పసుపు, ఎర్రజెండాతో రాష్ట్రానికి నూతన ఎజెండా

సింగరేణి బాయి బాటలో టీఆర్ఎస్ అధ్యక్షురాలు కవిత
నవతెలంగాణ – యైటింక్లైన్ కాలనీ/కరీంనగర్‌
ఆడబిడ్డలకు పసుపు అంటే ఎంతో పవిత్రమైన దని పసుపు జెండా, ఎర్ర జెండా కలిసి రాష్ట్రంలో నూతన ఎజెండా తీసుకువస్తామని టిఆర్ఎస్ అధ్యక్షురాలు కల్వకుంట్ల కవిత వ్యాఖ్యానించారు. గురువారం పెద్దపల్లి జిల్లా ఆర్జీ-2 ఏరియాలోని ఓసీపీ-3లో హెచ్ఎంఎస్ నేత రియాజ్ అహ్మద్ తో కలిసి బాయి బాట కార్యక్రమాన్ని నిర్వహించారు. ఈ సందర్భంగా ఏర్పాటు చేసిన సమావేశంలో మాట్లాడుతూ గతంలో ప్లేడేల విషయంలో కొంత తప్పు జరిగిందని దానిని సరిదిద్దుకుంటామని అన్నారు. మెడికల్ ఉద్యోగాలు ఇవ్వకుండా కాంగ్రెస్ సర్కార్ కుట్ర చేస్తోందని మండి పడ్డారు. వచ్చే ఎన్నికల్లో టీఆర్ఎస్ పార్టీకి అవకాశం ఇవ్వాలని కోరారు. ఈ కార్యక్రమంలో నాయకులు కండెం సురేష్,సాజన్,దావు రమేష్, రత్నాకర్ రెడ్డి,అనిల్ రెడ్డి, అశోక్ పాల్గొన్నారు. ఈ సందర్భంగా కవిత పర్యటనలో స్వల్ప ఉద్రిక్తతలు చోటుచేసుకున్నాయి.

​కోటరీ రాజకీయాలు ఉండవు : కవిత
తెలంగాణను హస్తగతం చేసుకోవాలనే కుట్రతోనే పవన్ కల్యాణ్ వెనుక ఉండి బీజేపీ నడిపిస్తోందని తెలంగాణ రక్షణ సమితి (టీఆర్ఎస్) అధ్యక్షురాలు కవిత ఆరోపించారు. కరీంనగర్‌లో నిర్వహించిన‘తెలంగాణ ఉద్యమకారుల ఆకాంక్షలు – సాధన’ రౌండ్ టేబుల్ సమావేశం ముగింపు సందర్భంగా ఆమె మాట్లాడారు. పవన్ కల్యాణ్ రూపంలో మేకవన్నె పులిలా బీజేపీ వస్తోందని, ఆ పార్టీ డైరెక్ట్‌గా పోటీ చేస్తే 8 సీట్లు కూడా రావని ఎద్దేవా చేశారు. పవన్ కళ్యాణ్‌తో ఏదో మాట్లాడిస్తే తెలంగాణ ప్రజలు ఆవేశంగా స్పందిస్తారని భావిస్తు న్నారని, జీహెచ్ఎంసీ చుట్టుపక్కల ప్రాంతాల విలీనం వెనుక కూడా కుట్ర దాగి ఉందన్నారు. ​బీజేపీ వస్తే మన సంస్కృతి దెబ్బతింటుందని, మైసమ్మ, దుర్గమ్మ లాంటి ఊరి దేవతలు ఉండరని, ఒకటి రెండు దేవుళ్లను మాత్రమే పూజించాల్సి వస్తుందని ఆందోళన వ్యక్తం చేశారు. ​గత బీఆర్ఎస్ ప్రభుత్వంలో కోటరీ రాజకీయాల వల్ల తాను కూడా బలయ్యానని, అందుకే టీఆర్ఎస్-2 లో కోటరీ వ్యవస్థ ఉండదని కవిత స్పష్టం చేశారు. ఇన్నాళ్లూ మగ నాయకుల పాలన చూశారని, తనకో అవకాశం ఇస్తే మార్పు ఏంటో చూపిస్తానన్నారు.