ఎర్రటి పెదాలని ఎంతోమంది పెద్ద పెద్ద కవులు వర్ణించారు. అధరాల అందాలని, అందించే మధువులని పొగడటం ఎప్పట్నుంచో ఉంది. అందుకే ట్రెండీ టీ షర్ట్స్‌ కానీవ్వండీ, దుప్పట్లు కానివ్వండి… ఇలా ఏ తరహా బట్టలపైనా అయినా ‘లిప్స్‌ ప్రింట్‌’ అద్భుతమే అవుతుంది. లాకెట్స్‌, బ్రాస్లేట్స్‌, గాజులూ, నెక్లెసులూ, రింగులతో పాటు క్లిప్పులూ, చెప్పులూ, బెల్టు బకెల్స్‌, స్కార్ఫూ, సాక్స్‌, పెన్‌ డ్రైవ్స్‌… ఇలా అన్ని యాక్ససరీస్‌ కీ ‘పెదవుల’ డిజైన్స్‌ అద్దుకుని ‘ముద్దు’ లొలుకుతున్నాయి. ఫ్యాషన్‌ పరంగా అందరి హృదయాలను చూరగొన్న లిప్‌ అందాలు ఇప్పుడు పెన్‌ స్టాండ్స్‌, సోఫాలు, కుర్చీల్లాంటి ఫర్నిచర్‌, ఇతర ఇంటీరియర్‌ వస్తువులలోనూ ప్రతిఫలిస్తున్నాయి. సరికొత్త అందాలు ఇంట్లో ప్రవేశిస్తోన్న ఈ కాలంలో లిప్స్‌ డిజైన్స్‌ కర్టెన్స్‌ మీద కూడా రొమాంటిక్‌ ‘టింట్‌’ అద్దుతూ ముద్దు ముద్దుగా పలకరిస్తూ ఆహుతుల్ని అలరిస్తున్నాయి. పడగ్గది అలంకరణ కోసం ఎర్రటి పెదవుల ఫొటోలని ప్రింట్‌ చేసుకుని పోస్టర్స్‌ కూడా ఈ జాబితాలో చేరి ‘లిప్స్‌’ మీద ఉన్న అభిమానం చాటుకుంటున్నాయి. ఈ తరహా డిజైన్స్‌ కేవలం ఎరుపు రంగుతోనే కాకుండా ఇతర రంగులనీ అద్దుకుని సొబగులీనుతున్నాయి. వాటినో లుక్కేసుకోండి.
– ఆదిత్య వైనతేయ, కామారెడ్డి
