మన గ్రోమోర్ సెంటర్ ఫర్టిలైజర్ లైసెన్స్ రద్దు 

నవతెలంగాణ – మర్రిగూడ
ప్రభుత్వ నిబంధనలకు విరుద్ధంగా యూరియా విక్రయాలు జరిగినందుకు గాను మండల కేంద్రంలోని మన గ్రోమోర్ సెంటర్ ఫర్టిలైజర్ లైసెన్స్ ను రద్దు చేస్తున్నట్లు మునుగోడు డివిజన్ వ్యవసాయ శాఖ సహాయ సంచాలకులు బి.వేణుగోపాల్ ఆదివారం ఉత్తర్వులు జారీ చేశారు.రాష్ట్ర ప్రభుత్వం నిర్దేశించిన ఫర్టిలైజర్ బుకింగ్ యాప్ ద్వారా కొంతమంది రైతులు యూరియాను బుకింగ్ చేసుకున్నారని కాని సదరు డీలర్ బుకింగ్ చేసుకున్న రైతులకు యూరియాను ఇవ్వకుండా నిబంధనలకు విరుద్ధంగా యూరియాను విక్రయించినట్లు గుర్తించడం జరిగిందని ఏ డి ఏ జారీ చేసిన ఉత్తర్వుల్లో పేర్కొన్నారు.ఈ నెల 24న మర్రిగూడ మండల కేంద్రంలోని మన గ్రోమర్ డీలర్ 19.98 మెట్రిక్ టన్నుల (444 బస్తాలు) యూరియాను పొందడం జరిగిందని,దానిని ఈ నెల 25,26 తేదీలలో అనధికారికంగా స్లాట్ బుకింగ్ చేసుకోని రైతులకు విక్రయించారని ఉత్తర్వుల్లో క్షుణ్ణంగా పేర్కొన్నారు.యూరియా కై ముందుగా స్లాట్ బుక్ చేసుకున్న రైతులు ఈ నెల 27 న  ఎరువుల దుకాణానికి రాగా అక్కడ స్టాక్ లేకపోవడంతో మండల కేంద్రంలో తీవ్ర గందరగోళం నెలకొందని,​దీనిని దృష్టిలో ఉంచుకొని  ‘ఫెర్టిలైజర్ కంట్రోల్ ఆర్డర్-1985’ లోని క్లాజ్ 31 ప్రకారం,సదరు డీలర్ లైసెన్స్  ను తక్షణమే సస్పెండ్ చేస్తున్నట్లు ఆ ఉత్తర్వుల్లో ఏ డి ఏ పేర్కొన్నారు.ఎరువుల విషయంలో నిబంధనలను అతిక్రమిస్తే  డీలర్ల పై కఠిన చర్యలు తప్పవని ఆయన హెచ్చరించారు