మనకు తెలియని చేగువేరా

‘చేగువేరా’ ఈ పేరు వినబడగానే ఎరుపు రంగు జెండా, గడ్డం, తలపై ఎర్రటి నక్షత్రం ఉన్న బెరెట్‌ క్యాప్‌ ధరించిన ఒక పవర్‌ఫుల్‌ ముఖచిత్రం గుర్తొస్తుంది. మరణించి దశాబ్దాలు గడుస్తున్నా, ప్రపంచవ్యాప్తంగా యువతపై ఆయన చూపిన, చూపిస్తున్న ప్రభావం అసాధారణమైనది. యువత చేగువేరాను కేవలం ఒక విప్లవకారుడిగా కాకుండా ఒక భావజాలంగా, స్ఫూర్తిగా చూశారు.. చూస్తున్నారు.. భవిష్యత్తులోనూ చూస్తారని చెప్పడం అతిశయోక్తి కాదు.
చేగువేరా అనగానే యువతకు గుర్తొచ్చే అతిపెద్ద గుణం ప్రశ్నించడం. ”ఎక్కడైనా అన్యాయం జరిగితే నీ రక్తం మరిగితే, నువ్వు నా సహోదరుడివి” అన్న ఆయన మాటలు యువతను బాగా ఆకర్షిస్తాయి. సమాజంలో జరిగే అవినీతి, అసమానతలు, అణచివేతపై తిరగబడే ధైర్యాన్ని ఆయన జీవితం యువతకు నూరిపోస్తుంది. విద్యార్థి ఉద్యమాల్లో, హక్కుల పోరాటాల్లో ఇప్పటికీ ‘చే’ చిత్రపటాలే ప్రధాన ఆయుధాలు.

సాహస గుణం – త్యాగం : చేగువేరా ఒక సంపన్న కుటుంబంలో పుట్టి, డాక్టర్‌ చదివారు. అనుకుంటే ఆయన విలాసవంతమైన జీవితాన్ని గడపవచ్చు. కానీ, ల్యాటిన్‌ అమెరికా దేశాల్లోని పేదరికాన్ని, కష్టాలను కళ్లారా చూసి, తన డాక్టర్‌ వృత్తిని, సుఖాలను వదిలేసి పేదల కోసం తుపాకీ పట్టారు.

యువతను ఆకట్టుకునే అంశం : తమ కెరీర్‌ లేదా స్వార్థం మాత్రమే చూసుకోకుండా, సమాజం కోసం ఏదో ఒకటి చేయాలనే ‘ప్యాషన్‌’ ఉన్న యువతకు ఆయనో రోల్‌ మోడల్‌. చేగువేరా కేవలం తుపాకీ పట్టిన విప్లవకారుడు మాత్రమే కాదు, అంతకంటే గొప్ప రచయిత, ఆలోచనాపరుడు, డైరీ రాసుకునే అలవాటు ఉన్న మేధావి. ఆయన రాసిన పుస్తకాలు, వ్యాసాలు, డైరీలు ప్రపంచవ్యాప్తంగా మిలియన్ల మంది యువతను, మేధావులను ప్రభావితం చేశాయి. ఆయన రచనలు సమాజంపై, ముఖ్యంగా యువత ఆలోచనా విధానంపై కచ్చితంగా ప్రభావం చూపాయి.

ది మోటార్‌ సైకిల్‌ డైరీస్‌ : చేగువేరా రాసిన పుస్తకాలన్నింటిలోనూ అత్యంత ప్రజాదరణ పొందినది, యువతను విపరీతంగా ఆకట్టుకున్నది ఇదే. 23 ఏండ్ల వయసులో మెడికల్‌ స్టూడెంట్‌గా ఆయన తన స్నేహితుడు అల్బెర్టో గ్రానాడోతో కలిసి మోటార్‌సైకిల్‌పై లాటిన్‌ అమెరికా అంతటా చేసిన ప్రయాణ అనుభవాల సమాహారమే ఈ పుస్తకం. ఈ పుస్తకం యువతలో ‘అన్వేషణాత్మక’ ధోరణిని పెంచింది. కేవలం ప్రయాణం అంటే వినోదం మాత్రమే కాదు సమాజాన్ని, పేదరికాన్ని, ప్రజల కష్టాలను కళ్లారా చూసి అర్థం చేసుకోవడం అనే సరికొత్త కోణాన్ని యువతకు పరిచయం చేసింది. ఒక సాదాసీదా యువకుడు ప్రపంచాన్ని మార్చే విప్లవకారుడిగా ఎలా మారాడో వివరించే ఈ పుస్తకం ఇది. నేటికీ యువతకు తమ ‘లైఫ్‌ పర్పస్‌’ వెతుక్కోవడానికి పెద్ద స్ఫూర్తి
.
గెరిల్లా వార్‌ఫేర్‌ : క్యూబా విప్లవంలో సాధించిన విజయాల ఆధారంగా, ఒక చిన్న సైన్యం క్రూరమైన, బలమైన సామ్రాజ్యవాద వ్యవస్థను ఎలా ఎదిరించవచ్చో తెలిపే ఒక ప్రాక్టికల్‌ గైడ్‌ ఇది. 1960, 70లలో ప్రపంచవ్యాప్తంగా ముఖ్యంగా ఆఫ్రికా, ఆసియా, లాటిన్‌ అమెరికా దేశాలలో జరిగిన అనేక వలసవాద వ్యతిరేక పోరాటాలకు, విప్లవాలకు ఇది ఒక టెక్స్ట్‌బుక్‌లా పనిచేసింది. ఇది కేవలం యుద్ధ తంత్రం మాత్రమే కాదు, ప్రజల మద్దతు లేకుండా ఏ పోరాటమూ గెలవలేదనే సత్యాన్ని చాటి చెప్పే ఒక దిక్సూచి.

క్యూబన్‌ విప్లవ స్మృతులు : క్యూబాలో బాటిస్టా నియంతత్వ ప్రభుత్వానికి వ్యతిరేకంగా తాము చేసిన పోరాటాలు, ఎదుర్కొన్న కష్టాలు, సాధించిన విజయాలను చేగువేరా ఇందులో రికార్డ్‌ చేశారు. లీడర్‌షిప్‌ క్వాలిటీస్‌, క్రమశిక్షణ అంటే ఏంటో ఈ పుస్తకం యువతకు నేర్పుతుంది. కష్ట సమయాల్లో అధైర్యపడకుండా జట్టును ఎలా నడిపించాలో, ఆదర్శాల కోసం ఎంతటి త్యాగానికైనా ఎలా సిద్ధపడాలో తెలిపే హితోత్తి.

సోషలిజం అండ్‌ మ్యాన్‌ ఇన్‌ క్యూబా : ఇది ‘చే’ తన సరికొత్త ఆలోచనను పెంచుకున్న వ్యాసం. సమాజంలో మార్పు రావాలంటే కేవలం ఆర్థిక మార్పులు వస్తే సరిపోదు, మనిషి ఆలోచనా విధానంలో మార్పు రావాలనే తన వాదనను బలంగా ఇందులో వినిపించాడు. ఆయన దీనిని ”న్యూ మ్యాన్‌” అని పిలిచేవాడు. కేవలం డబ్బు, స్వార్థం, వ్యక్తిగత లాభాల కోసం కాకుండా… సమాజ శ్రేయస్సు, నైతిక బాధ్యత, మానవత్వం కోసం పనిచేసే నూతన సమాజం నిర్మించబడాలని ‘చే’ రచనల ఆకాంక్ష. నేటి తరం యువత సామాజిక సేవా కార్యక్రమాలు సమాజానికి తిరిగి ఇవ్వడం వంటి ఆలోచనలు చేయడానికి ఈ సిద్ధాంతమే పునాది.

గ్లోబల్‌ ఐకాన్‌ : ఇది ఒక ఆసక్తికరమైన కోణం. నేడు చాలా మంది యువతకు ఆయన పూర్తి రాజకీయ సిద్ధాంతాలు (మార్క్సిజం-లెనినిజం) తెలియకపోయినా టీ షర్టులపై, బైక్‌లపై, సోషల్‌ మీడియా ప్రొఫైల్‌ పిక్చర్స్‌గా ‘చే’ బొమ్మను వాడుతుంటారు. అన్యాయాన్ని సహించని, కాంప్రమైజ్‌ కాని ఒక ‘బోల్డ్‌ అండ్‌ స్టైలిష్‌’ క్యారెక్టర్‌కు ప్రతీకగా యువత ఆయనను ఓన్‌ చేసుకుంది.

లీడర్‌షిప్‌ – దృఢ సంకల్పం : యువతను నడిపించడంలో ‘చే’ ది ఒక ప్రత్యేకమైన శైలి. మాటలతో కాకుండా చేతలతో లీడర్‌గా నిలిచాడు. గెరిల్లా యుద్ధాల్లో స్వయంగా ముందుండి నడవడం, క్యూబా విప్లవం విజయం సాధించాక మంత్రి పదవి వచ్చినా దాన్ని వదిలేసి మళ్లీ వేరే దేశాల్లోని పేదల పోరాటాల కోసం వెళ్ళిపోవడం ఆయన దృఢ సంకల్పానికి నిదర్శనం.
నేటి డిజిటల్‌ యుగంలో యువత కేవలం సోషల్‌ మీడియా పోస్టులకే పరిమితం కాకుండా, చేగువేరా స్ఫూర్తితో సామాజిక సేవా కార్యక్రమాలు (రక్తదానం, పేద విద్యార్థులకు సాయం చేయడం, పర్యావరణ పరిరక్షణ) వంటి ప్రాక్టికల్‌ పనుల్లో కూడా చొరవ చూపిస్తున్నారు. ఆయన సిద్ధాంతాలతో కొందరికి విభేదాలు ఉండొచ్చు, కానీ ”మార్పు కోసం పోరాడాలి, వ్యవస్థలో తప్పుల్ని ప్రశ్నించాలి” అని యువత ఆలోచించేలా చేయడంలో చేగువేరా ప్రభావం ఎప్పటికీ చెరిగిపోనిది.

– అనంతోజు మోహన్‌కృష్ణ 88977 65417