- Advertisement -
నిత్యం నిజాల నిప్పుల్ని మింగి
మాటలతో మంటలు పుట్టించి
నిర్లిప్త జనావళి జాగృతికై
చైతన్యపుదారుల్లో అక్షరాలనే
ఆయుధాలుగా కవాతు చేయించిన అక్షరశిల్పి
నిజాయితే ఊపిరిగా…
నిబద్ధతే ఆయుధంగా…
చివరి శ్వాసవరకు
ఒకే శ్వాసకోశంతో
పీడిత జనావళి కోసం
కాలాన్ని కలంలో నింపి
కరవాలంగా దూసిన
కవనయోధుడు
తెలంగాణా విముక్తే ధ్యేయంగా
స్వరాన్ని భాస్వరంగా మండించిన
ధిక్కార ఉద్యమకెరటం
వలసపాలకుల చెరనుంచి
కన్న భూమి సంకెళ్లను తెంచేందుకు
తెగదెంపుల పోరాటం చేసిన చలనశీలి
పేరులో మూడక్షరాలున్న
విశాల భావాల విశ్వమానవుడై
పౌరహక్కుల నేతగా
త్యాగమే ఊపిరిగా బతికిన
నిస్వార్ధ ప్రజాసేవకుడు
ప్రజలందరి గొడవను
నా గొడవంటూ
కవిత్వమై నినదిస్తూ..
ఒక్క సిరాచుక్కతో
లక్ష మెదళ్లను కదిలించిన
ప్రజాకవి
జీవితాన్నే కాదు
నిలువెత్తు దేహాన్ని
త్యాగం చేసిన
నిజమైన త్యాగధనుడు
- ప్రొ. బాణాల శ్రీనివాసరావు,
9440471423
- Advertisement -
