నిమ్స్‌‌లో కార్డియోవాస్క్యులర్ రీసెర్చ్ కన్వర్జెన్స్ 2026 సదస్సు

నవతెలంగాణ-సిటీబ్యూరో
హైదరాబాద్‌‌లోని నిజామ్స్ ఇన్‌స్టిట్యూట్ ఆఫ్ మెడికల్ సైన్సెస్ (నిమ్స్) ఎమర్జెన్సీ భవనంలోని ట్రామా ఆడిటోరియంలో రెండు రోజుల పాటు నిర్వహించిన “కార్డియోవాస్క్యులర్ రీసెర్చ్ కన్వర్జెన్స్ బెంచ్ టు బెడ్‌సైడ్” జాతీయ సదస్సు ఆదివారం విజయవంతంగా ముగిసింది. నిమ్స్, ఐఐటీ హైదరాబాద్, ఎయిమ్స్ న్యూఢిల్లీ సంయుక్తంగా నిర్వహించిన ఈ సదస్సు లక్ష్యం ప్రయోగశాల స్థాయిలో అభివృద్ధి చెందుతున్న వైద్య–ఇంజినీరింగ్ ఆవిష్కరణలను రోగులకు అందుతున్న ఆధునిక గుండె వైద్య సేవలతో అనుసంధానం చేయడం. ఈ కార్యక్రమానికి నిమ్స్ కార్డియాలజీ విభాగాధిపతి ప్రొఫెసర్ డాక్టర్ ఎన్.రమాకుమారి నాయకత్వం వహించారు. దేశవ్యాప్తంగా ప్రముఖ కార్డియాలజిస్టులు, కార్డియోథొరాసిక్ సర్జన్లు, బయోమెడికల్ ఇంజినీర్లు, పరిశోధనా శాస్త్రవేత్తలు ఈ సదస్సులో పాల్గొని స్వదేశీ వైద్య సాంకేతిక పరిజ్ఞానం అభివృద్ధి, పరిశోధనలను క్లినికల్ ప్రాక్టీస్‌కు అనుసంధానం చేయడం వంటి అంశాలపై చర్చించారు. సదస్సు చివరి రోజు అధునాతన ఇంటర్వెన్షనల్ కార్డియాలజీ విధానాలపై హ్యాండ్స్-ఆన్ వర్క్‌షాప్‌లు నిర్వహించారు. శస్త్రచికిత్స లేకుండా గుండె కవాటాన్ని అమర్చే విధానాలు, క్లిష్టమైన కరోనరీ యాంజియోప్లాస్టీ వంటి ఆధునిక చికిత్సా విధానాలపై నిపుణులు ప్రాక్టికల్ శిక్షణ అందించారు. అదేవిధంగా హార్ట్ ఫెయిల్యూర్, పల్మనరీ ఆర్టీరియల్ హైపర్‌టెన్షన్, ఆర్టిఫిషియల్ ఇంటెలిజెన్స్, ఆధునిక సాంకేతిక పరిజ్ఞానాల వినియోగం వంటి కీలక అంశాలపై నిపుణుల ప్యానెల్ చర్చలు నిర్వహించింది. సదస్సు ముగింపు కార్యక్రమంలో నిమ్స్ డీన్ డాక్టర్ చంద్రశేఖర్ వాలెడిక్టరీ ప్రసంగం చేశారు. వైద్య రంగం–ఇంజినీరింగ్ రంగాల మధ్య సమన్వయం మరింత పెరగాల్సిన అవసరాన్ని వివరించారు. భారతదేశంలో కార్డియోవాస్క్యులర్ వైద్య సేవల భవిష్యత్తు వైద్య నిపుణులు, ఇంజినీరింగ్ నిపుణుల మధ్య సమన్వయంపై ఆధారపడి ఉంటుందని తెలిపారు.
ప్రయోగశాలలో అభివృద్ధి చేసిన ఆవిష్కరణలను అందుబాటులో ఉండే, విస్తృతంగా ఉపయోగించగల వైద్య పరికరాలుగా మార్చడం ద్వారా దేశవ్యాప్తంగా రోగుల ఆరోగ్య ఫలితాలను మెరుగుపరచడం అత్యంత కీలకమని అన్నారు. సదస్సు ముగింపులో క్లినికల్ ట్రయల్స్‌ను వేగవంతం చేయడం, స్వదేశీ వైద్య పరికరాల అభివృద్ధి, పరిశోధనలను ప్రోత్సహించడం, దేశంలోని ప్రముఖ వైద్య–సాంకేతిక సంస్థల మధ్య అంతర్-సంస్థాగత పరిశోధనా భాగస్వామ్యాలను బలోపేతం చేయడం వంటి అంశాలపై భవిష్యత్ కార్యాచరణ ప్రణాళికను రూపొందించారు. ఈ కార్యక్రమంలో సీనియర్ ఫ్యాకల్టీ ప్రొఫెసర్ డాక్టర్ ఓ.సాయి సతీష్, ప్రొఫెసర్ బి.శ్రీనివాస్, జూనియర్ ఫ్యాకల్టీ డాక్టర్ కె.ఉమాదేవి, డాక్టర్ ఎ.సునీత తదితరులు పాల్గొన్నారు.