ఇలా శుభ్రం చేస్తే…

వంటగదిలో పాలు మరిగించడం ప్రతి ఇంట్లో రోజూ జరిగే సాధారణ పని. అయితే ఒక్కసారి అజాగ్రత్తగా ఉంటే పాలు పొంగి పొర్లిపోవడం, గిన్నె అడుగున పాలు మాడిపోవడం జరుగుతుంటుంది. పాలు మాడిపోయిన తర్వాత గిన్నె అడుగున ఏర్పడే నల్లటి పొరను తొలగించడం చాలా కష్టంగా ఉంటుంది. అయితే కొన్ని చిట్కాలతో నల్లటి మరకలను సులభంగా తొలగించుకోవచ్చు.
వెనిగర్, బేకింగ్ సోడా, నిమ్మ తొక్కలు వంటి పదార్థాలు మాడిపోయిన గిన్నెను తిరిగి కొత్తదానిలా మెరిపించడంలో అద్భుతంగా పనిచేస్తాయి. వీటిని ఉపయోగించడం వల్ల ఖర్చు తక్కువగా ఉండటమే కాకుండా గిన్నెకు ఎలాంటి నష్టం ఉండదు. ముందుగా ఒక పెద్ద పాత్రలో గోరువెచ్చని నీటిని తీసుకుని అందులో రెండు టీస్పూన్ల వెనిగర్, రెండు టీస్పూన్ల బేకింగ్ సోడా కలపాలి. ఈ మిశ్రమంలో మాడిపోయిన గిన్నెను పూర్తిగా మునిగేలా ఉంచాలి. గిన్నె అడుగున ఉన్న నల్లటి పొర ఈ ద్రావణం ప్రభావంతో క్రమంగా మెత్తబడుతుంది. కనీసం ఒకటి నుంచి రెండు గంటల వరకు అలాగే ఉంచితే మరింత మంచి ఫలితం కనిపిస్తుంది.కొన్ని సందర్భాల్లో పాలు బాగా మాడిపోవడం వల్ల గిన్నె అడుగున మందపాటి నల్లటి పొర ఏర్పడుతుంది. అలాంటి సమయంలో గిన్నెను 2 నుంచి 3 గంటల పాటు లేదా అవసరమైతే రాత్రంతా ఈ ద్రావణంలో నానబెట్టవచ్చు. ఎక్కువసేపు నానబెట్టిన కొద్దీ మురికి మరింత సులభంగా వదులుతుంది. పాలు మాడిపోకుండా ఉండాలంటే కొన్ని జాగ్రత్తలు కూడా తీసుకోవాలి. పాలు మరిగేటప్పుడు వంటగదిని వదిలి వెళ్లకూడదు. మంటను ఎక్కువగా పెట్టకుండా మధ్యస్థ స్థాయిలో ఉంచాలి. పాలు మరిగే సమయంలో అప్పుడప్పుడు కలుపుతూ ఉండటం మంచిది.