ఇటీవలి కాలంలో బరువు తగ్గడానికి, ఆరోగ్యం కోసం సోషల్ మీడియాలో బాగా ట్రెండ్ అవుతున్న పద్ధతుల్లో వాటర్ ఫాస్టింగ్ ఒకటి. అయితే దీని వల్ల ఎలాంటి ప్రయోజనాలు ఉన్నాయి, ఎలాంటి ప్రమాదాలు ఉన్నాయో పూర్తి వివరాలు ఇక్కడ తెలుసుకుందాం.
సరైన పద్ధతిలో, పరిమిత కాలం పాటు చేసినప్పుడు దీని వల్ల కొన్ని ఆరోగ్య ప్రయోజనాలు ఉంటాయి.
వేగంగా బరువు తగ్గడం: ఆహారం తీసుకోకపోవడం వల్ల శరీరం శక్తి కోసం లోపల నిల్వ ఉన్న కొవ్వును కరిగించడం ప్రారంభిస్తుంది.
ఆటోఫాగి(Autophagy): శరీరం తనలోని పాత, దెబ్బతిన్న కణాలను విచ్ఛిన్నం చేసి శుభ్రం చేసుకునే ప్రక్రియను ఇది ప్రేరేపిస్తుంది.
ఇన్సులిన్ సెన్సిటివిటీ: రక్తంలో చక్కెర స్థాయిలు తగ్గి, ఇన్సులిన్ సమర్థవంతంగా పనిచేయడానికి దోహదపడుతుంది.
ప్రమాదాలు
వైద్యుల సలహా లేకుండా లేదా ఎక్కువ రోజులు చేయడం వల్ల తీవ్ర పరిణామాలు ఎదురవుతాయి:
పోషకాహార లోపం: కేవలం నీరు మాత్రమే తాగడం వల్ల విటమిన్లు, ఖనిజాలు, ప్రొటీన్లు శరీరానికి అందవు.
తీవ్రమైన నీరసం, డీహైడ్రేషన్: తలనొప్పి, కళ్లు తిరగడం, అలసట, రక్తపోటు/ షుగర్ లెవెల్స్ దారుణంగా పడిపోవడం వంటి సమస్యలు వస్తాయి.
కండరాల క్షీణత (Muscle Loss): కొవ్వుతో పాటు శరీరం శక్తి కోసం కండరాల ప్రొటీన్ను కూడా వాడుకునే అవకాశం ఉంది.
వాటర్ ఫాస్టింగ్ ఎలా చేయాలి?
మీరు వాటర్ ఫాస్టింగ్ చేయాలని ఆలోచిస్తుంటే కొన్ని సురక్షితమైన మార్గాలను పాటించాలి.
పరిమిత సమయం ఎంచుకోండి: ప్రారంభంలో 12 నుండి 24 గంటల కంటే ఎక్కువ చేయకూడదు. అనుభవం లేకుంటే 24-48 గంటల ఫాస్టింగ్ సొంతంగా చేయడం ప్రమాదకరం.
తగినంత నీరు తాగాలి: రోజుకు కనీసం 2 నుండి 3 లీటర్ల నీరు తాగాలి. అవసరమైతే ఎలక్ట్రోలైట్స్ (ఎలక్ట్రాల్ పౌడర్ లేదా చిటికెడు ఉప్పు) నీటిలో కలుపుకోవచ్చు.
ప్రిపరేషన్ (ప్రీ-ఫాస్టింగ్): ఫాస్టింగ్ ప్రారంభించడానికి ముందు రోజు నుండే తేలికపాటి ఆహారం, పండ్లు, కూరగాయలు మాత్రమే తీసుకోవాలి.
ఉపవాసం ముగించే పద్ధతి (Post- Fasting):: ఫాస్టింగ్ పూర్తయిన వెంటనే బరువైన లేదా నూనె పదార్థాలు తినకూడదు. కొబ్బరినీళ్లు, తేలికపాటి సూప్ లేదా పండ్ల రసాలతో ప్రారంభించి, నెమ్మదిగా సాధారణ ఆహారానికి మారాలి.
ఎవరు అసలు చేయకూడదు?
ఈ కింది వారు వాటర్ ఫాస్టింగ్ అసలు చేయకూడదు.
– గర్భిణులు, పాలిచ్చే తల్లులు
– డయాబెటిస్ (మధుమేహం) ఉన్నవారు, బిపి/షుగర్ మందులు వాడేవారు
– ఈటింగ్ డిజార్డర్స్ లేదా తీవ్రమైన దీర్ఘకాలిక వ్యాధులు ఉన్నవారు
ముఖ్యమైన సూచన: వాటర్ ఫాస్టింగ్ అనేది అందరి శరీర తత్వానికి సెట్ కాదు. ఇంటర్నెట్లో చూసి ఒక ట్రెండ్లా గుడ్డిగా ఫాలో అవ్వకుండా, ఏదైనా కొత్త డైట్ ప్రారంభించే ముందు తప్పనిసరిగా మీ వైద్యుడిని లేదా డైటీషియన్ను సంప్రదించడం శ్రేయస్కరం.
వాణి అయోధ్య
క్లినికల్ డైట్ కన్సల్టంట్
9959361180
