– నాయకులకు మంత్రి పొన్నం ప్రభాకర్ దిశా నిర్దేశం
నవతెలంగాణ – హుస్నాబాద్ రూరల్
స్థానిక ఎన్నికల్లో అన్ని గ్రామాల్లో సర్పంచ్ లు మనవే ఉండేలా అందరూ కలిసి సమన్వయం చేసుకోవాలని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ కార్యకర్తలకు సూచించారు. ఆదివారం హుస్నాబాద్ ఎమ్మెల్యే క్యాంప్ కార్యాలయంలో హుస్నాబాద్, రూరల్ కాంగ్రెస్ పార్టీ ముఖ్య నేతలతో మంత్రి పొన్నం ప్రభాకర్ సమీక్షా సమావేశం నిర్వహించారు. డిసెంబర్ 3 న హుస్నాబాద్ నియోజకవర్గంలో పలు అభివృద్ధి కార్యక్రమాలకు ముఖ్యమంత్రి రేవంత్ రెడ్డి శంకుస్థాపన అనంతరం పట్టణంలో జరిగే బహిరంగ సభ ఏర్పాట్లు ,సర్పంచ్ ఎన్నికలపై నేతలకు మంత్రి పొన్నం ప్రభాకర్ దిశా నిర్దేశం చేశారు. సీఎం పర్యటన తో హుస్నాబాద్ మరింత అభివృద్ధి జరుగుతుందని తెలిపారు. సభ కు సంబంధించిన ఏర్పాట్లు మౌలిక సదుపాయాలు, స్టేజి ,భద్రత , తాగునీరు , జన సమీకరణకు రవాణా సౌకర్యం అధికారులు చూసుకుంటారని, ముఖ్య నేతలంతా ముఖ్యమంత్రి పర్యటన పై ఇంటింటికి వెళ్లి ఆహ్వాన పత్రిక అందించాలన్నారు.
ముఖ్యమంత్రి హోదాలో మొదటి సారి హుస్నాబాద్ కి రేవంత్ రెడ్డి వస్తుండడంతో భారీ ఏర్పాట్లు చేయాలన్నారు. హుస్నాబాద్ నియోజకవర్గంలో ప్రతి గ్రామానికి వచ్చిన స్టీల్ బ్యాంక్ ఉపయోగించుకోవాలని సూచించారు. ఈ కార్యక్రమంలో కాంగ్రెస్ మండల అధ్యక్షుడు, మార్కెట్ వైస్ చైర్మన్ బంక చందు, కాంగ్రెస్ సీనియర్ నాయకులు మడప జైపాల్ రెడ్డి వివిధ గ్రామాల కాంగ్రెస్ పార్టీ అధ్యక్షులు తదితరులు పాల్గొన్నారు.
