–బేగంపేటలో పౌర సరఫరాల శాఖాధికారుల మెరుపు దాడులు
నవతెలంగాణ–బెజ్జంకి
మండలంలోని బేగంపేటలో అక్రమంగా నిల్వ చేసిన గ్యాస్ సిలిండర్లు పట్టుబడినట్టు జిల్లా పౌరసరఫరాల శాఖాధికారి తనూజ తెలిపారు. మంగళవారం మండల పరిధిలోని బేగంపేట గ్రామంలో ఓ ఇంట్లో అక్రమంగా గ్యాస్ సిలిండర్లు నిల్వ చేశారనే నిర్దేశిత సమాచారం మేరకు జిల్లా పౌరసరఫరాల శాఖాధికారి తనూజ అధ్వర్యంలో మెరుపు దాడులు నిర్వహించారు. దాడుల్లో భారీగా అక్రమ సిలిండర్లు పట్టుబడగా స్వాధీనం చేసుకున్నామని డీఎస్ఓ తెలిపారు.
చేతివాటంతోనే గ్యాస్ సిలిండర్లు పక్కదారి..
గృహా వినియోగదారులకు నేరుగా అందించాల్సిన గ్యాస్ సిలిండర్ల సరఫరాదారుల చేతివాటంతోనే సిలిండర్లు పక్కదారి పడుతున్నాయని స్థానికులు గగ్గోలు పెట్టారు.ఆటోలో గ్యాస్ సిలిండర్లను గృహాలకు సరఫరా చేసే వాహనదారుడు సామాన్యులపై వివక్ష చూపుతూ అక్రమ సిలిండర్ల నిల్వలకు పాల్పడుతున్నట్టు గ్రామంలో పలువురు ఆరోపించారు.సామాన్యులకు ఓటీపీ చెబితేనే గ్యాస్ సిలిండర్ అందించే వాహనదారుడు బేగంపేటలో ఓ ఇంటికి ఎలాంటి ఓటీపీ లేకుండా సుమారు పదుల సంఖ్యలో ఇతరుల గ్యాస్ సిలిండర్లు అందించడం వివక్ష చూపడమేనని స్థానిక యువత అసహనం వ్యక్తం చేశారు.ఒక ఇంటికి పదుల సంఖ్యలో గ్యాస్ సిలిండర్లను అందించిన వాహనదారుడిని తక్షణమే తొలగించి సామాన్యులకు గ్యాస్ సిలిండర్లు అందించేల జిల్లాధికారులు చర్యలు చేపట్టాలని స్థానికులు విజ్ఞప్తి చేశారు.
