అర్థం చేసుకో..‘రా’?!

​పాపభీతి పోయాక
దేవుడేంది? గుడులేంది ?
నైతికత తీసిపారేశాక
మతం ఏంది? ధర్మం ఏంది?
మా రాజధర్మం మాకున్నాక
ఈ న్యాయమేంది? చట్టాలేంది?
​
ప్రశ్నను బొక్కలో వేసాక
ఇక బోనులోనే
లైంగికదాడులు చేపట్టినవారికి
హారతులివ్వడం మా ఆచారం
ఉద్యమాలపై ఊరకుక్కలను
ఉసికొల్పడం మా కట్టుబాటు
​
జ్ఞానం ఎంత ప్రమాదకరం ?
రాముడు అందుకే
శంభకున్ని వధించాడు
ప్రమాదం అనిపిస్తే చాలు
మా జైళు నోళ్లు తెరుస్తాయి.
కాదంటే చీకటి రాజ్యం
కండ్లు తెరుస్తుంది
​
మహాత్మున్ని మట్టుపెట్టలేదా..?
గౌరీలంకేష్ అంతం కాలేదా?
అప్పుడైనా ఇప్పుడైనా …
దేన్ని తేల్చిచెప్పం
అదే మా ధర్మాచరణ
అర్థంకాకపోతే ఎలా..?
​-శైలి