వీసా గరిష్ట కాలపరిమితి ఆరేండ్ల నుంచి రెండేండ్లకు కుదించేలా ప్రతిపాదన
ప్రవేశపెట్టిన అమెరికా చట్టసభ సభ్యుడు
వాషింగ్టన్ : రెండోసారి ట్రంప్ అధికారంలోకి వచ్చాక.. భారత్ పై కసి తీర్చుకునేలా సంస్కరణలకు చట్టబద్ధత కల్పించే చర్యలకు ఉపక్రమిస్తున్నారు. ఓవైపు మోడీ మంచి మిత్రుడంటూనే టారీఫ్ ల పెంపు నుంచి ఇపుడు అమెరికాకు వచ్చే భారతీయులను కట్టడి చేసే దిశగా నిర్ణయాలు తీసుకుంటున్నారు. ఇప్పటికే హెచ్-1బీ వీసా కోసం లక్ష డాలర్లు కట్టించుకుంటుంటే… తాజాగా హెచ్-1బీ వీసాలపై సంస్కరణల బిల్లును ప్రవేశపెట్టడానికి రిపబ్లికన్ పార్టీ సభ్యుడు ఈ బిల్లును ప్రవేశపెట్టారు. ఈ బిల్లు ప్రస్తుత వ్యవస్థలో అనేక మార్పులను ప్రతిపాదిస్తోంది. ఇది హెచ్-1బీ వీసాల గరిష్ట కాలపరిమితిని ఆరేండ్ల నుంచి రెండేండ్లకు తగ్గించాలని కోరుతోంది. దీంతో పాటు గ్రీన్ కార్డ్ మార్గంగా ఉన్న హెచ్-1బీ వీసాను రద్దు చేయాలని అమెరికా కాంగ్రెస్లో బిల్లు ప్రతిపాదిస్తున్నది. శాశ్వత నివాసం పొందే మార్గంగా దీని వినియోగాన్ని తొలగించడంతో సహా, హెచ్-1బీ వీసా కార్యక్రమంలో ప్రధాన మార్పులు చేయడానికి ఈ బిల్లును ప్రవేశ పెట్టినట్టు స్పష్టమవుతోంది.
కాంగ్రెస్ సభ్యుడు చిప్ రాయ్ గురువారం ప్రతినిధుల సభలో ప్రతిపాదిత “అమెరికన్ వైట్-కాలర్ వర్కర్ జాబ్స్ యాక్ట్”ను ప్రవేశపెట్టారు. ఈ చట్టం ప్రస్తుతం అంతర్జాతీయ విద్యార్థులు తమ చదువులు పూర్తి చేసిన తర్వాత పరిమిత కాలం పాటు అమెరికాలో పనిచేయడానికి అనుమతించే ఆప్షనల్ ప్రాక్టికల్ ట్రైనింగ్ (ఓపీటీ) కార్యక్రమాన్ని కూడా రద్దు చేయాలని లక్ష్యంగా పెట్టుకుంది.
ఈ ప్రతిపాదనను వివరిస్తూ, హెచ్-1బీ వ్యవస్థను సంవత్సరాలుగా దుర్వినియోగం చేశారని రాయ్ అన్నారు. “దాదాపు నలభై ఏండ్ల చరిత్రలో, హెచ్-1బీ వీసాను దుర్వినియోగం చేశారు, దీనివల్ల యజమానులు అమెరికన్ కార్మికులను పక్కన పెట్టడానికి వీలు కలిగింది” అని ఆయన పీటీఐకి తెలిపారు. ప్రస్తుత లాటరీ విధానాన్ని “ప్రతిభకు ప్రాధాన్యతనిచ్చే” మెరుగైన వేతన ప్రమాణాలను నిర్ధారించే విధానంతో భర్తీ చేయాలని ఆయన అన్నారు.
ఈ బిల్లు ఏ మార్పులను ప్రతిపాదిస్తోంది?
ఈ బిల్లు హెచ్-1బీ వీసాల గరిష్ట కాలపరిమితిని కుదించటంతో పాటు.. ప్రస్తుతం ఉన్న లాటరీ ఆధారిత ఎంపిక ప్రక్రియను, అధిక జీతాలు ఆఫర్ చేసిన దరఖాస్తుదారులకు ప్రాధాన్యతనిచ్చే వ్యవస్థతో భర్తీ చేయాలని యోచిస్తోంది. మరో కీలక ప్రతిపాదన “ద్వంద్వ ఉద్దేశం” అనే నిబంధనను తొలగించడం. ప్రస్తుతం, హెచ్-1బీ వీసా హోల్డర్లు అమెరికాలో పనిచేస్తూనే శాశ్వత నివాసం కోసం దరఖాస్తు చేసుకోవచ్చు. కొత్త బిల్లు ప్రకారం, దరఖాస్తుదారులు తమ స్వదేశానికి తిరిగి వెళ్లాలనుకుంటున్నట్టు చూపించాల్సి ఉంటుంది, తద్వారా వీసా, గ్రీన్ కార్డ్ మధ్య ఉన్న సంబంధం సమర్థవంతంగా ముగుస్తుంది. గ్రీన్ కార్డ్ దరఖాస్తుల ప్రక్రియ కోసం ఎదురుచూస్తున్న వీసాదారుల గడువు పొడిగింపులను నిలిపివేయాలని కూడా ఈ చట్టం ప్రతిపాదిస్తోంది. గృహ కార్మికులను రక్షించడానికి ఈ మార్పులు అవసరమని ఈ బిల్లు మద్దతుదారులు అంటున్నారు.
యూఎస్ టెక్ వర్కర్స్ అధిపతి కెవిన్ లిన్ మాట్లాడుతూ, ఈ ప్రతిపాదన వ్యవస్థలోని సమస్యలను పరిష్కరిస్తుందని అన్నారు. “అమెరికన్ కార్మికుల స్థానంలో ఇతరులను నియమించుకోవడానికి యజమానులకు వీలు కల్పించిన హెచ్-1బీ కార్యక్రమంలోని అనేక అంశాలను ఈ బిల్లు సమర్థవంతంగా పరిష్కరిస్తుంది” అని ఆయన తెలిపారు. ఈ బిల్లుకు సహ-ప్రయోజకుడిగా ఉన్న మరో రిపబ్లికన్ చట్టసభ్యుడు ఎలీ క్రేన్, దీని లక్ష్యం అమెరికా కార్మికులకు ప్రాధాన్యత ఇవ్వడమేనన్నారు. “భవిష్యత్ తరాలను రక్షించే సంస్కరణలను ఈ బిల్లు అందిస్తుంది” అని ఆయన చెప్పారు. ఇప్పటికే మూలిగేనక్కపై తాటికాయ పడ్డ చందాన భారతీయ టెకీల పరిస్థితి ఉంటే, ప్రస్తుత బిల్లు తీసుకురావడాన్ని బట్టి భవిష్యత్ లో ఇంకెన్ని నిర్ణయాలు తీసుకుంటారోనన్న ఆందోళన వ్యక్తమవుతోంది.
ఎవరిపై ప్రభావం
అధ్యక్షుడు డొనాల్డ్ ట్రంప్ పరిపాలనలో అమెరికాలో వలస నిబంధనలను కఠినతరం చేస్తున్న సమయంలో ఈ ప్రతిపాదన వచ్చింది. ఇటీవలి చర్యలలో కఠినమైన వీసా నిబంధనలు, కొత్త హెచ్-1బీ దరఖాస్తులపై అధిక రుసుము ఉన్నాయి. అమెరికాలోని హెచ్-1బీ వీసా హోల్డర్లు, అంతర్జాతీయ విద్యార్థులలో అధిక వాటా కలిగిన భారతీయ పౌరులపై ఈ ప్రతిపాదిత బిల్లు ప్రభావం గణనీయంగా ఉండవచ్చు. ఈ బిల్లు ఆమోదం పొందితే, తాత్కాలిక పని వీసాల నుంచి శాశ్వత నివాసానికి మారడం వారికి మరింత కష్టతరం కావచ్చు. ఈ బిల్లును సభలో ప్రవేశపెట్టారు. ఇది చట్టంగా మారడానికి ముందు కాంగ్రెస్ ఉభయ సభలలో ఆమోదం పొందవలసి ఉంటుంది.
