నవతెలంగాణ – హైదరాబాద్: గుజరాత్లో త్వరలో జరగనున్న స్థానిక సంస్థల ఎన్నికల్లో ఆమ్ ఆద్మీ పార్టీ (ఆప్) అధికారంలోకి వస్తే క్షేత్రస్థాయి నుంచే అవినీతిని పూర్తిగా నిర్మూలిస్తామని ఆ పార్టీ జాతీయ కన్వీనర్ అరవింద్ కేజ్రీవాల్ ప్రకటించారు. అధికార బీజేపీ, ప్రతిపక్ష కాంగ్రెస్ కుమ్మక్కై రాష్ట్రాన్ని దోచుకుంటున్నాయని ఆయన తీవ్ర ఆరోపణలు చేశారు. ఇప్పటివరకు గుజరాత్ ప్రజలకు సరైన ప్రత్యామ్నాయం లేదని, ఇప్పుడు ఆప్ రూపంలో అది అందుబాటులోకి వచ్చిందని కేజ్రీవాల్ అన్నారు. “ఈసారి చీపురు (ఆప్ గుర్తు) ఉపయోగించి పాత రాజకీయ వ్యవస్థను ఊడ్చివేయాలి” అని ప్రజలకు పిలుపునిచ్చారు. స్థానిక సంస్థల ఎన్నికల తేదీలు ఇంకా ఖరారు కాలేదు.
స్థానిక ఎన్నికల ప్రచారంలో భాగంగా పంజాబ్ ముఖ్యమంత్రి భగవంత్ మాన్తో కలిసి కేజ్రీవాల్ మూడు రోజుల గుజరాత్ పర్యటనలో ఉన్నారు. గురువారం సౌరాష్ట్ర ప్రాంతంలోని లాల్పూర్లో జరిగిన ‘విజయ్ విశ్వాస్ సభ’లో ఆయన ప్రసంగించారు. పంజాబ్లో తమ ప్రభుత్వం ప్రతి మహిళకు నెలకు రూ. 1,000, ప్రతి కుటుంబానికి రూ. 10 లక్షల బీమా, ఉచిత విద్యుత్ వంటి పథకాలను అమలు చేస్తోందని, గుజరాత్లోనూ వీటిని అమలు చేస్తామని హామీ ఇచ్చారు.
