక్కడా అమలు కావడం లేదు. ఏ దుకాణంలోనూ జీఎస్టీ తగ్గించి ఇవ్వడం లేదు. పాత, కొత్త ధరల బోర్డులు ఏర్పాటు చేయలేదు. అడిగితే మా వద్ద పాత స్టాక్‌ ఉందని, కొత్త స్టాక్‌ ధరలు తగ్గించి వస్తే ఇస్తామని దుకాణదారులు చెబుతున్నారు. ఇప్పుడు మీకు (వినియోగదారులకు) 7 శాతం తగ్గించి ఇస్తే తాము నష్టపోతామని వారు పేర్కొంటున్నారు. పాత నిల్వలైనా ప్రస్తుత తగ్గిన ధరల ప్రకారమే అమ్మాలని స్పష్టమైన ఆదేశాలు అధికారులు ఇచ్చినా అమలు కావడం లేదు. జీఎస్టీ అధికారులతోపాటు డ్రగ్‌ నియంత్రణ అధికారులు నిఘా పెంచి తరచూ తనిఖీలు చేస్తేనే జీఎస్టీ తగ్గింపు ఫలాలు ప్రజలకు అందే వీలుంది.