బలిపీఠంపై కార్మికుల భవితవ్యం

నాలుగు లేబర్‌కోడ్‌లతో హక్కులు హననం
వలస కార్మికుల కన్నీటి కష్టాలు
సిగాచీ బాధిత కుటుంబాల పట్ల నిర్లక్ష్యం
అమలుకు నోచుకోని కనీస వేతనాల జీవో
కార్మికులను దోచుకోవటంలో బీజేపీ, బీఆర్‌ఎస్‌, కాంగ్రెస్‌ అన్నీ ఒకటే…
సీఐటీయూ రాష్ట్ర ఐదో మహాసభల సందర్భంగా ఆ సంఘం రాష్ట్ర అధ్యక్షులు చుక్క రాములుతో ‘నవతెలంగాణ’ ప్రత్యేక ఇంటర్య్వూ

బీజేపీ ప్రభుత్వం నాలుగు లేబర్‌ కోడ్‌లను తీసుకొచ్చి కార్మికుల భవితవ్యాన్ని బలిపీఠంపైకి ఎక్కించింది. కార్మికవర్గం సుదీర్ఘకాలం అనేక త్యాగాలు, ఆందోళనలు, పోరాటాలు చేసి సాధించుకున్న కార్మిక చట్టాలు కాలగర్భంలో కలిసి పోయాయి. ఐదేండ్లుగా మోడీ సర్కార్‌ ఈ చట్టాలను నిర్వీర్యం చేయాలని ప్రయత్నిస్తూ, కార్మికుల ఆగ్రహజ్వాలలకు భయపడి వెనకడుగు వేస్తూ వచ్చింది. బీహార్‌లో ఎన్డీఏ కూటమికి అత్య ధిక మెజారిటీ రావటంతో తమ విధానాలకు అదే గీటు రాయిగా భావిస్తూ, కేంద్ర ప్రభుత్వం కార్పొరేట్‌ అనుకూల విధానాల అమల్లో వేగాన్ని పెంచింది. సీఐటీయూ రాష్ట్ర మహాసభలు ఈనెల 7 నుంచి 9వ తేదీ వరకు మెదక్‌ పట్ట ణంలో జరుగుతున్నాయి. ఈ సందర్భంగా సీఐటీయూ రాష్ట్ర అధ్యక్షులు చుక్క రాములుతో నవతెలంగాణ ప్రతినిధి ప్రత్యేక ఇంటర్య్వూ…

నవతెలంగాణ : కేంద్ర ప్రభుత్వం తీసుకొచ్చిన నాలుగు లేబర్‌కోడ్‌ల ప్రభావం పారిశ్రామిక కార్మికులపై ఎలా ఉండబోతుంది?
చుక్క రాములు : కేంద్రంలోని బీజేపీ ప్రభుత్వం నాలుగు లేబర్‌ కోడ్‌ల అమలు చేసే ప్రక్రియ ఈ నెల నవంబర్‌ 21నుంచి ప్రారంభిస్తూ ప్రకటన విడుదల చేసింది. 29 కార్మిక చట్టాలను కుదించి నాలుగు లేబర్‌ కోడ్‌లను రూపొందించింది. వీటిని అమలు చేయడం మొదలైతే కార్మికుల రక్త మాంసాల్ని యధేచ్చగా పీల్చుకునేందుకు పెట్టు బడిదారులకు, యాజమాన్యాలకు తిరుగులేని అధికారం ఇచ్చారు.

పాత కార్మిక చట్టాల అమలు ఎలా ఉంది?
కార్మిక హక్కుల్ని పరిరక్షించాల్సిన కార్మిక శాఖ ఉత్సవ విగ్రహంలా మారింది. ఉన్న చట్టాలను అమలు చేయట్లేదు. శాశ్వత స్వభావం ఉన్న పనుల్లో కాంట్రాక్టు లేబర్‌ను వినియోగించ కూడదని చట్టం ఉంది. ఎవరు అమలు చేస్తున్నారు? 8 గంటల పని విధానానికి చట్టబద్దత ఉంది. కానీ పార్మా, కెమికల్‌, స్టీల్‌ లాంటి పెద్ద పరిశ్రమల్లో వలస కార్మికులతో అత్యధిక గంటలు పని చేయిస్తున్నారు. తనిఖీలు ఎవరు చేయాలి? ఇది తప్పు అని చెప్పాల్సిన బాధ్యత ప్రభుత్వాలదే కదా! కానీ ప్రభుత్వ కార్యాలయాల్లోనే కాంట్రాక్ట్‌, ఔట్‌సోర్సింగ్‌, పీస్‌ రేట్‌ వంటి అనేక పేర్లతో శ్రమదోపిడీ చేస్తున్నారు. ఆవు చేనులో మేస్తే, దూడ గట్టున మేయదు కదా… ప్రభుత్వాల తీరు ఇలాగే ఉంది.

కార్మిక సంఘాల పరిస్థితి ఏంటి?
లేబర్‌ కోడ్‌ల అమలు వల్ల శాశ్వత ఉద్యోగా లుండవు. రూ.18వేలు వేతనం దాటిన వారందరిని కార్మికులుగా పరిగణించ కూడదు. వీరందరూ సూపర్‌వైజరీ కేడర్‌గా మారిపోతారు. 300 మంది కార్మికులకంటే తక్కువ ఉన్న పరిశ్ర మల్లో ఎలాంటి అనుమతి లేకుండా తమ ఇష్టం వచ్చినట్టు కార్మికులను తొలగించవచ్చు. ఎలాంటి గడువు లేకుండా పరిశ్రమల్ని యాజమాన్యం ఎప్పుడైనా మూసేయొచ్చు. ఇలాంటి నిబంధనల వల్ల కార్మిక సంఘాల కార్యకలాపాలు బలహీనపడ్తాయి.

కేంద్రం గొప్ప సంస్కరణలు తెచ్చామని ప్రచారం చేసుకుంటుంది కదా… దానిలో వాస్తవమెంత?
కేంద్రప్రభుత్వం తన అనుకూల మీడియా ద్వారా నాలుగు లేబర్‌ కోడ్‌ల వల్ల కార్మికులకు మేలు జరుగుతుందనే తప్పుడు వార్తల్ని వ్యాప్తిచేస్తుంది. కార్మికుల పీఎఫ్‌ను 12 శాతం నుంచి 10 శాతానికి తగ్గించారు. ఫలితంగా యాజమాన్య వాటా కూడా తగ్గుతుంది. దీనివల్ల కార్మికులకు నష్టం జరుగుతుందే తప్ప, లాభం లేదు. ఇలాంటి అనేక కార్మిక వ్యతిరేక అంశాలు లేబర్‌కోడ్లలో ఉన్నాయి. ఆ లోపాలను మోడీ అనుకూల మీడియా ప్రజలకు చెప్పట్లేదు.

పరిశ్రమల్లో వలస కార్మికులు ఎదుర్కొంటున్న సమస్యలేంటి?
వలస కార్మికుల శ్రమను దోచుకునేందుకు పరిశ్రమల యాజమాన్యాలు పోటీపడుతున్నాయి. ఏ పరిశ్రమల్లోనూ కనీస వేతనాలు అమలు కావటం లేదు. సమాన పనికి సమాన వేతనం లేదు. అంతరాష్ట్ర వలస కార్మికుల చట్టం అమలు కావటం లేదు. ప్రమాదాలు జరిగినప్పుడు ఎక్కువ ప్రాణాలు కోల్పోతున్నది కూడా వలస కార్మికులే. సిగాచి పరిశ్రమలో జరిగిన ప్రమాదంలో 54 మంది కార్మికులు చనిపోతే, వారిలో 90 శాతం మంది వలస కార్మికులే. చనిపోయిన బాధిత కుటుంబాలకు సరైన నష్టపరిహారం రావటం లేదు. కొన్ని యాజమానులు శవాలనే మాయం చేస్తున్నాయి. మరి కొన్నిచోట్ల నామమాత్రంగా డబ్బులిచ్చి, వారి రాష్ట్రాలకు మృతదేహాల్ని తరలిస్తున్నారు. పని ప్రదేశంలో కనీస సౌకర్యాలు లేని రేకుల షెడ్లలోకి వలస కార్మికులకు డంప్‌ చేస్తున్నారు. వారి కుటుంబసభ్యులకు విద్య, వైద్య సౌకర్యాలు లేవు. వారి సంక్షేమానికి ప్రత్యేక చర్యలు తీసుకోవాలని సీఐటీయుగా మేం డిమాండ్‌ చేస్తున్నాం. మా రాష్ట్ర మహాసభల్లో దీనిపై ప్రత్యేకంగా చర్చించి, నిర్ణయాలు తీసుకుంటాం.

సిగాచి బాధిత కుటుంబాలకు న్యాయం జరిగిందా? సీఐటీయూ వారికోసం ఎలాంటి పోరాటాలు నిర్వహించింది?
సిగాచి పరిశ్రమలో జరిగిన ప్రమాదం దేశంలో అతిపెద్ద ఇండిస్టీయల్‌ యాక్సిడెంట్‌. యాజమాన్య నిర్లక్ష్యానికి నిదర్శనం. ప్యాక్టరీ యాక్టు రూల్స్‌ను పాటించకపోవటం వల్ల ఇది జరిగింది. కార్మిక శాఖ అధికారులు తమ విధులను సక్రమంగా నిర్వర్తించకపోవడం వల్ల అంతమంది ప్రాణాలు గాలిలో కలిశాయి. దీనిపై ప్రభుత్వం నియమించిన సాంకేతిక నిపుణుల కమిటీ సిఫారసులు ఎమయ్యాయో తెలీదు. వాటిపై ప్రభుత్వం తీసుకున్న చర్యలు, ఘటనకు ఎవర్ని బాధ్యుల్ని చేశారనే విషయాల్ని వెల్లడించలేదు. ప్రభుత్వ తాత్సారంపై హైకోర్టు కూడా ఆగ్రహం వ్యక్తం చేసింది. ఒక్కో కార్మికుని కుటుంబానికి రూ. కోటి నష్ట పరిహారం ఇస్తామంటూ సీఎం రేవంత్‌రెడ్డి ప్రకటన చేశారు.

ఇప్పటి వరకు ప్రకటించిన మొత్తంలో రూ.30 లక్షల నుంచి రూ.40 లక్షల వరకు కూడా బాధితులకు చేరలేదు. పరిహారం విషయంలో యాజమాన్యం మోసం చేస్తున్నది. కార్మికులకు చట్టబద్దంగా రావాల్సిన పీఎఫ్‌లో భాగంగా ఉండే ఈడీఎల్‌(ఎంప్లాయీస్‌ డెత్‌ లింక్డ్‌ ఇన్సెంటివ్‌), శెలవులు, ఇతర బెనిఫిట్స్‌ని కలిపి రూ.కోటి అందిస్తామని చెప్తున్నారు. ఇది అన్యాయం. ఈ విషయంపై సీఐటీయూ నికరంగా పోరాడుతుంది. పరిష్కారం అయ్యేంత వరకు బాధితుల పక్షాన నిలుస్తాం. లేబర్‌ అధికారులు, జిల్లా కలెక్టర్‌, రాష్ట్ర లేబర్‌ కమిషనర్‌ వీళ్లందరినీ కదిలించేలా ఆందోళనలు, పోరాటాలు నిర్వహించాం. ఐనా ఇంకా సమస్య అపరిష్కృతంగానే ఉంది. నష్టపరిహారం పూర్తిగా చెల్లించి, దోషులను గుర్తించి కఠినంగా శిక్షించేవరకు భవిష్యత్‌ పోరాటాలు చేస్తూనే ఉంటాం.

కార్మిక, పారిశ్రామిక శాఖల తనిఖీల వల్ల కార్మికులకు కలిగే ప్రయోజనాలు ఏంటి? వీటిని ఎత్తేయడం వల్ల జరిగే నష్టాలు ఏంటి?
పారిశ్రామిక వాడల్లో సమస్యలు కోకొల్లలు. వాటి పరిష్కారంలో కార్మిక శాఖ పూర్తిగా విఫలమైంది. అత్యధిక పరిశ్రమల్లో బోనస్‌ ఇవ్వటం లేదు. చట్టం ఉన్నా అమలు కావట్లేదు. పరిశ్రమల శాఖ అధికారులు, ఇన్‌స్పెక్టర్లు పూర్తి నిర్లక్ష్యంగా వ్యవహరిస్తున్నారు. యూనియన్లు ఏర్పాటు చేసుకుంటే కక్షగట్టి కార్మికుల్ని తొలగిస్తున్నారు. ఈజ్‌ ఆఫ్‌ డూయింగ్‌ బిజినెస్‌ పేరుతో పరిశ్రమలు ఏం చేసినా, కేంద్ర, రాష్ట్ర ప్రభుత్వాలు వారికే కొమ్ముకాస్తున్నాయి. కార్మికశాఖ యాజమానుల ప్రయోజనాలు కాపాడే మంత్రిత్వ శాఖగా మారిపోయింది.

కార్మికుల పట్ల కాంగ్రెస్‌ సర్కార్‌ తీరు ఎలా ఉంది?
పెరిగిన ధరలకు అనుగుణంగా కార్మికుల వేతనాలు సవరించాలి. గత సీఎం కేసీఆర్‌ పదేండ్లు అధికారంలో ఉన్నా, అది అమలు కాలేదు. తర్వాత కాంగ్రెస్‌ ప్రభుత్వం అధికారంలోకి వచ్చినా అతీగతీ లేదు. ఇప్పటికీ ఉమ్మడి రాష్ట్రంలో ఉన్న వేతనాలనే అమలు చేస్తున్నారు. సీఎం రేవంత్‌రెడ్డి ప్రభుత్వం పాత వేతనంలో బేసిక్‌, డీఏ కలిపి కొత్త వేతనంగా చూపి, ఒక రూపాయి కూడా అదనంగా కలపకుండా జీవోలు జారీచేశారు. ఈ ప్రభుత్వానికి కూడా కార్మిక సంక్షేమంపై చిత్తశుద్ధి లేదు.

కనీస వేతనాలు అమల్లో ఉన్నాయా?
పెరిగిన ధరలకు అనుగుణంగా ఐదేండ్లకోసారి కనీస వేతనాలు పెరగాలి. ఆ మేరకు చట్టం ఉంది. కానీ రాష్ట్రంలో 15 ఏండ్లుగా వేతన సవరణలు జరగలేదు. ఇవన్నీ చట్టఉల్లంఘనలే. ఈ ఉల్లంఘనలకే కేంద్రం ఇప్పుడు నాలుగు లేబర్‌ కోడ్‌ల రూపంలో చట్టబద్ధత కల్పించింది.

పరిశ్రమల్లో తనిఖీలు ఉండవని చెప్తున్నారు…నిజమేనా?
లేబర్‌ కోడ్‌ల అమల్లో కేంద్రం పరిశ్రమల్లో భౌతిక తనిఖీలను పూర్తిగా తొలగించింది. ఆన్‌లైన్‌లో అవసరమైన కాగితాలను వారికి చూపితే చాలు. అంతా సక్ర మంగా ఉన్నట్టు కార్మిక శాఖ అధికారులే రికార్డులు రాసుకుంటారు. కానీ కార్మికులు ఫిర్యాదు చేస్తే లేబర్‌శాఖ అధికారులు పరిశ్రమల్లో తనిఖీలు చేయాలని మేం డిమాండ్‌ చేస్తున్నాం.

ఫ్యాక్టరీయాక్ట్‌ చట్టాలన్నా అమలవుతున్నాయా?
లేదు. పని ప్రదేశాల్లో ఇప్పుడున్న ప్యాక్టరీ యాక్టు నిబంధనలను ఏ మాత్రం పాటించటం లేదు. ఫలితంగా పెద్ద ఎత్తున ప్రమాదాలు జరుగుతున్నాయి. ఈ మధ్యకాలంలో సిగాచి పరిశ్రమలో జరిగిన పేలుడే ప్రత్యక్ష సాక్ష్యం.

సీఐటీయూగా మీరేం చేస్తారు?
దేహి అని అడిగితే ప్రభుత్వాలు పట్టించుకోవు. కచ్చితంగా పాలకులపై పోరాటాలు చేయాల్సిందే. ఇప్పటి వరకు సాధించుకున్న కార్మిక హక్కులన్నీ ఇలా పోరాడి సాధించుకున్నవే. కేంద్రంలోని మోడీ ప్రభుత్వం వాటిని ఎత్తేస్తామంటే సహించేది లేదు. కచ్చితంగా బరిగీసి, కొట్లాడతాం. శ్రమశక్తి బలాన్ని పాలకులకు గుర్తుచేస్తాం. దానికోసం బలమైన పోరాటాల రూపకల్పనకు సీఐటీయు సిద్ధమవుతున్నది. కార్మికుల పట్ల పాలనా విధానాల్లో బీజేపీ, కాంగ్రెస్‌, బీఆర్‌ఎస్‌ అన్నీ ఒక తానులో ముక్కలే. సీఐటీయు రాష్ట్ర మహాసభల్లో ఈ అంశాలన్నీ చర్చించి, భవిష్యత్‌ పోరాట నిర్ణయాలకు దిశానిర్దేశం చేసుకుంటాం. మహాసభల్లో 33 జిల్లాల నుంచి 600 మంది కార్మికులు, నాయకులు భాగస్వాములు అవుతారు. సమిష్టి నిర్ణయంతో పాలకుల విధానాలపై తిరుగుబాటు బావుటా ఎగరేస్తాం.