సూపర్‌ సినర్‌

– క్వార్టర్‌ఫైనల్లో ఇటలీ స్టార్‌
– సెమీస్‌కు కొకొ గాప్‌, ముచోవా
– మయామి ఓపెన్‌ 2026
మయామి (యుఎస్‌ఏ)
వరల్డ్‌ నం.2, ఇటలీ స్టార్‌ ఆటగాడు జానిక్‌ సినర్‌ జోరు కొనసాగుతుంది. రెండోరౌండ్లో వరుస సెట్లలో విజయం సాధించి ఏటీపీ 1000 మాస్టర్స్‌ టోర్నమెంట్లలో నొవాక్‌ జకోవిచ్‌ (25 సెట్ల) రికార్డును బద్దలుకొట్టిన సినర్‌.. తాజాగా ప్రీ క్వార్టర్‌ఫైనల్లో మెరుపు విజయంతో ఆ రికార్డును 28 సెట్లకు మెరుగుపర్చుకున్నాడు. బుధవారం పురుషుల సింగిల్స్‌లో జరిగిన ప్రీ క్వార్టర్స్‌లో జానిక్‌ సినర్‌ 7-5, 7-6(7-4)తో అలెక్స్‌ మైకల్‌సన్‌ (అమెరికా)పై గెలుపొందాడు. 15 ఏస్‌లు, 2 బ్రేక్‌ పాయింట్లతో మెరిసిన జానిక్‌ సినర్‌.. తొలి సెట్‌ను 7-5తో నెగ్గాడు. రెండో సెట్లో ఓ బ్రేక్‌ పాయింట్‌ సాధించిన అలెక్స్‌ మైకల్‌సన్‌ మ్యాచ్‌ను నిర్ణయాత్మక మూడో సెట్‌కు తీసుకెళ్లాలా కనిపించాడు. టైబ్రేకర్‌లో 7-4తో పైచేయి సాధించిన సినర్‌.. రెండో సెట్‌తో పాటు క్వార్టర్‌ఫైనల్‌ బెర్త్‌ను సొంతం చేసుకున్నాడు. పాయింట్ల పరంగా 71-62తో సినర్‌ పైచేయి సాధించాడు. సినర్‌ క్వార్టర్స్‌కు చేరుకోవటంతో.. పురుషుల సింగిల్స్‌ క్వార్టర్స్‌లో ఎవరితో ఎవరు తలపడతారనేది తేలిపోయింది. టామీ పాల్‌ (అమెరికా)తో ఆర్థర్‌ ఫిల్స్‌ (ఫ్రాన్స్‌).. అలెగ్జాండర్‌ జ్వెరెవ్‌ (జర్మనీ)తో ఫ్రాన్సిస్కో సెరుండోలో (అర్జెంటీనా)…మార్టిన్‌ (స్పెయిన్‌)తో జిరి (చెక్‌ రిపబ్లిక్‌).. జానిక్‌ సినర్‌ (ఇటలీ)తో ఫ్రాన్సెస్‌ టియఫోయె (అమెరికా) పోటీపడనున్నారు.

సెమీస్‌లో బెలింద, ముచోవ
మహిళల సింగిల్స్‌లో అమెరికా అమ్మాయి, నాల్గో సీడ్‌ కొకొ గాఫ్‌ సెమీఫైనల్లోకి ప్రవేశించింది. స్విస్‌ భామ బెలింద బెన్సిక్‌తో మూడు సెట్ల సమరంలో కొకొ గాఫ్‌ పైచేయి సాధించింది. 6-3, 1-6, 6-3తో కొకొ గాఫ్‌ గెలుపొందింది. ఆరు ఏస్‌లు, నాలుగు బ్రేక్‌ పాయింట్లతో రాణించిన కొకొ గాఫ్‌.. పాయింట్ల పరంగా 86-88తో వెనుకంజ వేసింది. తొలి సెట్‌, నిర్ణయాత్మక సెట్‌ను గట్టి పోటీ ఇస్తూ ఓడిన బెలింద.. రెండో సెట్‌ను 6-1తో ఏకపక్షంగా నెగ్గింది. 3 ఏస్‌లు, 4 బ్రేక్‌ పాయింట్లతో మెరిసినా.. ఒక్క సెట్‌లోనే ఆధిపత్యం కనబరిచింది. మరో క్వార్టర్‌ఫైనల్లో విక్టోరియా (కెనడా)పై కరొలినా ముచోవ (చెక్‌ రిపబ్లిక్‌) 7-6, 7-6(7-5)తో విజయం సాధించింది. ఐదు ఏస్‌లు, ఓ బ్రేక్‌ పాయింట్లతో ముచోవ పైచేయి సాధించింది. టైబ్రేకర్‌కు దారితీసిన రెండో సెట్‌ను సొంతం చేసుకున్న ముచోవ.. సెమీఫైనల్‌ బెర్త్‌ ఖాతాలో వేసుకుంది. పాయింట్ల పరంగా 82-77తో విక్టోరియాపై ముచోవ ఆధిపత్యం చూపించింది. మహిళల సింగిల్స్‌ మరో రెండు క్వార్టర్‌ఫైనల్స్‌లో ఎలెనా రిబకినా (కజకిస్తాన్‌)తో జెస్సికా పెగులా (అమెరికా)…అరినా సబలెంక (బెలారస్‌)తో హేలే (అమెరికా) తలపడనున్నారు.