మనోళ్లకు రాసే ఓపికలేదా! లేక మారుతున్న బంధాలే కారణమా?
ఒక వీలునామా ఎన్నో కుటుంబాలను కాపాడగలదు : నిపుణులు
ఉమ్మడి కుటుంబాలుగా ఉన్నప్పుడు వీలునామా అనేది అవసరం లేకుండా పోయింది. కానీ ఇపుడు అపార్ట్ మెంట్ కల్చర్ లోకి మారాక.. సమాజంలో ఉన్న పెద్దలకు వీలునామా రాసే అంశం ప్రతిబంధకంగా మారింది. ఆస్తుల కోసం తల్లిదండ్రులను రోడ్లపైకి తరిమేసే స్థాయికి కుటుంబ వ్యవస్థ దిగజారింది. అవసరాలు పెరుగుతున్నాయి. దానికి తగ్గట్టుగా సంపాదన లేకపోవటం కూడా ప్రధాన కారణంగా దర్శనమిస్తున్నది. ఇలాంటి మరెన్నో కీలకాంశాలు, బంధాలు, అనుబంధాలు అన్నింటినీ బేరీజు వేసుకుని వీలునామా రాసే పరిస్థితి నేటి సమాజంలో కనిపిస్తోంది. కనీసం బతికి ఉన్నన్నాళ్లయినా..
తమ వద్ద ఉన్న స్థలమో, పెట్టుబడులు ఉంటే ఆ వీలునామా తదుపరి తరానికి రాసి ఇచ్చే విషయంలో ఆచితూచి అడుగులు వేస్తున్నారు.
న్యూఢిల్లీ : ఒక ఇల్లు, కొన్ని బ్యాంకు ఖాతాలు, కొన్ని పెట్టుబడులు, ఒక కుటుంబ వ్యాపారం. చాలా మంది భారతీయులకు ఈ ఆస్తులు దశాబ్దాల కష్టానికి ప్రతీక. అయినప్పటికీ ఎవరికి ఏమి దక్కాలనే దానిపై చాలా తక్కువ మంది స్పష్టమైన సూచనలను వదిలి వెళ్తారు. దీనితో వారి తదుపరి తరానికి ఆస్తుల పంపకాల విషయంలో అనిశ్చితి ఏర్పడుతుంది. చాలా మంది భారతీయులు సంపదను నిర్మించడానికి సంవత్సరాలు గడుపుతారు. కానీ తాము చనిపోయిన తర్వాత దానికి ఏమి జరుగుతుందనే దానిపై ఒక నిర్ణయం తీసుకోవడానికి మాత్రం చాలా తక్కువ సమయం వెచ్చిస్తారు. ఇందుకు ఒక ఘటనను ఉదాహరణగా చెప్పొచ్చు. కొన్నేండ్ల క్రితం ఇద్దరు సోదరులు ఒకరితో ఒకరు మాట్లాడుకోవడం మానేశారు. దానికి కారణం వ్యాపార వివాదమో, దీర్ఘకాలంగా ఉన్న కుటుంబ కలహాలు కాదు.. చనిపోయిన వారి తండ్రికి సంబంధించి ఇల్లే. ఆ తండ్రి ఆ ఇంటిని నిర్మించడానికి దశాబ్దాలు గడిపాడు. కష్టపడి పని చేసి, పొదుపులు చేశాడు. తన పిల్లలకు సుఖవంతమైన జీవితాన్ని అందించాడు. అయినప్పటికీ, ఆయన ఒక ముఖ్యమైన పనిని అసంపూర్తిగా వదిలేశాడు. అదే వీలునామా రాయకపోవడం. ఆయన మరణించిన కొన్ని నెలల్లోనే, కలిసి పెరిగిన ఆ పిల్లలు వారసత్వ వివాదంలో ఒకరికొకరు చెరో పక్షంలో నిలబడాల్సి వచ్చింది. న్యాయవాదులు రంగంలోకి దిగారు. కోర్టుకు వెళ్లడం సర్వసాధారణమైపోయింది. కుటుంబ సంబంధాలు నెమ్మదిగా క్షీణించాయి.
నేటి భారతీయులు గతంలో
ఎన్నడూ లేనంత సంపన్నులు..
మనం ఇండ్లు కొంటున్నాం, మ్యూచువల్ ఫండ్స్లో పెట్టుబడులు పెడుతున్నాం, స్టాక్ పోర్ట్ఫోలియోలను నిర్మిస్తున్నాం, వ్యాపారాలను సొంతం చేసుకుంటున్నాం. గత తరాలు కేవలం కలలు కనగలిగిన ఆస్తులను సృష్టిస్తున్నాం. సంపదను సృష్టించడంలో మనం ఎంతగానో పరిణతి చెందినప్పటికీ, మనం లేని తర్వాత ఆ సంపదకు ఏమి జరుగుతుందనే దానిపై ఒక ప్రణాళిక రూపొందించడంలో మాత్రం వెనుకబడిపోతున్నామని విశ్లేషకులు చెప్తున్నారు. వన్ ఫైనాన్స్ మ్యాగజైన్ ఇటీవల జరిపిన ఒక అధ్యయనం ఈ కఠినమైన వాస్తవాన్ని వెల్లడిస్తోంది. ఇందులో ఆశ్చర్యకరమైన విషయాలు వెల్లడయ్యాయి. ఈ సర్వేలో.. దాదాపు 84.8 శాతం మందికి వీలునామా లేదని వెల్లడైంది. మరింత ఆందోళనకరమైన విషయం ఏమిటంటే.. 62.5 శాతం మందికి వీలునామా రాసుకునే ఆలోచన కూడా లేదు. ప్రస్తుతం కేవలం 15.2 శాతం మందికి మాత్రమే వీలునామా ఉంది. ఈ గణాంకాలు ఆస్తి ప్రణాళికను కేవలం వాయిదా వేయడం మాత్రమే కాదని సూచిస్తున్నాయి. చాలా కుటుంబాలలో, ఈ విషయం అసలు చర్చలోకి కూడా రావడం లేదు. సర్వేలో పాల్గొన్నవారిలో దాదాపు సగం మంది తమ కుటుంబాలతో వీలునామాలు లేదా వారసత్వ ప్రణాళిక గురించి ఎప్పుడూ చర్చించలేదని చెప్పడం గమనార్హం.
మనం వాయిదా వేస్తూనే ఉన్న కుటుంబ సంభాషణ
మరణం అనేది భారతదేశంలో సంభాషణలకు సంబంధించిన అతిపెద్ద నిషిద్ధ విషయాలలో ఒకటిగా మిగిలిపోయింది. వీలునామా గురించి చర్చించడం దురదృష్టాన్ని ఆహ్వానించడమేనని చాలా మంది నమ్ముతారు. మరికొందరు ఇంకా చాలా సమయం ఉందని భావిస్తారు. సమయం వచ్చినప్పుడు తమ పిల్లలే అన్ని విషయాలు చక్కబెట్టుకుంటారని కొందరు అనుకుంటారు. అయితే ఆ అంచనా తప్పు, ప్రమాదకరం అని విశ్లేషకులు, నిపుణులు చెప్తున్నారు. యూనివర్సల్ ట్రస్టీస్ (ఆస్తి , వారసత్వ ప్రణాళికలో ప్రత్యేకత కలిగిన సంస్థ) ఎండీ , సీఈఓ ఆశిష్ నాసా మాట్లాడుతూ… ఆస్తి ప్రణాళిక అనేది కేవలం పదవీ విరమణ చేసిన వారికి, వృద్ధులకు, సంక్లిష్టమైన సంబంధాలు ఉన్న కుటుంబాలకు మాత్రమేనని చాలా మంది భారతీయులు ఇప్పటికీ నమ్ముతున్నారని చెప్పారు. సరైన పత్రాలు లేకుండా.. ఆస్తులను బదిలీ చేయడం అనేది తర్వాతి తరాలకు చట్టపరంగా, మానసికంగా ఒక పీడకలగా మారుతుందని ఆయన హెచ్చరిస్తున్నారు.
‘వీలునామా కేవలం వృద్ధులు,
ధనవంతులకు మాత్రమే కాదు..
వీలునామా అనేది కేవలం వృద్ధులకు లేదా ధనవంతులకు మాత్రమే సంబంధించిన పత్రం కాదని ఆశిశ్ నాసా అన్నారు. ‘‘మీకు వృద్ధాప్యం వచ్చినట్టు అనిపించినప్పుడు వీలునామా రాయడం సరైన సమయం కాదు. మీరు రక్షించుకోవడానికి ఏదైనా ఉన్నప్పుడు, పోషించాల్సిన వారు ఉన్నప్పుడు రాయడానికి అదే సరైన సమయం’’ అని ఆయన చెప్పారు.
వీలునామాపై అతిపెద్ద అపోహలు
నామినీలు ఆటోమేటిక్గా ఆస్తులకు తుది యజమానులు అవుతారని చాలా మంది భారతీయులు ఇప్పటికీ నమ్ముతున్నారు. ఇక తర్వాత రాసుకుందాం, చాలా సమయం ఉందన్న భావన కూడా ప్రమాదకరంగా మారుతోంది. వీలునామాను తరచుగా ఒక చట్టపరమైన పత్రంగా చూస్తారు. వాస్తవానికి, ఇది ఒక కుటుంబ పత్రంమని విశ్లేషకులు చెప్తున్నారు. ‘‘మీకు ఏది ముఖ్యమో అది మీ ప్రియమైనవారికి తెలియజేస్తుంది. ఇది అనిశ్చితిని తగ్గిస్తుంది. ఇది అపార్థాలను కనిష్ట స్థాయికి తగ్గిస్తుంది. అన్నింటికన్నా ముఖ్యంగా, భావోద్వేగాలు తీవ్రంగా ఉన్నప్పుడు సంబంధాలను కాపాడటానికి ఇది సహాయపడుతుంది’’ అని విశ్లేషకులు చెప్తున్నారు. ఈ సందేశం ముఖ్యంగా యువ భారతీయులకు వర్తిస్తుందని విశ్లేషకులు చెప్తున్నారు. వీలునామా అనేది సంపద పరిమాణానికి సంబంధించినది కాదనీ, అది భవిష్యత్తులో దీనిపై ఆధారపడబోయేవారికి స్పష్టతను అందించడమే దీని ఉద్దేశమని అంటున్నారు. మనిషి వదిలి వెళ్లే గొప్ప వారసత్వం కేవలం ఇల్లు, భూమి, బంగారం కాదు. తన తర్వాత కూడా కుటుంబ సభ్యులు ఐక్యంగా ఉండేలా చూసే దూరదృష్టి. ఆ దూరదృష్టికి ప్రతీకే వీలునామా. అందుకే నేటి భారతీయ కుటుంబాల్లో అత్యంత విలువైన ఆర్థిక పత్రం మరో పెట్టుబడి పథకం లేదా బీమా పాలసీ కాకపోవచ్చు. అది ఒక సాధారణ వీలునామా కావచ్చు. ఎందుకంటే అది మనల్ని మరణానికి సిద్ధం చేయదు. మన తర్వాత జీవించే వారిని రక్షించడానికి మార్గం చూపుతుందని నిపుణులు చెప్తున్నారు.
అనేక కుటుంబాల్లో ఇదే పరిస్థితి
మనలో చాలా మంది ఇలాంటి పరిస్థితులను ఎదుర్కొంటున్నారు. మన సొంత కుటుంబాలలో గానీ, బంధువులు, ఇరుగుపొరుగువారు, స్నేహితుల మధ్య గానీ ఇవి కనిపిస్తుంటాయి. తల్లిదండ్రులలో ఒకరు మరణిస్తారు. జీవితకాలపు సంపదను వదిలి వెళతారు. కానీ ఆస్తి ఎవరికి చెందాలనే దానిపై స్పష్టమైన సూచనలు ఇవ్వరు. ఒకప్పుడు ఒకరికొకరు అండగా నిలిచిన పిల్లలు, ఆ తర్వాత ఇల్లు, భూమి, ఆభరణాలు, బ్యాంకు డిపాజిట్లు, కుటుంబ వ్యాపారం కోసం వివాదాలలో చిక్కుకుంటున్నారు. భద్రతకు చిహ్నంగా ఉండాల్సిన వారసత్వం, సంఘర్షణకు కేంద్రంగా మారుతుంది. ఇలాంటి ఘటనలు మన ముందే ఎన్నో జరుగుతున్నా.. చాలా మంది భారతీయులు వీలునామా రాయడాన్ని తప్పించుకుంటూనే ఉన్నారు. భారతీయుల్లో వీలునామా రాయాలనే సంకల్పమే భారతదేశానికి లేదన్నట్టుగా పరిస్థితి కనిపిస్తోందని విశ్లేషకులు చెప్తున్నారు.
