– నుదుటిపై తిలకం యోగీ సర్కార్‌ వింత నిర్ణయం : సర్వత్రా విమర్శలు
వారణాసి : ఉత్తరప్రదేశ్‌ రాష్ట్రం, వారణాసిలోని కాశీవిశ్వనాథ ఆలయంలో విధులు నిర్వహించే పోలీసులు అర్చకుల మాదిరిగానే ధోతి, కుర్తా ధరిస్తున్నారు. నుదుటిపై తిలకం దిద్దుకుంటున్నారు. రాష్ట్రంలోని యోగీ ప్రభుత్వం ఉత్తర్వులు మేరకు వారణాసిలో పోలీసులు ఈ విధమైన వేషధారణతో విధుల్లో పాల్గొంటున్నారు. ఈ విషయంపై వారణాసి పోలీస్‌ కమిషనర్‌ మోహిత్‌ అగర్వాల్‌ మాట్లాడుతూ ఆలయం వద్ద విధులు నిర్వహించే పోలీసులకు ఇటీవల కమ్యూనికేషన్‌ నైపుణ్యాలపై మూడు రోజుల సమగ్ర శిక్షణా కార్యక్రమం నిర్వహించినట్లు చెప్పారు. ఈ తరువాత ట్రయల్‌రన్‌లో భాగంగా 15 రోజుల పాటు పోలీసులు ధోతి, కుర్తా ధరించి ఆలయం వద్ద విధుల్లో పాల్గొంటారని తెలిపారు. 15 రోజుల ట్రయల్‌రన్‌ పూర్తయిన తరువాత సమీక్ష నిర్వహించి దీనిపై తుది నిర్ణయం తీసుకుంటామని అగర్వాల్‌ తెలిపారు. అలాగే నో టచ్‌ విధానాన్ని కూడా అమలు చేస్తున్నట్లు చెప్పారు. ఈ విధానంలో భక్తులను పోలీసులు నేరుగా తాకకుండా తాళ్లతో భక్తులను నియంత్రిస్తుంటారు.
కాగా, పోలీసులు అర్చకుల వేషధారణ చేసుకోవడం, నుదుటిపై తిలకం ధరించడంపై సర్వత్రా విమర్శలు వ్యక్తమవుతున్నాయి. దీనిపై ఎస్‌పి నాయకులు, మాజీ ముఖ్యమంత్రి అఖిలేష్‌ యాదవ్‌ స్పందిస్తూ ‘పోలీసులు అర్చకుల దుస్తులు ధరించడం ఏ పోలీస్‌ మాన్యువల్‌ ప్రకారం సరైనది?’ అని ప్రశ్నించారు.
ఇలాంటి ఆదేశాలు ఇచ్చేవారిని తక్షణమే సస్పెండ్‌ చేయాలని డిమాండ్‌ చేశారు. ఇలాంటి చర్యలు ‘ఖండించాల్సినవి’ అని పేర్కొన్నారు. రేపు ఎవరైనా మోసగాళ్లు దీనిని సద్వినియోగం చేసుకుని అమాయక ప్రజల్ని లూటీ చేస్తే యుపి ప్రభుత్వం, అధికారులు ఏం సమాధానం చెబుతారని అఖిలేష్‌ ప్రశ్నించారు.
కాగా, కాశీ విశ్వనాథ ఆలయంలో పోలీసులు అర్చకుల వేషధారణలో విధుల నిర్వహించడం ఇదే మొదటిసారి కాదు. 2018లోనూ దీనిని ప్రయోగాత్మకంగా పరిశీలించారు. కానీ కొన్ని కారణాలతో దీనిని నిలిపివేశారు. ఈ ఆలయాన్ని రోజుకు సుమారు 5 లక్షల మంది దర్శించుకుంటారు. దాదాపు 800 మంది పోలీసులు వివిధ షిప్టుల్లో అనేక స్థాయిలో విధులు నిర్వహిస్తుంటారు.
