– ఆల్‌రౌండర్ల జాబితాలో అక్షర్‌ పటేల్‌కు మూడో ర్యాంక్‌
దుబాయ్: ఐసిసి టి20 ర్యాంకింగ్స్‌లో టీమిండియా మిస్టర్‌ 360డిగ్రీస్‌ సూర్యకుమార్‌ యాదవ్‌ మరోసారి అగ్రస్థానాన్ని నిలబెట్టుకున్నాడు. అంతర్జాతీయ క్రికెట్‌ మండలి(ఐసిసి) తాజా టి20 బ్యాటర్ల జాబితాలో సూర్యకుమార్‌ యాదవ్‌ 861 పాయింట్లతో టాప్‌లో ఉన్నాడు. ఆ తర్వాత ఫిల్‌ సాల్ట్‌(ఇంగ్లండ్‌) 788 పాయింట్లు, మహ్మద్‌ రిజ్వాన్‌(పాకిస్తాన్‌) 769 పాయింట్లు, బాబర్‌ ఆజం 761పాయింట్లు, మార్‌క్రమ్‌(దక్షిణాఫ్రికా) 733 పాయింట్లు టాప్‌-5లో ఉన్నారు. ఇంగ్లంఢ్‌ సారథి జోస్‌ బట్లర్‌ ఒక ర్యాంకు మెరుగుపరచుకుని ఏడో స్థానానికి చేరుకున్నాడు. ఇక వెస్టిండీస్‌ స్టార్‌ బ్రాండన్‌ కింగ్‌ ఏకంగా ఐదుస్థానాలు ఎగబాకి ఎనిమిదో ర్యాంకు సాధించాడు. టీమిండియా ఆల్‌రౌండర్‌ అక్షర్‌ పటేల్‌ ఐసిసి ర్యాంకింగ్స్‌లో దుమ్ములేపాడు. టీ20 మెన్స్‌ ర్యాంకింగ్స్‌ ఈ లెఫ్టార్మ్‌ స్పిన్నర్‌ ?తొలిసారిగా మూడో స్థానం సంపాదించాడు. బౌలర్ల జాబితాలో ఇంగ్లండ్‌ స్టార్‌ ఆదిల్‌ రషీద్‌, శ్రీలంక కీలక ఆటగాడు వనిందు హసరంగ తర్వాతి స్థానం ఆక్రమించాడు. వెస్టిండీస్‌ లెఫ్టార్మ్‌ స్పిన్నర్‌ అకీల్‌ హొసేన్‌ దక్షిణాఫ్రికాతో సిరీస్‌లో తేలిపోవడంతో ఐదు స్థానాలు దిగజారగా.. అతడి స్థానాన్ని అక్షర్‌ పటేల్‌ భర్తీ చేశాడు. ఇక టీమిండియా నుంచి మరో స్పిన్నర్‌ రవి బిష్ణోయి టాప్‌-5లో చోటు దక్కించుకోవడం విశేషం.
