లీషా కిరణ్ కు 4 స్వ‌ర్ణ ప‌త‌కాలు

తెలంగాణ రాష్ట్ర షూటింగ్ పోటీలు
హైదరాబాద్: తెలంగాణ రైఫిల్ అసోసియేషన్ ఆధ్వర్యంలో గచ్చిబౌలిలోని శాట్‌ షూటింగ్ రేంజ్‌లో జరుగుతున్న తెలంగాణ రాష్ట్ర ఎయిర్, స్మాల్ బోర్ ,షాట్‌గన్ షూటింగ్ పోటీలు హోరాహోరీగా కొనసాగుతున్నాయి. 10 మీటర్ల ఎయిర్ పిస్టల్, ట్రాప్, స్కీట్ విభాగాల పోటీలు మంగ‌ళ‌వారం విజ‌య‌వంతంగా ముగిశాయి. ఈ పోటీల్లో లీషా కిరణ్ అత్యుత్తమ ప్రదర్శనతో అందరి దృష్టిని ఆకర్షించింది. మ‌హిళ‌ల‌ 10 మీట‌ర్ల ఎయిర్ పిస్ట‌ల్ సీనియ‌ర్‌, జూనియర్, యూత్, సబ్ యూత్ విభాగాల్లో నాలుగు స్వర్ణ పతకాలు సాధించింది. నాలుగు విభాగాల్లోనూ ఆమె 377/400 స్కోరు నమోదు చేయడం విశేషం. చిక్కం యశ్రీ సేనన్య ఈ విభాగాల్లో నాలుగు రజత పతకాలు సాధించింది. యూత్ మెన్, సబ్ యూత్ మెన్ విభాగాల్లో సూర్యకృష్ణ చిత్తూరు రెండు స్వర్ణాలు, జూనియర్ మెన్ విభాగంలో రజతం సాధించి మూడు పతకాలతో మెరిశాడు. రాజ్యసభ సభ్యులు ఎం. అనిల్ కుమార్ యాదవ్‌, తెలంగాణ రైఫిల్ అసోసియేషన్ అధ్యక్షుడు అమిత్ సంఘితో క‌లిసి విజేత‌ల‌కు ప‌త‌కాలు అంద‌జేశారు.