నిరాశలో లబ్ధిదారులు
ప్రారంభంతోనే ముగింపు
నవతెలంగాణ – మల్హర్ రావు
అంగన్వాడీ కేంద్రాలకు వచ్చే చిన్నారులు,గర్భిణులు, బాలింతలకు ప్రభుత్వం అందిస్తున్న పోషకాహార కార్యక్రమాల్లో భాగంగా జూన్ లో కొత్తగా ‘అమ్మమాట.. అంగన్వాడీ బడిబాట’ పేరిట ఎగ్ బిర్యానీ కార్యక్రమాన్ని ప్రారంభించారు. అయితే ఈ పథకం ఒక్కరోజుతోనే ఆగిపోవడంతో లబ్దిదారులు తీవ్ర అసంతృప్తితో ఉన్నారు. వారానికి కనీసం రెండుసార్లు ఇస్తారని భావించిన ఎగ్ బిర్యానీ ప్రారంభోత్సవం రోజుతోనే ముగిసింది.
ఒక్కరోజు వరకే..
జూన్ 10న అంగన్వాడీల్లో చిన్నారులు పప్పు, అన్నం వంటి సాధారణ ఆహారం కన్నా గుడ్డు బిర్యానీ రుచికరమైన ఆహారానికి ఇష్టపడతారని, దీంతో కేంద్రాలకు హాజరు పెరుగుతుందని ప్రభుత్వం భావించి ప్రారంభించింది. మొదటిరోజే చిన్నారులు, గర్భిణులు ఉత్సాహంగా పాల్గొని భోజనం చేశారు. కానీ ఆ రోజు తర్వాత ప్రభుత్వం నుంచి ఎలాంటి ఉత్తర్వులు రాకపోవడంతో కార్యక్రమం నిలిచిపోయింది. తిరిగి ఎప్పుడు బిర్యానీ పెడతారని పిల్లలు అడుగుతుంటే సమాధానం చెప్పలేక ఇబ్బంది పడుతున్నామని అంగన్వాడీ టీచర్లు చెబుతున్నారు.మండలంలోని తాడిచెర్ల, వళ్లెంకుంట రెండు సెక్టార్ల పరిధిలో 38 అంగన్ వాడీ కేంద్రాలు ఉన్నాయి.
ఈ కేంద్రాల్లో 6 నెలల నుంచి 3ఏళ్ల వయస్సు గల 695 మంది,3 నుంచి 6 ఏళ్ల లోపు 499 చిన్నారులు ఉన్నారు. పిల్లలతో పాటు గర్భిణులు, బాలింత లు కూడా రోజువారీ పోషకాహారం పొందుతు న్నారు. 3 ఏళ్ల లోపు చిన్నారులకు బాలామృతం,16 కోడిగుడ్లు ఇస్తున్నారు. గుడ్డు బిర్యానీ పెడితే మొత్తం 1194 మంది చిన్నారులకు అదనపు పోషణ లభిస్తుందని అధికారులు అంచనా వేశారు.
ఆదేశాలు వస్తే అమలు చేస్తాం….సూపర్ వైజర్ భాగ్యలక్ష్మి
అంగన్వాడీ కేంద్రాల్లో గుడ్డు బిర్యానీ అందించాలనే నిర్ణయం ప్రకారం జూన్ 10న ప్రయోగాత్మకంగా వడ్డించాం. తర్వాత ఎప్పటి నుంచి ఇవ్వాలన్న దానిపై ఇంకా ప్రభుత్వ మార్గదర్శకాలు వెలువడలేదు. ఆదేశాలు వస్తే తప్పకుండా కార్యక్రమాన్ని కొనసాగిస్తాం.
