30 బంతుల్లోనే శతకబాదిన శర్మ
127 పరుగులతో భారత్ ఘన విజయం
3-0తో టీ20 సిరీస్ క్లీన్స్వీప్
భారత్ 221/7, అఫ్గనిస్తాన్ 94/10
నవతెలంగాణ-న్యూఢిల్లీ
అభిషేక్ శర్మ (108, 34 బంతుల్లో 9 ఫోర్లు, 11 సిక్స్లు) విశ్వరూపం చూపించాడు. టీ20 క్రికెట్లో మూడో వేగవంతమైన సెంచరీ సాధించిన అభిషేక్ శర్మ ఫిరోజ్ షా కోట్లలో అఫ్గనిస్తాన్ బౌలర్లను ఊచకోత కోశాడు. 11 సిక్స్లు, 9 ఫోర్లతో దండయాత్ర సాగించాడు. మరో ఓపెనర్ సంజు శాంసన్ (50, 35 బంతుల్లో 2 ఫోర్లు, 4 సిక్స్లు) అర్థ సెంచరీతో మెరిశాడు. తొలుత భారత్ 221/7 పరుగుల భారీ స్కోరు చేయగా, ఛేదనలో అఫ్గనిస్తాన్ 94 పరుగులకే కుప్పకూలింది. నితీశ్ కుమార్ రెడ్డి (3/25), రవి బిష్ణోయ్ (3/26), అక్షర్ పటేల్ (2/9) మ్యాజిక్ చేయగా 14.1 ఓవర్లలోనే అఫ్గాన్ చేతులెత్తేసింది. అఫ్గాన్ బ్యాటర్లలో జద్రాన్ (25), అజ్మతుల్లా (17) చెప్పుకోదగిన స్కోరు చేశారు. మూడో టీ20లో 127 పరుగులతో భారీ విజయం సాధించిన భారత్ 3-0తో సిరీస్ను క్లీన్స్వీప్ చేసింది.
అభిషేక్ ఊచకోత
టాస్ నెగ్గిన అఫ్గనిస్తాన్ బౌలింగ్ ఎంచుకోగా.. అభిషేక్ శర్మ ఊచకోతకు పూనుకున్నాడు. పవర్ప్లేలోనే ఎడాపెడా బౌండరీలు బాదిన అభిషేక్ శర్మ అఫ్గాన్ బౌలర్లను ఒత్తిడిలో పడేశాడు. ఐదు ఫోర్లు, ఐదు సిక్సర్లతో 16 బంతుల్లోనే అభిషేక్ అర్థ సెంచరీ సాధించగా.. భారత్ తొలి ఆరు ఓవర్లలోనే 100 పరుగులు పిండుకుంది. మహ్మద్ నబి ఓవర్లో అభిషేక్ శర్మ, సంజు శాంసన్ చెరో రెండు సిక్సర్లు కొట్టి విధ్వంసక ఇన్నింగ్స్ను మరో స్థాయికి తీసుకెళ్లారు. అభిషేక్ శర్మ మరో ఐదు సిక్స్లు, నాలుగు ఫోర్లతో 30 బంతుల్లోనే సెంచరీ కొట్టాడు. టీ20 క్రికెట్లో ఇది మూడో వేగవంతమైన సెంచరీ కావటం విశేషం. ఓపెనర్లు తొలి వికెట్కు 9.5 ఓవర్లలో 142 పరుగులు జోడించారు. రెండు ఫోర్లు, నాలుగు సిక్సర్లతో సంజు శాంసన్ సైతం 34 బంతుల్లో అర్థ సెంచరీ సాధించాడు. ఓపెనర్లు ఇద్దరు నిష్క్రమించిన తర్వాత పరుగుల వేగం నెమ్మదించింది. తిలక్ వర్మ (2) రనౌట్ కాగా.. శ్రేయస్ అయ్యర్ (29) ధాటిగా ఆడలేకపోయాడు. శివమ్ దూబె (14), ఇషాన్ కిషన్ (10) ఎదురుదాడి చేయలేకపోయారు. ఓ దశలో 270-280 స్కోరు అంచనా వేసినా.. ఆఖరుకు 221 పరుగులకు సరిపెట్టుకోవాల్సి వచ్చింది. అఫ్గనిస్తాన్ బౌలర్లలో అజ్మతుల్లా ఓమర్జాయ్ (2/27) రెండు వికెట్లు పడగొట్టగా.. రషీద్ ఖాన్ (1/43), అబ్దుల్లా అహ్మద్జాయ్ (1/38) రాణించారు. తిలక్ వర్మతో పాటు శ్రేయస్ అయ్యర్, ఇషాన్ కిషన్లు రనౌట్గా వెనుదిరిగారు.
