– రేపు హైదరాబాద్లో ప్రమాణ స్వీకారం..
హర్షం వ్యక్తం చేస్తున్న అశ్వారావుపేట నియోజకవర్గ ప్రజలు
నవతెలంగాణ – అశ్వారావుపేట
అశ్వారావుపేట ఎమ్మెల్యే జారె ఆదినారాయణ రాష్ట్ర లైబ్రేరియన్ కమిటీ సభ్యుడిగా నియమితులయ్యారు. ఈ మేరకు ఆయన గురువారం హైదరాబాద్లో ప్రమాణ స్వీకారం చేయనున్నారు. ఈ సందర్భంగా నియోజకవర్గ ప్రజలు, విద్యార్థులు, యువత, పుస్తక పఠన ప్రియులు, అభిమానులు హర్షం వ్యక్తం చేస్తూ ఎమ్మెల్యేకు శుభాకాంక్షలు తెలిపారు.
విద్య, విజ్ఞానాన్ని పెంపొందించడంలో గ్రంథాలయాలు కీలక పాత్ర పోషిస్తాయని వారు పేర్కొన్నారు. ముఖ్యంగా గ్రామీణ ప్రాంతాల్లో గ్రంథాలయాలను బలోపేతం చేయడం ద్వారా విద్యార్థులు, నిరుద్యోగులు, పోటీ పరీక్షలకు సిద్ధమవుతున్న యువతకు ఎంతో ప్రయోజనం చేకూరుతుందని అన్నారు.
గ్రంథాలయాల్లో అవసరమైన పుస్తకాలు, మౌలిక వసతులు, డిజిటల్ సదుపాయాలు కల్పించడంతోపాటు పుస్తక పఠనాన్ని ప్రోత్సహించేందుకు ఎమ్మెల్యే చొరవ తీసుకోవాలని కోరారు. రాష్ట్ర లైబ్రేరియన్ కమిటీ సభ్యుడిగా తన బాధ్యతలను సమర్థవంతంగా నిర్వర్తిస్తూ గ్రంథాలయాల అభివృద్ధికి కృషి చేయాలని ఆకాంక్షించారు.
ఎమ్మెల్యే జారె ఆదినారాయణకు లభించిన ఈ బాధ్యత అశ్వారావుపేట నియోజకవర్గానికి గర్వకారణమని పలువురు పేర్కొన్నారు. ఆయన పదవీకాలం విజయవంతంగా సాగాలని కోరుతూ ప్రజలు, విద్యార్థులు, యువత, పుస్తక పఠన ప్రియులు, అభిమానులు శుభాకాంక్షలు తెలిపారు.
