నవతెలంగాణ – బజార్ హాత్నూర్
మహిళల మీద జరుగుతున్న హింసకు వ్యతిరేకంగా ప్రజలు, మహిళా సంఘాలు పోరాడాలని సఖి కేంద్రం నిర్వాహకురాలు లావణ్య అన్నారు. శనివారం మండలంలోని పిప్రీ గ్రామంలోని ప్రాథమిక పాఠశాల విద్యార్థులకు, అంగన్వాడీ కార్యకర్తలకు అంతర్జాతీయ మహిళలపై హింసకు వ్యతిరేకంగా ప్రచారోద్యమంలో భాగంగా సఖి కేంద్రం ఆధ్వర్యంలో అవగాహన కల్పించారు. ఈ సందర్భంగా ఆమె మాట్లాడుతూ.. మహిళలు బాలికలపై హింసను అరికట్టేందుకు ప్రతి ఒక్కరు ముందుండాలని, ఆత్మన్యూనత భావాలకు, ఎలాంటి ప్రలోభాలకు లోనూ కాకూడదని సూచించారు. మహిళల, బాలికల సంబంధించిన చట్టాలు గృహ హింస, పోక్సో, బాల్యవివాహాల నిరోధక చట్టం, పని స్థలంలో వేధింపులు ఆర్థిక హింసల పై, సోషల్ మీడియా, చాట్ యాప్స్, తప్పుడు ఫోటోలు సృష్టించడం వ్యక్తిగత సమాచారాన్ని బయట పెట్టడం లాంటి వేధింపులు జరిగినట్లయితే ధైర్యంగా చర్యలు తీసుకోవడానికి ముందుండాలని తెలిపారు.
లైంగికంగా హింసించబడటం గాని, అత్యాచారానికి గురికావడం గాని,అక్రమ రవాణా కాబడటం గాని, బలవంతంగా పెళ్లి చేయడంగానీ, సైబర్‌ హింస గాని, బాల్యవివాహాలు చేయడంవల్ల గాని, పని ప్రదేశాలలో లైంగిక వేధింపులవల్ల గాని, అసభ్య పదజాలంతో దూషించడంవల్ల గాని, ఇలా అనేకరకాలుగా మహిళలు హింసకు గురవుతున్నారన్నారు. సఖీ కేంద్రం అందించే ఐదు రకాల సేవలు, హెల్ప్ లైన్ నంబర్స్ 181,1098, 1930, 100 గురించి వివరించారు. ఈ కార్యక్రమం నందు ఐసిడిఎస్ సూపర్ వైసర్ & టీచర్స్ పాఠశాల ప్రధానోపాధ్యాయులు ఉపాధ్యాయులు, మహిళలు, విద్యార్థులు పాల్గొన్నారు.
