– గ్రాంట్లపై ఆధారపడే మున్సిపాలిటీలకు హెచ్చరిక
నవతెలంగాణ – అశ్వారావుపేట
పట్టణాల అభివృద్ధిలో మున్సిపాలిటీల సొంత ఆదాయం కీలకంగా మారింది. సొంత ఆదాయం లేకుంటే మున్సిపాలిటీలు పూర్తిగా కేంద్ర, రాష్ట్ర ప్రభుత్వ గ్రాంట్లుపై ఆధారపడాల్సిన పరిస్థితి ఏర్పడుతోంది. దీనివల్ల ప్రాథమిక సేవలు సైతం ఆలస్యమవుతాయని నిపుణులు సూచిస్తున్నారు. పట్టణ ప్రజలకు తాగునీరు, రోడ్లు, డ్రైనేజీ, చెత్త సేకరణ, వీధి దీపాలు వంటి సేవలు నిరంతరం అందించాలంటే స్థిరమైన ఆదాయం అవసరం. అయితే చాలా మున్సిపాలిటీల్లో ఆస్తి పన్ను, నీటి చార్జీలు వంటి వసూళ్లు తక్కువగా ఉండటం వల్ల అభివృద్ధి పనులు నిలిచిపోతున్నాయి. “నిధులు వచ్చిన తర్వాత చేస్తాం” అనే ధోరణి పెరుగుతోందని స్థానికులు ఆవేదన వ్యక్తం చేస్తున్నారు.
ఇక కేంద్ర, రాష్ట్ర ప్రభుత్వాల నుంచి వచ్చే నిధులు కూడా తరచూ ఆలస్యమవుతున్నాయి. అంతేకాకుండా, కొన్ని గ్రాంట్లకు వినియోగంపై కండిషన్లు ఉండటం వల్ల అత్యవసర పనులకు వాటిని వినియోగించలేని పరిస్థితి నెలకొంది.దీంతో మున్సిపాలిటీలు తక్షణ నిర్ణయాలు తీసుకోలేక ఇబ్బందులు పడుతున్నాయి. సొంత ఆదాయం ఉన్న మున్సిపాలిటీలు మాత్రం ఆర్థికంగా స్థిరంగా ఉండి, తక్కువ వడ్డీకి అప్పులు తెచ్చుకోవడం, మున్సిపల్ బాండ్ల ద్వారా నిధులు సమీకరించడం వంటి అవకాశాలను వినియోగించుకుంటున్నాయి. కానీ ఆదాయం లేని సంస్థలకు బ్యాంకులు కూడా అప్పులు ఇవ్వడంలో వెనుకంజ వేస్తున్నాయి.
భవిష్యత్ అవసరాల దృష్ట్యా కూడా ఆదాయం పెంపు అత్యంత అవసరమని అధికారులు చెబుతున్నారు. పట్టణాల్లో జనాభా పెరుగుదలతో పాటు నీటి సరఫరా, ట్రాఫిక్, మౌలిక సదుపాయాలపై ఒత్తిడి పెరుగుతోంది. పాత పైపులు, డ్రైనేజీ వ్యవస్థలను మార్చడం, కొత్త ప్రాజెక్టులు చేపట్టడం వంటి పనులకు భారీ నిధులు అవసరం. భారత రాజ్యాంగంలోని 74 వ రాజ్యాంగ సవరణ ప్రకారం మున్సిపాలిటీలు స్వయం పరిపాలన సంస్థలుగా గుర్తింపు పొందినా, సొంత ఆదాయం లేకపోతే ఆ స్వతంత్రత కేవలం కాగితాల పైనే మిగిలిపోతుందని నిపుణులు పేర్కొంటున్నారు.
ఇక ప్రజల భాగస్వామ్యం కూడా ఆదాయం పెంపుతోనే పెరుగుతుందని చెబుతున్నారు. పన్నులు చెల్లించే ప్రజలు పనులపై ప్రశ్నించే హక్కును వినియోగిస్తారని, దీంతో పారదర్శకత, జవాబుదారీతనం పెరుగుతుందని విశ్లేషిస్తున్నారు. సారాంశం ఏమిటంటే మున్సిపాలిటీలు సొంత ఆదాయం పెంచుకోకపోతే పట్టణాల అభివృద్ధి కష్టసాధ్యమవుతుంది.పురసంఘాలకు స్వీయ ఆదాయం ఉంటేనే ప్రజలకు మెరుగైన సేవలు అందించగలుగుతాయని నిపుణులు స్పష్టం చేస్తున్నారు.
